Wunpawng Mungdan Shanglawt Kongsi Ningbaw Malai (1) Dukaba Sumlut Gun Maw hte DGA lithkam Dukaba Lahpai Zau Raw woi awn ai Salang ni Mungmyit Sinli ga de sa du nna, Mung Shawa ni, Jinghku Laknak lang rawt malan hpung ni hte hkrum jahta wa ai lam chye lu ai.
April praw 5 ya shani Namhpakka Muklum KBC Nawku jawng kaw mung Shawa hte hkrum zup ai lam galaw wa ai hpe chye lu ai.
“Mung shawa ni hpe tsun salang dan mat wa ai kaw madung gaw gahkyin gumdin ra ai lam, ndai ten na mayak lam ni hpe hkam sharang let jawm lai di na matu, mung shawa ni kaw na mung atsam marai shapraw na matu, Mungkan Mungdan a mung masa lam ni gaw n dai zawn sha n rai taw na re lam, shi aten hta hkan nna, shi hte shi galai shai mat na re majaw, n dai masa lam hpe mung shawa yawng hkam sharang let, naw jawm lai di mat na matu madung n-gun jaw mat ai,” nga tsun ai re.
Mung Shawa hte hkrum ngut ai hpang, Mungmyit Sinli ga nga ai Jinghku rawt malan hpung shagu hte mung matut hkan hkrum jahta mat ai lam chye lu ai.
Dai hkan hkrum jahta ai laknak lang jinghku rawt malan hpung ni gaw, Kokang MNDAA, Balawng TNLA, Dingdung Sam SSPP, ni hte hkrum jahta mat ai lam chye lu ai re.
Ginjaw salang ni kaw nay a na zawn laknak lang wuhpung ni hte sa hkrum jahta ai majaw, dai ginra nga amyu baw sang shada grau magyep kap na mai kaja ai lam hku jawm nga pra lu na hpe myit mada ai lam ginra masha langai KNG Shiga dap de n dai zawn matut tsun dan ai re.
“Ndai kalang na hkrun lam gaw, Sam, Balawng, Kokang yawng hte lu hkrum jang gaw grau mai kaja wa na sai ngu myit mada kam nga ga ai,” nga tsun ai re.
Jinghku rawt Malang hpung shada rai nga ai Kokang hte Balawng gap gasat hkat ngut wa ai hpang, KIO Ginjaw Salang ni, KIO Dingda Ginwang Ginjaw de yu nna, Mung shawa ni hte sa hkrum jahta wa ai masa re nga ginra masha ni tsun maram da ai re.
