Sinli Mare Hpe Myen Hpyendap Nbungli Hte Gap Bun Ai Majaw, Mungshawa Marai 20 Jan Si

Mungmyit sinli, Sinli mare shara mali daram hta Myen hpyendap nbungli hte wa gap ai majaw mung masha marai 20 jan asak si hkrum wa nna hkala sawng ai ni mung law ai hpe chye lu ai.

July 18 ya shana hking 5 daram aten Sinli gat grup yin nbungli hte laja lana wa gap ai majaw, mung masha si hkala hkrum ai re nga nna, Sinli kawa la langai KNG hpe tsun dan wa ai re.

“ndai laman Tingni hpe Myenhpyen dap gaw nbungli hte ding yang wa gap nga ai. mana wa gap ai gat makau grup yin masha law nga dik ai shara kaw wa gap ai majaw mung shawa grai law hkra si ai. kade daram re ngu hpe tsawm nchye lu shi ai. raitim mung marai 20 jan gaw n-yawm ai”tsun dan ai re.

Ya ten Sinli ginra ting ngu na daram Ph-Intrenet line ni nlu mat ai majaw, Sinli mare kata mabyin masa lam tup hkrak chye lu na yak hkak nga ai re.

Sinli dingda maga, Lashio mare makau grupyin hta Myen hpyendap hte Kokang dap MNDAA lapran gasat gala majan byin ai raitim, nkau shara ni hta gaw majan byin ai lam n nga ai sha Myen hpyendap maga nbungli hte wa gap bun taw nga ai re lam chye lu ai re.

Lai wa sai July 15 ya shani hta mung Sinli mare kata nbungli hte gap hkrum nna, mung shawa dum nta, madaw ni hten za hkrum ai re.

Bai nna July 14 ya shani hta mung, Kokang dap ni madu up da ai Laukai de, nbungli the wa gasat ai mabyin hta mung masha langai si hkrum wa nna, marai 10 daram hkala hkrum wa ai re.

Myen hpyendap hte rawt malan hpung ni hku nna, mung masha hte ni kahtep ai hku nna, n nga na matu ginra masha langai matut tsun hpyi shawn ai re.

“Myen hpyendap hpyen zai ladat gara hku rai nga ai ngu hpe anhte atsawm chyelu ga ai. Kokang dap maga na masa lam gaw Kunlung, Tingni, Lashio ndai shara ni hpe n-gun dat taw ai hpe mu lu ai. dai majaw hpyen majan gaw ndai hta grau sawng wa mai ai. laknak hpai uhpung ni hpe tsun mayu ai gaw mung shawa hte ni gahtep nna n-nga na matu tsun mayu ai.dai nrai yang mung masha ni hpe shingna hpyi jaw ai hku byin nga ai. tsun mayu ai gaw mung shawa hte ni gahtep nna n-nga na matu hpyi shawn mayu ai” nga nn tsun hpyi shawn da ai re.

Ya ten Lashio hte Sinli lapran hta Myen hpyendap hte Kokang MNDAA dap ni majan matut byin nga ai rai nna mung shawa law malawng gaw Wa mung maga de mung hprawng koi yen nga ai re.

Lai wa sai July 14 ya shani, Lashio majan hpe nhtoi 4 ya jahkring na re lam, Kokang dap maga ndau dat ai raitim Myen hpyendap maga Kokang dap up ai shara ni de nbungli hte wa gap bun ai re.

Lashio majan majaw ginra mung masha yawng ngu na daram Mandaly, Tawnggyi, Kutkai zawn re mare kaba de law malawng hpyen koi yen nga ai re.

By – Naw Htoi (Hugawng)