Tag Archives: Nba Pa

Shiga

Lana Zup Ja hpyen yen (3), N’hprang Wan N’ga nhkun kaw n sa chyat si

Leave a comment

COVID-19 ana zinli ladaw pat da ten, Nba Pa n’hprang wan n’ga nhkun de wan n’ga sa lagu na shang ai Lana Zup Ja hpyen yen 2 nsa chyat si rawng ai hpang, shan a moimang wa shaw ai kaw marai 1, kahtap si ai lam ndai bat matut manoi byin wa sai re.

Wunpawng Mungdan Shanglawt Hpung, KIO Sinpraw Ginwang Ginjaw, uphkang ginra Nba Pa, Man Seng mare na N’hprang Wan N’ga nhkun dingsa kaw July praw 2 hte 3 ya shani ni hta byin wa ai lam rai nga ai.

Shawng shani, IDP hpyen yen marai mali gaw dai nhkun de n’hprang wan n’ga, hte n’hprang nhkun hta lang ai hpri daw hpri chyen ni hte wan pu wan sumri ni sa lagu shaw na sa wa ai re. Shaloi, marai lahkawng, Slg. Lahpai Awng Mai hte Slg. Labang Naw yan gaw jahpawt hkying 11am ten nhkun shang ai hte jang Oxygen nsa n nga ai majaw dai shara hta lahkawng yan si rawng mat ai.

Dai hpang, hpang shani, n’hprang nhkun hta si rawng nga ai hkum tsawp moimang lahkawng hpe wa saw la na matu masha n-gun 6 hte sa wa ai kaw, marai langai bai kahtap si hkrum ai re lam, hpyen yen ni hpe lakap let chye lu ai.

July praw 2 ya shana hta sha, Nba Pa Ginwang daw, Mai Bat Ninghtawn, Gai Daw mare hta mung, mare uphkang rung Chyare Langzing Tang Gun hte rau nta masha yawng (5), dum nta kaw kahtam sat hkrum ai re.

Bai nna, dai shani sha, jahpawt daw hkying 6am jan, Hpakan, Gwi Hka maw kaw nhkun gyi kaput ai kaw, daining laman si hkala law dik, July 3 hta lu shaw ai moimang 172 rai nna hkala ai masha (43) nga ai hpe Myen asuya shiga shapraw ai re.

Shiga

KIO Gai Daw mare Chyare wa hte dinghku masha (5), kahtam sat hkrum

Leave a comment

KIO uphkang ai Nba Pa ginwang daw Mai Bat Ninghtawn, Gai Daw mare uphkang rung Chyare Yaku Langzing Tang Gun hte rau, nta masha marai (5) hpe dum nta kaw nhtu hte kahtam sat ai manghkang, July 2, bat Mali Ya shana, byin wa sai.

Asak (13) ning re ai kasha magam langai sha hprawng lawt mat ai raitim nau hkrit nna gari gawa rai byin nga ai lam, na chye lu ai.

Maning, ndai Gai Daw mare a Mare Salang wa sat hkrum wa sai hpang, ya Chyare wa hte dinghku masha ni hpe matut sa sat ai manghkang byin wa ai re.

Sat hkrum ai nta masha ni hta, Jan. Yam Htu, asak (70) jan gumgai, madu jan Moreen Sumlut Htu Nan, hte kasha Langzing San Li Naw hte Langzing Doi San Awng ni re lam, July 3, RVA Kachin shiga hta mu lu ai.

Matut nna, ndai mare hta shawng de sat hkrum wa sai masha yawng (10) jan nga ai kaw—madu jan madu la yan hpe dum nta kaw sa sat kau da ai lam, hte matsan mayan re ai Balawng amyusha hkan nau hpe sat kau ai lam ni— nga lai wa sai hpe seng ang ai KIO daru magam lu ni manghkang langai pyi n lu sawk shapraw ya ai majaw, asuya (KIO) ni lit n lu la ai mare rai taw ai hpe mare masha ni tsun garu nga ma ai re.

Ndai shara gaw Miwa ga jarit hte ni ai hte moi kaw nna daini ten du hkra KIO uphkang ginra rai nna, Gai Daw makau hpai wang kaba (du chyang) hpaw tawn ai majaw shing n rai gumhpraw ra nna lamu ga dut sha mayu ai KIO salang nkau hte lamu ga madu chyauman masha ni lapran, byin ai manghkang kun? nga nna, yu maram ai ni tsun nga ma ai re.

Shiga

Miwa jarit KIO COVID-19 Shagyit hpe Myen hpyen ni sa hpya kau

Leave a comment

Jinghpaw mungdaw sinpraw, Myen-Miwa ga jarit pru-shang lam, KIO COVID-19 ana jep shagyit hpe, Loije Myen asuya dap gaw June 22, bat Langai Ya shani, hpyen hpung hte sa zing hpya jahten kau ya sai re.

Ndai shagyit hta, KIO hkamja dap magam gun ni hte mungmasha tsi magam gun ni nga nna, lai hprang pru-shang masha ni hpe COVID-19, Coronavirus ana kap n kap tsi jep ya ai lam hpe, lai wa sai March shata daram kaw nna galaw nga ai rai nga ai.

“Nang, Loije hte Lana Zup lapran kaw Miwa mung hku nna, nang Nba Pa maga de rap ai lam langai na hka mahkrai gate (shagyit) kaw re. Hkamja dap masha ni dai kaw sa nga ri nga ai. Re yang she, daini (June 22) gaw, nang Loije kaw na Myen ni sa na sa dawm kau, yawng sa run kabai kau ya ma ai,” nga nna shimlam tsang ra ai majaw mying n tsun mayu ai ginra masha langai tsun ai.

Myen mung aten, jahpawt daw hkying 9:30am daram hta Myen hpyen ni ya na zawn galaw nna dai shagyit kaw shana maga du hkra wa nga ai ten, Nba Pa de na lung wa ai KIA Dung (1) hpyen hpung du na mahka bai htingnut ya ai re.

“Myen ni, hpyen hpung hku sa nna sa jahten kau ya ai majaw, htaw KIA Dung (1) na hpyenla ni mung, marai manga kru shi daram lung wa, shana daw de, dai kaw Myen ni gaw shani ting wa nga kau da na htaw ra (Dung 1) ni du n du rai ten hta, bai wa mat ai da”, nga nna lahta na salang wa tsun ai.

Dai shani ganoi ganoi gap hkat wa ai hpang, matut nna hpyen masa jahta hkat ai masa naw re lam sagawn chye lu ai.

Ndai June hta praw kaw nna, Lahta Sammung, Muse hte Kutkai ginwang lahkawng kata KIA dap daju ni hpe Myen hpyen ni sa htim gasat ai lam ni, ndai bat du hkra, galaw nga ai re.

Mungdan kata COVID-19 ana zinli makawp ninghkap lamang galaw nga ai ladaw, May (10) kaw nna August (31) du hkra, jahten sharun hpung ngu masat ai, Rahkai AA hte byin ai majan hta lai, ngam ai rawt malan ginra ma hkra gaw, majan jahkring ai nga nna tatmadaw Myen hpyendap gaw May (9) ya shani ndau sai re.

Myen hpyendap maga, Lahta Sammung e “ginra jasan” galaw ai shaloi KIA hte hkrum katut gap hkat hkat re ai masa she re nga, tsun timung, teng sha gaw masing nga nga hte “htim gasat majan” galaw wa ai re nga nna, Laiza KIO Shiga Magam Dap lithkam Du Kaba Nhpang Naw Bu tsun ai re.