Pat Maw hpe mawkawp maga ya taw nga ai, Hkalawng Kawng Myen hpyen dap hpe KIA dap maga htim gasat zing madu kau lu sai lam chye lu ai.
KIA Dapba (2) Dung (14) ginra, Danai Pat Maw hta naw ngam taw ai Hkalawng Kawng Myen hpyen dap hpe KIA dap maga June 10 ya shana maga de htim gasat zing madu kau lu sai nga shawng lam magam gun hte ni nawn ai ni kaw na chye lu ai.
Dai Myen hpyen dap shara hpe KIA dap maga June praw 8 ya shani kaw na gap gasat hpang wa ai gaw, nhtoi 2 ya na ai hpang htim gasat zing madu la lu wa ai rai nga ai.
Dai ginra mayan hta Myen hpyen dap dai shara langai sha ngam sai rai nna, dai dap shara hta Jahtu Zup Myen hpyen dap Hk.L.Y (297), hte Mayan Myen hpyen dap Hk.L.Y (260) dap ni ni pawng hpawm dap jung ai shara re lam chye lu ai.
June 8 ya shana hta Hkalawng Kawng Myen hpyen dap kaw na gap dat ai 60 mm laknak kaba si a majaw, mung shawa marai 3 hkala hkrum wa ai re.
Hkala hkrum ai mung shawa marai 3 gaw, Jan Hkawn Tawng la hkra magyi hte lahkra chyu kaw hkra ai majaw, hkala sawng wa ai rai nna, Salang Tu Lum hte Salang Di Ram yan gaw lagaw kaw hkra hkala wa ai re lam chye lu ai.
Dai mayan na Myen hpyen dap yawng hpe KIA dap maga lai wa sai shata ni hta htim gasat shagrawt kau ma ai rai nna, ya hpang jahtum dai dap shara langai sha ngam sai rai nga ai.
