Myitkyina, Aye Mya Tar Yar Lawk, Sam Kahtawng kaw na La langai hpe Myen hpyen hpyendap ni gaw dai jahpawt daw hkying 11 daram hta sa rim woi mat ai lam chye lu ai.
Hpyen n-gun 20 daram hte Sam Kahtawng kaw Tattoo seng hpaw da ai asak 25 ram re La langai hpe dum n’ta kaw n’ta masha ni hte nga taw ai shaloi adup nna, rim woi mat ai re lam ginra masha langai tsun ai.
“Tettoo seng hpaw da ai re. Daihpawt hkying 11 daram kaw sa rim woi mat ai re da. Myen hpyenla hte Balik ni kawn adut nna, anhte san ai yawng htai yang bai dat na ngu tsun na rim woi mat lam chye lu ai” nga na tsun ai.
Myen hpyen dap ni kawn dai La wa gaw PDF ni hte matut mahkai seng ai masha re ngu na sa rim woi mat ai lam chye lu ai.
Dai majaw rim hkrum ai wa gaw PDF ni hte seng ai masha rai nrai hpe Myitkyina PDF kaw na lit nga ai langai hpe san yu ai shaloi ya na zawn tsun ai.
“Ya rim hkrum ai masha hpe anhte ni n chye ai. Anhte PDF hpung ni hte mung hpa n seng ai re” nga nna tsun ai.
Myen hpyendap daru magam zingla la kau ai hpang 2021-2022 ning laman, Myitkyina kata hta PDF ni hte matut mahkai seng ai ngu na rim la ai PDF ni mung lawm rai na mungshawa ni hte yawng marai 15 jan rim hkrum da ai re.
Dai rim hkrum da ai masha ni hta 2022 ning, April 25 ya shani rim hkrum ai Myitkyina kata shamu shamawt nga ai PDF hpung ningbaw U Chyit hte marai 5 gaw san jep ai kaw si mat sai lam Myen hpyen dap hte ni nawn ai ni tsun ai.
Myen hpyen dap ni gaw Myitkyina, Waimaw kata ya kalang masha hkan rim ai lam ni galaw wa nna, June 22 ya shani Waimaw Shwe Nyawng Pin mare hpunggyi jawng na kaba dik re hpunggyi hpe rim woi mat ai lam mungshawa ni tsun nga ai re.
