Tag Archives: Sezin

KIA Dap ba 9 npu dap dung 6, 26, 44 shara ni hta Myen hpyendap hpe kalang ta htim gasat

Nawng Lut, Kamaing ginra hkan na Myen hpyendap shara 4 hpe Wunpawng Mungdan Shanglawt Hpyendap KIA Dap Ba 9 ni dai hpawt maga kalang ta sa htim gasat ai lam chye lu ai.

Nawng Lut Ginwang, Sezin mare makau Shwe Twi ngu ai Myen hpyen dap shara, Namlik Hka makau na SNA dap, Kamaing Myen hpyen Byuha kawng, Nam Sheng Myen hpyen dap ni hpe Wunpawng Mungdan Shanglawt Hpyen dap KIA Dapba 9  ni sa him gasat ai re lam chye lu ai.

January 26 ya jahpawt jau hkying 4 chyen daram aten, Seng Zin mare makau Myen hpyen dap hte Samhkyeng SNA dap ni pawng hpawm na nga ai Shwe Twi dap hte, Namlik Hka makau na SNA dap ni hpe KIA Dung 26 dap ni sa htim gap gasat zing kau lu ai lam shawng lam hpyen shi sawk ni kaw na chye lu ai.

Dai shara sa htim gap gasat ai hta, sinat laknak machyu pala alaw alam zing la lu ai rai nna, lahkawng maga kade daram sum machyi ai ngu hpe gaw tup hkrak n chye lu ai re.

Matut nna, Kamaing Myen hpyen byuha kawng hpe KIA Dapba 9 n pu Dung 44 ni laknak kaba ni hte sa htim gap ai hpang, lahkawng maga gasat gala byin wa ai lam chye lu ai.

Dai hpawt manap jau hkying 4 ram aten sa htim gap gasat wa ai rai nna, lahkawng maga sum machyi lam nga n nga re hpe gaw a tsawm tup hkrak n chye lu ai.

Kamaing Myen hpyen byuha dap a dap lakung langai rai nga ai, Nam Sheng mare kyuhpyi bum hta dap jung taw nga ai Myen hpyen dap ni hpe mung dai hpawt manap hkying 6 ram ten KIA Dung 44 hte PDF pawng hpawm dap ni sa htim gap gasat wa ai lam nga ai re hpe ginra masha ni kaw na chye lu ai.

Dai Nam Sheng Myen hpyen dap hpe sa htim gap gasat wa ai rai yang, mare yawng nat jahten kau ya na lam, Myen hpyen dap gaw mare salang hte nawku hpung ningbaw ni hpe tsun shadut da ai mabyin nga ai majaw, ya ten ginra mung mare masha ni myit tsang taw nga ai  chye lu ai.

Hpakant lam shara shagu hta majan byin wa ai majaw, dai hpawt manap jau Myitkyina Hpyen n bungli pa hta n bungli shamu shamawt wa ai lam ni nga wa ai re hpe Myitkyina Maw Hpawng ginra masha ni tsun dan ai re.

Wunpawng Mungdan Shanglawt Hpyen Dap KIA Dap ba 9 n pu hta, Dap Dung 6, 26, 44, ni lawm ai rai nna, dai dap dung ni yawng kalang dat majan hpaw wa ai lam mung rai nga ai.

Myen Hpyen Dap hte Sam Hkyeng Dap ni Pat da ai Sezin Mare Masha ni hpe bai dat ya

Nawnglut ginwang, Sezin mare hpungkyi jawng kaw pat hkrum taw ai mung shawa ni, dai hpawt August 11 manap lawt wa lu nna, Tamahkan, Hawng Pa, Nat hka htung mare hkan hprawng shingbyi nga lu sai lam garum katum hpung ni kawn chye lu ai.

Myen hpyen dap ni August praw 9 ya shana kaw na, nbungli hte mare kata bawm wa jahkrat, mung shawa ni a n ta nat jahten ai lam ni galaw nna, mung shawa ni hpe mung gara de n pru shangun ai sha, Hpungkyi jawng kaw mahkawng bang da nna,  jahkrit shama hpyen ning gang shatai wa ai kaw na lawt pru wa lu ai re lam chye lu ai.

Kawsi hpang gara, jahkrit shama re ai shara kaw na lawt lu mat ai re lam ginra masha langai n dai zawn tsun dan ai re.

“Myen hpyen dap ni matut sharawng da ai rai yang jaw sha na n nga sai gaw, mare ting mung wan nat kau sai rai, mari sha la sha na shara n nga sai, gara kaw na mung n chye la jaw sai, dai majaw dat dat ya ai” nga tsun ai re.

Raitim, mare kaw naw pat hkrum taw ai ni naw nga ai zawn, ya hprawng pru wa ai ni mung hkyep din pyi n lawm ai, hkala hkrum ai ni mung nga nna, dai hpyen yen ni a matu tsi mawan, malu masha ni garum ningtum hkyak hkyak ra nga ai lam, hpyen yen yu kawn ni tsun ai.

Ya ten dai hpyen yen mung shawa ni gaw, Hawng Pa hpungkyi jawng hta marai 500 jan, Tamahkan Mashalet jawng hte lahta tsang jawng ni hta 500 jan, နတ်ရေတောင် mare hta marai 200 jan hprawng shing byi taw nga nna, matut du wa na naw nga ai lam chye lu ai.

Sezin Mare de Nbungli Wan Bawm Gap Hkrum nna, nta 400 jan hkru, mare masha si hkala ai lam law

Majan laja taw nga ai Sezin mare kata, mana August 9 ya shana e, Myen hpyen dap hte Sam Hkyeng SNA pawng hpawm dap ni, nbungli hte gap bun nna, mung shawa 30 jan si nhtawm, nta 400 jan mung nat jahten kau hkrum wa sai lam Sezin ginra masha ni kawn chye lu ai.

Mana maga hkying 1 ram aten hta, Wunpawng Mungdan Shanglawt Hpyendap KIA hte Mung Shawa Makawp Maga Dap PDF ni, Sezin mare Myen hpyen balik dap hpe sa gap gasat wa ai ten, n bung li du wa nna, n bungli 2 hte numdaw 3 lang sa gap bun wa ai majaw, dai mare hta nga ai mung shawa n kau si hkala hkrum nna, nkau pat hkrum taw nga ai lam ginra masha ni tsun wa ai.

“ Shawng ningnan hkying 8 ram aten hta n bung li wan bawm hte sa jahkrat bun ai, dai kaw na wan hkru hpang wa ai, dai wan hkru ai hpe mung shawa ni hka chyup jak sharawt nna, jawm sat kau lu ai.  Dai hpang hkying 9 ram a ten Sagaing maga de na hpyen n gun lung wa ai. Myen hpyen hpung hte SNA dap ni mare de shang wa nna, n ta langai hpang langai wan nat hkawm taw nga ai, mu ai mung shawa ni hpe mung gap sat taw nga ai, si ai tsawm ra law sai ” ginra masha langai tsun ai.

Ya ten dai mare na mung shawa n kau mare kata hpung kyi jawng ni hta hprawng shing byi jawng taw nga ai raitim, Myen hpyen dap kaw na gara de mung n pru shangun ai sha, hpyen ninggang shatai tawn da ai lam ginra masha ni matut tsun dan ai re.

KIA dap ni kaw na Myen hpyen dap hpe bai matut sa htim gap gasat wa ai rai yang, dai mare kaw nga ai mung shawa ni yawng hpe gap sat kau na nga mare masha ni hpe tsun jahkrit wa ai lam chye lu ai.

Ya ten mung shawa 200 hkawt gaw, gara de mung n sa shangun ai sha, Myen hpyen dap ni yu sin, jahkrit shama hkrum nga ai lam mung shawa langai matut tsun dan wa ai re.

“ Mi sha mung kasha hpe tawn malap da ai majaw, kasha hpe wa woi na nga na pru wa ai, pru  wa hte Myen hpyen dap ni du gadoi sat kau ai, gara de mung n pru shangun ai, shan hte sin taw ai,” nga dai ginra na mung shawa langai matut tsun dan wa ai re.

Sezin mare hta ya ten Myen hpyen dap hte Sam Hkyeng SNA pawng hpawm n gun 100 jan dap jung shara jahkrat taw nga ai rai nna, dai na maga de hkying 2 ram aten du hkra mung shawa n ta nat jahten taw nga ai lam matut chye lu ai.

Lai wa sai August praw 8 ya shani dai ginra na Myen hpyen dap hte SNA ni a dap shara lahkawng hpe KIA hte PDF pawng hpawm dap ni sa htim gap gasat zing kau ai hpang, mani shani ka-ang ram aten, Sezin Myen hpyen dap hpe matut sa gap gasat ai ten hta n bung li du wa nna, dai zawn byin hpang wa ai lam chye lu ai.

Ya ten dai mare hta pat hkrum taw nga ai mung shawa ni hpe hkye shaw la na matu hte shan hte a matu malu masha garum ningtum lam ni mung ra ahkyak taw nga ai lam chye lu ai.

Sezin Mare de,  Myen hpyen dap ni nbungli hte bawm wa htim gap gasat lawm

Nawnglut Ginwang Sezin mare de, Myen hpyen dap ni Jet Fighter nbung li hte dai ni August 9 ya shani, lahkawng lang da bat sa gap bun taw ai majaw, grup yin nga mung shawa ni dumbru dumbra hprawng yen taw nga sai lam ginra masha ni tsun wa ai.

Sezin Myen hpyen balik dap hpe Wunpawng Mungdan Shanglawt Hpyendap KIA hte Mung Shawa Makawp Maga Dap PDF ni sa htim gap gasat nga ai ten, n bungli du wa nna, mare makau grup yin hkan bawm bawm sa jahkrat kau da ai zawn, shana maga mung kalang sa gap bun mat wa ai lam ginra masha langai KNG shiga dap de ya na zawn tsun dan ai .

“Dai ni shani ka ang Balik dap makau grup yin de sinat kaji kaba ngoi hpang wa ai, dai hpang n bungli lahkawng pyen du wa nna, mare ka kata makau grup yin ni hta n bungli bawm 10 lang jan gap jahkrat kau da na bai n htang mat ai, dai na maga hkying 3 ram hta kalang bai sa gayin gap mat wa ai, mung shawa ni hta si hkala ai mung nga na re, ya a tsawm tup hkrak n chye tsun shi ai, dumbri dumbra she naw hprawng ayai jawng taw ai,” nga ai.

Dai zawn n bungli hte sa htim gap gasat ai hta mare kata mung shawa ni si hkala ai lam nga ai rai tim, dai ginra hta Phone matut mahkai n lu ai majaw, a tsawm tup hkrak n chye lu shi ai re.

Mani August praw 8 ya shani, Sam Hkyeng hpyen dap SNA hte Myen hpyen dap hpe sa htim gap gasat hpya kau ya ai hta yawm htum marai 20 ram si hkrum ai majaw, ya na zawn nbung li hte bai wa gap bun wa ai lam rai nga ai.

Lai wa sai July shata kaw na Sezin ginra hta Myen hpyen dap hte Sam Hkyeng dap SNA ni pawng hpawm nna, KIA hte PDF hte majan gap gasat wa ai gaw, dai ni ten du hkra rai nga ai re.

Sam Hkyeng SNA dap ni kaw na Myen hpyen dap hte pawng hpawm ai lam n nga ai nga, Sam Hkyeng Shiga dap ( The Voice of Shanni ) kaw galoi mung tsun ningdang taw nga ai raitim, n dai kalang na majan hta sakse hte hkrak Myen hpyen dap maga de pawng hpawm gasat taw ai mu lu ai lam chye lu ai.

Sezin mare kata, Myen hpyen dap ni matut dap jung da majaw, mare masha 400 jan matut hprawng yen ra

Nawng Lut Ginwang, Sezin mare majan a majaw, Hpakan mare kahtawng hkan, dumbru dumbra hprawng yen hkawm taw nga ai Sezin hpyen yen ni marai 400 jan gaw, mare kata Myen hpyen dap ni matut dap jung shara jahkrat nga taw ai majaw, tinang mare buga de bai n htang wa na hkrit tsang ra nna, yak hkak hkrum nga ai lam chye lu ai.

Lai wa sai July 18 ya shani kaw na, Sezin mare kaw Myen hpyen dap hte Wunpawng Mungdan Shawnglawt Hpyen Dap KIA lapran, laja lana gap gasat hkat wa ai majaw, Hpakan Tamahkan, Hawng Pa hte Nat Hka Htung  mare ni hkan hprawng yen nga ai lam Sezin mare masha ni kawn chye lu ai.

Hpyen yen mung shawa langai tsun ai gaw, “Anhte hpyen yen ni gaw July 21 ya shani kaw na hprawng yen pru wa ai, dai ni nga yang n htoi 10 ya jan sai. Ndai laman mare maga de gap hkat ai lam n nga, majan zim taw ai rai tim, mare kata myen hpyen dap ni naw nga ai majaw, an hte n-gwi wa ai. Mare kata hta nga ai mung shawa ni hpe mung gara de n sa shangun ai nga tsun ai. Myen hpyen dap ni shan hte mare kata na yawng pru mat ai hpang she anhte bai n htang wa na re.”

KIA hte PDF maga de na mung mare de rai n wa shi na lam tsun sadi jaw da nna, mare de bai n htang wa ai ni nga ai rai tim, mare de n shang shangun ai sha bai nhtang kau shangun taw lam matut chye lu ai.

Ya ten, Tamahkan KBC nawku jawng wang hta marai 49, AG Nawku jawng wang hta marai 21, Ma shalet jawng wang hta 165, Nat Hkahtung mare na hpungkyi jawng hta marai 60, Hawng Pa mare na hpungkyi jawng hta 100 jan hte jinghku jing yu n ta hkan 50 jan rai nna shingbyi nga ai lam chye lu ai.

Matut nna mung, hprawng koi yen nga dingyang re majaw, hpyen yen jahpan jat nga dingyang rai nna, dep hkap ai hku lahkawn lamawn hte garum jaw ya taw ai raitim, aten galu na wa yang, garum ningtum mung ra ahkyak taw ai lam tsun ai re.

Sezin mare hta masha jahpan 2000 jan nga ai rai nna, ya ten dai mare hta nga ai mung shawa marai 1000 jan hpe Myen hpyen dap ni kaw na gara de mung n pru shangun ai lam dai ginra na mung shawa ni matut tsun wa ai.