Mogaung Myen Hpyen Dap Hta Shingnan Wan Sat Dap Hte Pyitthutsit Ni Hpe Hpyen Wunkat Jaw Nga
Mogaung Myen hpyen dap Ts,K.Hk 3 hpyen dap wang kata, Shingnan wan sat hpung ni hte Pyithutsit ni hpe hpyen wunkat jaw taw nga ai lam ginra masha ni tsun ai re.
Myen hpyen dap gaw, lai wa sai nhtoi lahkawng ya daram kaw na hpyen wunkat jaw taw ai rai nna, ya na zawn Pyithutsit hte Shingnan wan sat dap ni hpe hpyen hpaji sharin ya wa ai gaw, dap kata hpyen n-gun grai yawm wa ai majaw re nga, Mogaung ginra masha langai KNG de ndai zawn tsun ai re.
“Ndai laman Mogaung Ts.K.Hk 3 hta hpyen grai shaman shakyang taw nga ma ai, san yu yang Shingnan Wan sat hpung hte Pyithutsit ni hpe hpyen wunkat jaw taw ai nga tsun ai, 3 ya daram sha naw re nga,” tsun ai re.
Mogaung Myitkyina, Mandalay lam kaba mayan hte Myen hpyen dap hte SNA dap ni pawng hpawm nna, lai wa lai sa mung mare masha ni hpe laja lana san jep ai lam hte rim woi da ai lam ni galaw wa ai re.
Ya ten Mogaung muklum mare shinggan ni hta, Myen hpyen dap maga shim lam shaja da nna, lai sa lai wa mung shawa ni hpe san jep ai lam ding yang galaw nga ai re.
