Tag Archives: shanglawt

Shiga

KIA Hpakan Ningtau Dap Up, n nga mat

Leave a comment

Hpakan KIA Dapdung 6 a Ningtau Dap Up Marip Brang Ja gaw machyi sawng nna August praw 2, Laban Ya shani, n nga mat ai lam, Hpakan KIA shiga lawk tsun ai.

KIA Dapba 9 npu Dung 6 2ic (second in command) Marip Brang Ja gaw tsirung kaba de sa wa ai lam kaw n nga mat ai re lam, matut chye lu ai.

Sai rawt hte Hkali kumla machyi kaba sawng ai ten tsirung sa wa ai lam lapran n nga mat ai re nga, tsun ai re.

Grau nna, mare kaba hte tsan ai shanglawt hpyendap ni hta magam gun ni machyi kaba sawng wa na n lu sharang ai madang du jang she tsirung lu sa ai masa re lam hpe sagawn chye lu ai.

Shiga

Myen-KIA gasat gala lam, Jinghpaw Mungdaw de byin wa

Leave a comment

Bilateral gap hkat jahkring jahkrup nga dingyang ladaw, Myen hpyendap hte KIA gasat gala majan lam gaw Jinghpaw Mungdaw ga-ang hta June 29, bat Langai Ya shani, byin hpang wa sai.

Wunpawng Mungdan Shanglawt Hpyendap, KIA Dapba (8) npu Dapdung (5), Ga Hkyeng Bum ginra de Myen hpyen hpung lahkawng htu shadut shang wa ai majaw, La Mai Yang kaw aten minit 30 daram hkrum katut gap hkat lam byin wa sai nga, KIO shiga lawk tsun ai.

“Myen ni gaw dai kaw htu shadut shang wa ai majaw aten kadun gasat poi byin ai.  Laja lana gaw n re. Tinang KIA dap ni bawm 2 lang, 3 lang kapaw rai, gap mung loi gap rai nna yen kau da ai,” nga nna KIA hpyendu langai tsun ai.

KIO The Kachin Net June 29 shiga hta, “gasat gala byin ai gaw KIA Masat (5) Dap Dung ginra kata de htu shadut nga ai Hk.M.Y (389) hpyen hpung ni hpe hpyen garum sa wa ai Hk.L.Y (237) hpyen hpung hpe KIA hpyen hpung ni hkap shingla gasat ai majaw byin ai re” nga tang madun ai.

June 22 hta mung, Loije makau Myen-Miwa ga jarit lam langai kaw hkap sin ai KIO COVID-19 ana zinli jep chyam shagyit hpe Loije Myen hpyendap ni wa hpya jahten kau ai majaw, dai shani KIA Dung (1) hte ganoi gap hkat na zawn hpyen masa shaja hkat wa sai re.

Ndai shata praw kaw nna, Lahta Sammung KIA dap ni gaw Myen hpyen ni a hkan tam majan baw gasat hkrum hpang wa ai re. Myen Tat-ma (88) hte (99) pawng hpawm hpyen hpung ni hte KIA dap ni gaw, Muse ginwang Htan Hpa Bum kaw June 6-7 hte, Kutkai ginwang Kaleng ginra hta gaw June 16 kaw nna 21 ya du hkra, gasat gala majan ni byin wa sai re.

Mungdan kata COVID-19 ana zinli makawp ninghkap lamang galaw nga ten, tatmadaw gaw jahten sharun hpung ngu masat tawn ai, Rahkai AA hte byin nga ai majan hta lai, ngam ai rawt malan hpung ginra ma hkra kaw, May (10) kaw nna August (31) du hkra majan jahkring tawn ai lam, May (9) hta ndau dat sai rai nga ai.

Raitimung, tatmadaw gaw Lahta Sammung kaw ‘ginra jasan’ galaw ai shaloi KIA hte ‘hkrum katut gasat poi’ byin ai lam tsun ndau ai gaw n jaw ai hte, kaja wa gaw masing nga nga hte galaw ai ‘htu gasat majan’ she re nga nna, Laiza KIO Shiga Magam Dap lithkam, Du Kaba Nhpang Naw Bu, dinglun ai re.

Shiga

Laban nhtoi htoi ai hte rau, Myen hte KIA bai gap hkat

Leave a comment

Mana gap hkat ai Lahta Sammung KIA Dung (9) ginra kaw Myen asuya hpyen hpung bai lung wa ai majaw, daini June praw 7, Laban jahpawt nhtoi htoi ai hte kalang bai gap hkat nga sai lam chye lu ai.

Jahpawt jau hkying 6:40 daram hta KIA Dung (9) ni nga ai shara de Myen hpyen ni mayun lung wa ai kaw bawm langai wa kabe kapaw la ai kaw nna KIA hpyen hpung hte gap hkat nga sai re lam na chye lu ai.

“Mana gap ai kaw wa rawng taw na dai hpawt loi myi mu san ai hte amya pru wa ai kaw bawm wa kabe kapaw la rai nna dai grupyin kaw sha naw gap hkat taw nga ai,” nga nna KIA Dapba (6) hpyendu langai Jinghpaw Shiga Dap (KNG) de tsun ai.

Mana de hkying 7 jan ten, KIA Dapba (6) npu Dapdung (9) ni nga ai, Muse ginwang Htan Hpa Bum, Layan Kawng de Hu Hpyet de na dap mying n chye ai ai Myen asuya hpyen hpung langai lung wa ai hpe KIA Dung (9) ni shingla gasat ai kaw nna numdaw 2 lang gasat gala lam byin ai re.

Tatamadaw Myen asuya dap gaw, jahten sharun hpung ngu masat tawn ai Rahkai AA ni nga ai ginra hta lai nna mungdan ting madang August 31 du hkra hpyen majan jahkring ai lam ndau tawn tim Lahta Sammung de gaw KIA a Jinghku dap Balawng TNLA hte Kokang MNDAA ni hpe mung htu shadut htim gasat ai lam ni dingyang galaw nga ai re.

Shiga

Myen asuya dap sa gap zing ai KIA D-17 na arung arai sumla pru

Leave a comment

Lai wa sai bat, lahta Sammung KIA Dapdung (17) training dabang langai hpe maja sa gap zing ai kaw nna lu la ai arung arai sumla ni, ndai bat pru wa ai re.

Dingdung Daw Daphpawm kaw nna pru wa ai sumla hta, sinat, machyu pala, bawm, hkepdin, nba, lusha jarik hte kaga arung arai ni hpe mu lu ai re.

Wunpawng Mungdan Shanglawt Hpyendap (KIA) Dapba (10) npu, Dung (17) a hpyen training dabang hpe Sinli kaw nna lung wa ai Nam Jarawp-Kunlong lam, Gang Mung hte Loidau lapran, shara jahkrat galaw ai re.

Marai 50 daram rangrut la nga ai dai dabang hpe ‘Myen hpyendap gaw Kokang hte Balawng dap ni hpe she sa tam gap ai, tinang KIA hpe n sa gap na re’ ngu, ‘duty’ n la ai sha nga nga ai ten, Dapnu (tat-ma) 99 hpung ni, January praw 8 ya shani sa htim gap zing kau dat ai re.

Raitim dai sa gap ai ten, rangrut la ai masha yawng gan hkring nga ai aten ang mat ai majaw masha hkala nba n nga ai nga, Lahta Sammung KIA shiga lawk tsun ai re.

 

Majan Shiga, Shiga, Simsa lam

KIA Dung (17) training dabang hpe Myen asuya dap ni sa gap

Leave a comment

January praw 8, bat Masum Ya shani, Lahta Sammung Wunpawng Mungdan Shanglawt Hpyendap (KIA) Dapdung (17) a training dabang hpe Myen asuya dap ni, maja laknak kaji kaba ni hte, gap bun ai lam chye lu ai.

Raitim training dabang hta masha gan n nga ai aten re majaw si hkala shiga gaw n na nga ai lam, Lahta Sammung KIA du kaba langai tsun ai re.

“Training dabang kaw pyi laknak kaba si 4 ram hkrat ai hku rai nga ai.  Raitim dai ten shanhte Myen ni wa gap ai aten wa..dai shanhte Dung (17) ginwang ni nga ai yawng gan hkringsa ai aten re majaw hkala nba gaw hpa n nga ai nga nna tsun wa ma ai” nga ai.

Dai shara gaw, Sinli kaw na lung wa ai, Nam Jarawp hte Kunlong lapran, mawdaw lam makau Gang Mung hte Loidau lapran shara kaw re nga tsun ai.

Asuya dap ni gaw KIA jinghku dap, Balawng TNLA hte Kokang MNDAA ni hpe sha hkan gap taw ai re majaw tinang dabang hpe n sa gap na re ngu nna shimlam n la da ai ten, ya na zawn byin pru ai lam mung re.

“Dai kaw shanhte gaw duty ni n la na Myen ni tinang hpe n gasat sai…nga nna she shanhte mung dai kaw duty n la nga taw nga ai kaw makau de du wa nna she jak sinat laknak kaba ni hte chyawm ra mi wa gap bang ai da” nga nna lahta na KIA du kaba wa matut tsun ai re.

Dai zawn gap hkrum ai majaw, dai Wunpawng Mungdan Shanglawt Hpyendap (KIA) Dapba (10) npu Dapdung (17) a hpyen training dabang hpe yen kau sai lam chye lu ai.

 

Shiga

“Jinghpaw Mungdaw” mying n galai na KIO matsun

Leave a comment

“Jinghpaw Mungdaw” ngu ai ginru ginsa mying hpe n galai kau ai sha matut lang na matu Wunpawng Mungdan Shanglawt Hpung, KIO Ginjaw Komiti a ndau hte matsun dat sai re.

Myitkyina Wunpawng Htunghking Hpung Ginjaw (WHG) gaw “Jinghpaw” n lang ai sha “Mungdaw” nhtoi ngu nna, du na 2020, Jan. 10, Jinghpaw Mungdaw Nhtoi Manau poi galaw na ndau tawn ai majaw, mungdan kata shinggan laja lana dinglun ai lam ni pru nga ai re.

Dec. 22, KIO Ginjaw Komiti a ndau hta, “Jinghpaw Mungdaw Masat Nhtoi hte seng nna, 1948 ning January shata (10) ya kaw nna masat shamying da sai hpe gara Asuya, gara Rung kaw nna mung gram galai kau ai lam garai n nga ai majaw, shawng e masat shamying tawn ai hte maren naw lang na” nga matsun tawn ai re.

Maning mung, WHG gaw “Kachin” Mungdaw ngu ai mying hte (71) ning hpring Jinghpaw Mungdaw Nhtoi Manau poi galaw na shakut wa yu sai raitim, ninghkap ai lam pru wa ai majaw bai dawm kau yu sai re.

Dai ning matut nna bai, “Mungdaw” nhtoi ngu nna galaw na dan dan leng leng ndau shabra ai majaw WHG gaw laja lana dinglun hkrum nga ai sha n ga, bawsang amyusha ni lapran manghkang byin pru wa na madang de du wa nga sai re.

Myen hte Inglik ga hku nna “Kachin State” ngu ai mying jai lang nga ai gaw manghkang n nga tim, tinang Jinghpaw ga hte “Jinghpaw Mungdaw” ngu lang ai hpe WHG gram mayu ai lam rai nga ai re.

Dai re majaw, mungdaw mying nhkan bawsang manghkang n byin pru u ga, Wunpawng Mungbawng Rapdaw (WMR) hte simsa lam akyu galaw hpung Peace-talk Creation Group (PCG) yan kaw nna htunghking hpung ni hpe lawan ai hku sanglang jahpra dan na matu KIO Ginjaw gaw, dai wuhpung lahkawng hpe lit jaw dat sai re.

Shiga

Myen ni sinat kaba gap ginjang ai majaw, KIO masat nhtoi n lu galaw

Leave a comment

Lahta Sammung KIA Dapdung (8) ni KIO masat nhtoi galaw na hkyen da ai mare de Myen hpyen hpung ni lung wa nna laknak kaba manu mana gap ginjang ai majaw, lamang n lu galaw byin mat ai lam, mare masha ni hku chye lu ai.

Oct. 25 ya shani ang ai (59) ning hpring Wunpawng Mungdan Shanglawt Hpung (KIO), masat nhtoi lamang hpe Namtu ginwang Bang Gaw mare kaw galaw na Dung 8 ni hkyen da ai re.

“Dung 8 ni gaw shanhte dai KIO masat poi galaw na mare de Myen ni laknak kaba nau gap bang ai majaw poi n lu galaw la mat ai. Mare masha ni yawng hprawng mat ai majaw” nga nna Lahta Sammung KIA shiga lawk tsun ai.

Myen hpyen hpung ni gaw Oct. (23) kaw nna KIO masat nhtoi galaw na Bang Gaw mare de htu chyawm wa nhtawm, masat nhtoi shani n du shi yang, dai mare de sinat kaba gap bang ai re lam, matut chye lu ai.

KIO Ginjaw Komiti tingnyang up, Dukaba Nban La a masat nhtoi mungga hta gaw, “Hpyen wa hte gap hkat jahkring da nhtawm hpyen yen mungshawa ni hpe tinang a buga de nhtang wa nga lu na matu shakut nga ai lam” ndau ai re.

1960, Oct. 25 ya shani, dai ten “Jinghpaw Mungdan Shanglawt Hpung” ngu ai, Kachin Independence Organization hpe Lahta Sammung, Lashio mare kaw Yangon Jinghpaw Wunpawng dakkasu jawngma ni woi hpaw ai re.

Shiga

Myen ni sa wang gap ai kaw KIA tsi sara hte hpyenma, asak ap nawng

Leave a comment

Jinghpaw mungdaw ga-ang KIA Dapdung (5) Hkawng Mye ginra, tinang Awng Jat post hpe, ndai bat pru de, Myen asuya dap ni sa wang gap ai kaw tsi sara langai hte hpyenma langai, asak ap nawng mat wa sai lam, KIA shiga lawk tsun shateng ai.

Bat Langai Ya, Oct. 14, jahpawt daw dai ginra de wuhpung lahkawng dap lapran ‘hkrum katut’ gap hkat ai lam ni byin wa ai hpang, ya na zawn marai masum gan du nga ai Awng Jat post sa wang gap hkrum ai re nga, san sagawn chye lu ai.

Ya asak ap nawng mat wa sai magam gun yan gaw, Awng Jat post kaw hkum n pyaw ai lat du langai hpe yu lajang na nga nga ten, shana de hkying 5pm daram ten Myen hpyen hpung ni maja sa wang gap ai kaw hkrat sum mat ai raitim machyi ai lat du wa chyawm gaw asak lawt mat ai lam, KIA shiga lawk tsun ai.

Dai shani jahpawt daw, Hkawng Mye ginra Ku-Ing-Su post maga asuya dap Dapnu (Tat-ma) 101 hte Lagaw Dap (Hk.L.Y) Masat (141), pawng hpawm dap hte KIA Dung (5), Mungshawa Hpyen Hpung (MHH) lapran aten kadun ‘ang katut’ gap hkat ai lam byin ai re.

Ndai post gaw, Jinghpaw mungdaw ga-ang Mungnyang (Mohnyin) ginwang, Nawnglut (Indawgyi) a dingda maga Wunpawng Mungdan Shanglawt Hpyendap, KIA Dapba (8) npu Dapdung (5) ginra re.

Jinghpaw mung hte Sam mung hta 2018 December 21 kaw nna tatamadaw Myen hpyendap a dinghkrai majan jahkring tawn ai hpe lang hte lang ladaw bai jat ai gaw, lai wa sai September 21 hta htum mat sai re.

Jinghpaw mungdaw kata majan hkring mat ai shata (9) jan na ai hpang, ya kalang bai Myen hpyendap hte KIA lapran gasat gala majan ni bai byin wa ai lam rai nga ai.

Shiga

Myen hte KIA Jinghpaw mungdaw e bai gap hkat

Leave a comment

Myen hpyendap a dinghkrai majan jahkring da ai ladaw shata 9 htum ai hpang, kalang bai Wunpawng Mungdan Shanglawt Hpyendap (KIA) hte Jinghpaw mungdaw e gasat gala majan ni, ndai bat hpang wa sai re.

Oct. 14, bat Langai Ya jahpawt hta, Mungnyang (Mohnyin) ginwang KIA Dapba (8) npu Dapdung (5) ginra Hkawng Mye mare makau tinang Ku-Ing-Su post hte Awng Jat post ni hta Myen hpyen hpung hte ang katut gap hkat ai lam ni byin ai lam, KIA Dapba (8) shiga lawk tsun ai re.

Myen Dapnu (Tat-ma) 101 hte Hk.L.Y masat (141) pawng hpawm hpyen n-gun 80 daram gaw, Nawnglut (Indawgyi) a dingda maga nga ai, KIA Dung (5) ginra de shang wa ai majaw, Ku-Ing-Su post kaw jahpawt daw hte dai hpang shana daw Awng Jat post kaw bai gap hkat ai lam ni yawm dik 3 lang byin ai lam, KIA Dapba (8) shiga lawk tsun ai.

Gasat gala byin ai shara de grupyin na Myen hpyen n-gun ni kahtap jat du wa ai majaw matut nna gap hkat lam ni byin wa na masa nga ai lam, kahtap chye lu ai.

Ya gasat gala majan byin ai ginra hta, ja maw ni nga nna maisak hte ta-malan hpun hpaga bungli ni mung nga ai hpe sagawn chye lu ai.

Ndai gasat gala lam a majaw, Myen asuya hte galaw nga ai bilateral gap hkat jahkring bawngban nga ai lam mahkrun hpe ahtu hkra na kun?

“Ning rai na hkrum katut majan gasat hkat timung e dai hkrum zup bawngban ai lam hpe gaw hten run wa madang gaw n nga na re” nga, Laiza KIO Shiga Htawn Shana Magam Dap lit nga, Du kaba Nhpang Naw Bu tsun ai.

2018 December 21 kaw nna Sam hte Jinghpaw mungdaw lahkawng kaw Myen hpyendap a dinghkrai htim gasat majan jahkring ai lam gaw September 21 hta ladaw htum mat ai re. De a lachyum gaw asuya dap kaw nna rawt malan hpung ni hpe aten n tam majan baw gasat mai ai masa re nga nna, Myitkyina daju PCG simsa lam lapran salang Duwa Lamai Gum Ja tsun ai re.

Gap hkat jahkring na matu KIO maga jin jin masa rai timung, maga mi de asuya hte tatmadaw hpyendap lapran n hkrum ai majaw, sen htu lu na madang gaw naw yak na masa re nga, Laiza na KIO ginjaw salang ni tsun nga ai re.