Sagaing, Pinlaybu mare kaba hte Tamu-Hkam Pat mare kaba hpe KIA woi awn ai hte, pawng hpawm PDF dap ni htim gasat zing madu la kau lu sai lam, NUG ndau da ai re.
Pinlaybu hpe November 8 ya jahpawt zing madu la kau ai rai nna, Tamu Hkampat hpe gaw November praw 7 ya shani zing madu la lu ai lam chye lu ai.
Pinlaybu Myen hpyen n-gun 100 jan gaw, dawng hkawn hpraw sharawt asum jaw kau ai majaw, dai muklum kaba hpe jahkring mi laman hta sha zing madu la kau lu ai re lam, dai ginra na PDF lit nga ai langai KNG de ndai zawn tsun da ai re.
“Shanhte balik dap htap masum ngu kaw hpyen n-gun 100 jan hte shara la taw ai, dai ni yawng asum jaw lata sharawt ai, mana hkying 9 daram hta re, dai majaw Pinlaybu hpe aloi sha lu la kau ai,” nga tsun dan re
November praw 3 ya shani kaw nna, Sagaing ginra, Myen hpyen dap shara ni hpe Wunpawng Mungdan Shanglawt Hpyen dap KIA woi awn htim gasat wa ai gaw, November praw 8 ya shani, Kawlin, Tamu Hkam Pat hte Pinlaybu muklum kaba ni hpe zing da lu sai lam, tsun da ai re.
Mare muklum htim gasat majan hta, ndai laman Myen hpyen dap maga na laknak machyu pala alaw alam lu zing madu la ai lam matut chye lu ai.
Myen hpyen dap maga na mung, nbungli hte mare kata gap bun ai majaw, mung shawa si hkala ai lam hte dum nta hten za ai lam ni mung ding yang byin nga ai re.
Pinlaybu mukluk gaw, Kawlin muklum a sinna de na mare muklum kaba langai rai nna, dai ginra hta Phone Internet line yawng pat da ya ai shara re lam chye lu ai.
November praw 8 ya shani du hkra rai yang, Sagaing ginra, mare kaba 3 hpe rawt malan hpung ni zing madu lu sai rai nga ai.
