Tag Archives: Mungbaw

Myen asuya dap hpe Hkalum Pa kaw KIA D36 ni bawm hte hkap kapaw

Tinang ginra kata ‘ginra jasan’ majan masing galaw nga ai Myen asuya dap hpe Sep. 29, bat Lahkawng Ya shani kalang bai, Hkalum Pa kaw KIA Dung 36 ni, bawm hte hkap kapaw gasat ai lam galaw ai re.

Mungbaw hte Dalung lapran Hkalum Pa kaw lai wa ai, tatmadaw Myen hpyendap, Dapnu (tat-ma) 88 hpyen hpung hpe buga ten hkying 4pm jan hta, KIA Dung 36, Kung (1) ni, bawm hte hkap dem ai re.

“Daini (Sep 29) gaw mi yat.. le… Mungbaw, Hkalum lai kaw, Dalung de yu wa ai lam kaw Dung 36, Kung 1 ni bawm bai hkap kapaw ma ai da law, hkra n hkra gaw n chye ai, Myen mung aten hkying 4:30 daram kaw re,” nga nna ginra masha langai Jinghpaw Shiga Dap de bat Lahkawng Ya shana tsun ai.

Bat Langai Ya shani hta Mungbaw grupyin shara masum kaw Myen hpyen Dapnu (88) ni hpe KIA D36 ni hkap sin gasat ai kaw, Myen maga si hkala lam nga ai hpe chye lu ai re. KIA maga hkra machyi lam n nga lam, Dapba (6) salang ni tsun ai re.

Kachin Sub-state, lahta Sammung, Wunpawng Mungdan Shanglawt Hpyendap, KIA Dapba (6), Dung (36) ginra Muse ginwang kata Myen asuya dap ni ‘ginra jasan’ majan masing galaw nga ai majaw, ndai September praw kaw nna, madung Mungbaw grupyin hta wuhpung lahkawng gasat gala majan ni byin nga ai re.

Tinang KIA dap daru de htu shadut shang wa ai Myen asuya dap ni hpe ‘ahkang n hpyi ra ai sha’ gap na ahkang jaw da ai nga nna, Jinghpaw mungdaw Ginjaw Laiza na KIO/KIA Shiga Magam Dap lithkam, Du Kaba Nhpang Naw Bu, ndai shata praw de KNG de tsun wa sai re.

KIA D36 ginra majan hta Myen hpyen 6 si, 5 hkala

Lahta Sammung, KIA Dapdung 36 ginra Muse ginwang kata ‘ginra jasan’ gabaw hte htu gasat nga ai Myen asuya dap ni hpe KIA ni ninghkap gasat ai kaw, Sep. 28, bat Langai Ya shani, asuya dap maga yawm dik 6 si nna hkala ai 5 lahta re nga, KIA ni tsun ai.

Bat Langai Ya shani, jahpawt maga hte shana maga gasat poi yawng 3 lang byin ai kaw, ndai laman KIA hte byin ai gasat gala lam ni hta, Myen hpyendap maga kaba dik si hkala hkrum ai lam rai nga ai. 

“N law htum 6 hte 7 daram si na masa nga ai. Hkala ai mung 5 hte 7 daram nga na re. Tinang maga hkra machyi ai lam n nga ai,” nga nna KIA Dapba (6) hpyendu langai Jinghpaw Shiga Dap KNG de tsun ai.

Myen hpyendap Dapnu (tat-ma) 88 hpyen hpung ni gaw, Mungbaw makau KIA D36 dap ni nga ai bum de htu gasat ai lam galaw nna bai yu wa ai shaloi lam kaw jau gawng ladat hte KIA ni hkap gasat ai re.

“Mai Hpang kaw nna pru wa ai ni Namtau makau Mahkaw Yang kaw hkap kapaw, dai kaw loi mi si hkala lawm ai rai, bai nna Man Nawng Yang kaw MHH Kung 4 (KIA Mungshawa Hpyen Hpung) hte bai gap hkat, dai kaw bawk mung kapaw, gap mung gap, dai kaw ma tsawm ra mi machyi ai da, rai nna shana daw de gaw nang Mungbaw kaw nna nang Namtau de Pale Hkyet de lung wa ai Hka Chyang Hkaraw ngu ai kaw kalang mi bai hkap gap ai, remote bawm ni adep bun ai kaw dai kaw tsawm ra mi bai hkra machyi mat ai da” nga nna majan ginra na salang langai tsun ai re.

Tatmadaw Myen hpyendap gaw hpyen man masum hte Howa Bum KIA D36 daju de htu lung wa ai majaw shani shagu ngu na gasat gala majan ni byin wa nna, dai ginra masha 60 jan gaw, Man Nawng Kawng mare nawku jawng hta September 24 kaw nna hprawng yen nga ai lam chye lu ai.  Shanhte hpe ra kadawn ai garum ntum jaw na shajin da tim, ya byin ngai gasat gala lam a majaw, bat Langai Ya shana du hkra, n lu sa shi ai nga nna, Mungbaw na shinggyim nauna garum ntum hpung langai tsun ai re.

Ya ten, COVID-19 kap bra ana zinli hpe makawp ninghkap nga ai ladaw, Myen hpyendap gaw September (30) du hkra, nhtoi bai jat majan jahkring da ai lam ndau da timung, Lahta Sammung e ‘ginra jasan’ majan masing galaw wa ai majaw, Dingdung Daw Daphpawm malawm KIA, Kokang MNDAA hte Rahkai AA ni hte gasat gala majan ni byin nga ai re.

Myen hpyen ni KIA Dung 9 daju hpe zing, bai dawm

Myen asuya dap tat-ma (99) gaw Lahta Sammung, Muse ginwang kata na KIA Dung 9 daju hpe June 7, Laban shani, htim gasat zing lu ai hpang kade n na ten bai dawm mat ai lam galaw wa sai.

Wunpawng Mungdan Shanglawt Hpyendap, KIA Dapba (6) npu Dung 9 daju, Htan Hpa Bum hpe Laban jahpawt daw gasat gala byin nna KIA ni htingnut mat ai majaw hkying 10:30am daram hta asuya dap ni zing madu kau ai re. Raitimung dai shani shana de hkying 6pm daram hta bai Nampaka de dawm mat wa ai re.

“Dung (9) ni gaw shanhte gaw marai 300 jan nga ai rai nga ai. Rai yang htaw ra tat-ma (99) ni gaw marai 70 daram sha wa gasat yang shanhte headquarter yen kau sai hkying shi chyen kaw.  Hkying shi daram kaw gaw tsawmra laja lana, headquarter wa shang ai shaloi gaw loi laja lana gasat ai. Myen maga loi hkala nba nga na masa nga ai. Anhte de gaw grai laja lana hpa nga ai gaw n na ai. Dai manga kru shi hpe sha gaw mai shamyit kau ai baw re. Raitim shanhte hta gawng kya ai lam lama ma nga sam ai” nga nna dai ginra hpyen masa yu maram ai salang langai Jinghpaw Shiga Dap (KNG) de tsun dinglik ai.

Dapnu (tat-ma) 99 hpyen hpung gaw Hu Hpyet maga na htu lung wa ai rai nna June 6, bat Kru Ya shana hkying 7 jan hta, Dung (9) ni wa hkap ai Layan Kawng kaw numdaw lahkawng lang gap hkat hpang wa ai re.   

Gap Na Ahkang N Jaw

Laban shani Dung (9) daju kaw majan byin nga ten, Nampaka pyihtawngsu lam n’maw hku nna Munggu hte Mungbaw maga mawdaw (20) jan hte Myen hpyen n-gun lung wa ai hpe KIA ni hkap gasat na ahkang n jaw ai lam chye lu ai.

“Nampaka kaw Myen hpyen ni mawdaw hkun jan Munggu, Mungbaw de htu lung wa ai tat-ma (99) hpe htaw lung wa ai mawdaw yin-tan ni hpe dai hpe hkap gasat ai lam n nga ai, ntsa na matsun n lu ai majaw, ndai gaw Dung 9 headquarter she wa zing kau timung lam de gasat na ahkang n lu na n gasat ai nga, Du Zau Bawk hpung ni ndai zawn re hpe mu na myit n pyaw ai hku rai nga ai,” nga nna lahta na hpyen masa yu maram ai wa matut tsun ai re.

Dai hpyen mawdaw yan hpe Ta Lung hte Deng 105 lapran hkap gasat na matu KIA Dapba (6) kata Dung (36) na Du Zau Bawk woi awn ai hpung ni hkyen nga ai hpe Munggu Ginwang D.O Lahpai La Doi ahkang n jaw pat hkum kau ai re lam, na chye lu ai.

Ya na zawn KIA Dung 9 daju hpe hpyen hpung hte wa htim gasat ai ntsa Myen hpyendap gaw hpyen hpung shada ‘hkum katut gap hkat ai lam (hti-twi tai-poi)” she re ngu nna, Laban shani shiga dap ni de tsun ai re.

Raitimung, ya COVID-19 ladaw Myen asuya dap hte rawt malan hpung ni majan jahkring tawn ai ten, ya na zawn hpyen hpung hte htu lung wa nna KIA Dung (9) daju hpe wa gasat zing ai sat lawat gaw ‘hkrum katut gasat poi’ n re sha ‘masing nga nga hte’ galaw ai lam she rai na re nga nna, hpyen masa yu maram ai ni mu mada ai re.

Hkrismat shani Myen asuya dap hpe KIA ni bawm hkap dep

Tinang dap gap zing nna wan nat kau ya ai, Myen asuya dap, Dapnu (99) hpyen hpung hpe December 25, Hkrismat shani jahpawt daw, KIA ni bawm hte hkap dep gasat dat ai lam, KIA shawnglam shiga lawk tsun ai.

Lahta Sammung, Muse ginwang, Mungbaw KIA Dapba (6) npu Dapdung (36) a Ting Sa Kawng post hte ginwang uphkang rung ni hpe wan nat jahten kau nna bai yu wa ai, n-gun 90 dang Myen Dapnu (tat-ma) 99 hpyen hpung hpe Mungbaw Gat Pa makau kaw KIA (36) ni bawm hkap dep nna sinat hte mung, aten kadun ninghkap gasat ai re nga, KIA Ba (6) salang langai, Jinghpaw Shiga Dap (KNG) de tsun shateng ai.

“Ya ya Mungbaw, Nam Hkawng Hka kaw KIA ni, Myen ni ya hte KIA 36 gap amya nat kau da ai ni hpe hkap taw nna hkap gap taw nga ai.  Myen ni grup gra na laknak kaba grai gap ya taw ma ai,” nga nna bat Masum Ya jahpawt, lahta na KIA Dapba (6) salang wa tsun ai.

Myen maga hti hkum n chye ai si hkala lam nga ai kaw, hkala ai hpyenla langai hpe Muse tsi rung de htaw sa ai hpe mu ai lam, sagawn chye lu ai.

Myen asuya Dapnu (99) hpyen hpung ni gaw, December (20) ya shani, KIA Dung (36) a Ting Sa Kawng post hte ginwang rung ni hpe gasat zing nhtawm wan nat jahten kau nna Hkrismat shani bai nhtang wa ai hpe KIA ni bawm dep hkap gasat dat ai rai nga ai.

NCA, mungdan ting gap hkat jahkring ga sadi, hpe hkapla sen n htu ai Dingdung Daw Daphpawm hpung mali rai nga ai, KIA, Rahkai AA, Balawng TNLA hte Kokang TNLA ni gaw bilateral gap hkat jahkring sen htu hkra shakut nga dingyang rai nna, Miwa lapran tsap garum ya ai majaw, December 15 hta Hkwiming (Kunming) kaw Myen dat kasa ni hte hkrum shaga wa sai re.

Du na January, 2020 Shaning Ningnan hta bai wuhpung dat kasa ni hkrum hkat na myit hkrum da ai re.

Mungbaw KIA (36) shara yen ya, Myen hte majan zim mat

Dec. 20, bat Manga Ya shani, KIA Dapdung (36) ni tinang shara de htu lung wa ai Myen hpyen hpung ni hpe aten kadun mi gap shingla nna yen ya ai hpang, gap hkat ai lam ni matut n byin sai re.

Dai shani shana kaw nna KIA Dung (36) hte Ginwang rung nga ai shara hta Myen ni dung mat ai re nga ai.

“Dai 36 ni nga ai Ting Sa Kawng, dai mung yen kau nna, 36 hte Ginwang ni nga ai shara de mung Myen ni dung mat sai gaw,” nga nna Lahta Sammung Munggu Ginra KIA Dapba (6) na hpyendu langai, anhte Jinghpaw Shiga Dap de tsun ai.

Myen Dapnu (99) hpyen hpung ni gaw, Dung (36) shara de Talung hte Namtau, hpyen man lahkawng hku htu lung wa ai hpe Talung hku na lung wa ai ni hpe sha Dung (36), Kung-1 ni ninghkap gasat ai re lam, lahta na Ba (6) salang wa tsun ai re.

KIO Ginjaw gaw asuya dap ni hpe matut hkap hkan gasat na matu hpa n matsun ai hte, maga mi de asuya dap ni gaw grau nna KIA a jinghku dap, Balawng TNLA, Rahkai AA hte Kokang MNDAA ni hpe madung hkan tam gasat ai masa re majaw mung, KIA hte matut gap hkat na masa n nga ai nga nna, lahta na salang wa dinglik tsun wa ai re.

Gap hkat jahkring sen htu na lam hte seng nna, Myen asuya simsa lam dat kasa hpung hte Dingdung Daw Daphpawm, hpung (4) salang ni gaw, Miwa asuya lapran tsap garum ai npu, Dec. 15 hta Yunnan mungdaw Hkwiming (Kunming) kaw hkrum shaga wa sai re.

Du na shata, 2020 hta bai wuhpung lahkawng hkrum bawngban na matu myit hkrum tawn ai hpe, Myitkyina daju simsa lam akyu galaw hpung, PCG na Duwa Lamai Gum Ja tsun ai re.

Myen asuya dap hte KIA Dung (36), gap hkat lam byin

Dai ni, December 20, jahpawt daw Myen asuya dap hte KIA Dapba (6), Dapdung (36) lapran, Lahta Sammung, Mungbaw grupyin kaw gap hkat ai lam byin wa ai re.

“Dapdung (36), Kung langai ni nga ai Maw Tawng hte Mungli lambraw kaw Myen hpyen hpung ni du wa ai hpe hkap gap ai galaw ai” nga nna KIA Dapba (6) hpyendu langai Jinghpaw Shiga Dap KNG de tsun shateng ai.

Lai wa sai bat mi jan kaw nna KIA Dapba (6) ginra Mungbaw, Munggu maga de Myen asuya hpyen n-gun jat ai lam ni nga ai lam ginra masha ni tsun ai.