Mocha nbung laru a majaw, htenza mat ai Manje, Awngnan mare na hpaji jawng hpe bai gawgap la na matu garum ntum ra kadawn nga ai lam ginra masha ni kaw na chye lu ai.
Awngnan mare kaw laiwa sai May shata kaw Mocha nbung laru hkrum hkra nna, hpaji jawng dum n’ta ni htenza mat ai majaw, jawng hpe mai byin ai made gan galaw da nna, hpaji sharin nga ai majaw, yakhkak ai lam ni grai nga ai hpe ginra masha langai kawn KNG de tsun ai.
“Hpritsu dingsa ni hpe bai shaw la na mi na jawng makau gawdin pa kaw mai byin ai hku galaw da ai re. Asuya mung nlu garum shi ai. Kadai mung garum ai lam nnga ai. Mare kaw na kawa shaw la na kawa ni hte shadaw galaw na mai byin ai hku galaw da ai re. Bai na anhte mare gaw hpyen yen kaw na bai wa gawgap nga ai re majaw, yakhkak ai lam ni grai law nga ai re” nga na tsun ai.
Shawng de Awngnan mare hta lawu tsang Jawng sha nga ai raitim, ya gaw tsang 6 du hkra hpaw jat da ai rai nna, jawngma yawng 42 nga ai lam chye lu ai.
Ya gan galaw da ai shara gaw marang htu wa yang marang gayun ai majaw, jawngma ni laika sharin ai ten atsawm sharin lu na matu hpritsut, dung lahkum ni garum ya na matu ginra madu, hpawmi langai kawn KNG de tsun ai.
Awngnan mungshawa ni gaw kan bau bungli hku nna hkai lu hkai sha ai bungli hpe madung galaw ai rai nna, htinggaw 37, mare masha 220 daram nga ai lam chye lu ai.
Awngnan mare gaw Shwigu Ginwang, KIA dung 12 ni a uphkang ginra kaw nga ai re lam chye lu ai.
