Hpakant Ura Hka Sinpraw maga Myen Hpyen dap tat sum kau da ai shara ni hpe bai gasat zing madu la lu na matu Myen Hpyen dap hpyen n gun kaba hte htim gasat taw nga ai re.
Myen Hpyen dap maga, ra lata poi rai n du shi ai laman shan hte tat sum kau ai shara ni hpe lu hkra bai gasat la na, ra lata poi galaw na hkyen taw ai majaw, shani shagu majan byin taw ai lam chye lu ai.
Ndai laman hta Seng Tawng maga de htu na matu, Seng Tawng Mare dingsa Malang dung mare maga hku na htu lung wa ai majaw, majan byin taw ai lam ginra masha langai KNG de n dai zawn tsun dan wa ai re.
October 5 ya shana Malang dung de Myen Hpyenla 200 daram shang wa nna, shan hte Nawku jawng kaw nga na matu ahkang hpyi ma ai da, Nawku jawng ni ahkang n jaw rai jang gaw, Hpaji jawng de bai sa mat wa ai nga, Mani Hpawt October 6 ya jahpawt gaw Myen ni ရတနာစိန်သီရိ ကုမ္ပဏီ de shang mat na anhte maga na ni Drone bawm sa jahkrat bun ma ai, ram ram masan sa ai nga na gaw tsun ai,” nga tsun dan wa ai re.
Ya Majan byin taw ai Malang Dung mare Nawku jawng hta Mawmaw Bum mare masha ni sa hprawng yen taw ai shara rai nna, ya ten dai hpyen yen mung shawa ni Nam Mahpyit de yawng bai htawt sit sai nga dai ginra na Hpyen yen ni hpe woi awn zinlum taw nga ai, Hpung magam gun wa tsun ai re.
“Malang Dung Nawku Jawng kaw gaw, Mawmaw Bum Hpyen yen ni nga ai rai nga ai, Myen ni shang wa ai majaw, Mawmaw bum hpyen yen ni mung Nam Hpyit de yen sai,” nga tsun ai.
Dai Myen Hpyen hpung ni gaw, Malang Dung mare de October praw 5 ya shana Nawku jawng wang de shang wa na dai shara kaw nga na matu tsun jahta ai kaw, Nawku hpung na ni n hkraw ai majaw, Hpaji jawng wang de bai htawt sit mat ai lam chye lu ai.
Ya ten Malang dung mare makau grup yin Company wang shara makau grup yin ni hta, Myen Hpyen dap Pyithutsit the KIA PDF dap ni laja lana gasat poi matut byin nga ai re.
Malang Dung de shang wa ai Myen Hpyen hpung ni gaw, Seng Tawng maga de shang na matu dai lam hku na lung wa ai masa re nga, ginra masha langai tsun maram da ai re.
Hpakant ginra hta ya ten Myen hpyen dap hpyen n gun kaba the shamu nga nna, Hpakant ginra kaw mung ra lata poi lu galaw hkra shakut taw nga ai mung rai nga ai.
