Tag Archives: MHH

KIA D36 ginra majan hta Myen hpyen 6 si, 5 hkala

Lahta Sammung, KIA Dapdung 36 ginra Muse ginwang kata ‘ginra jasan’ gabaw hte htu gasat nga ai Myen asuya dap ni hpe KIA ni ninghkap gasat ai kaw, Sep. 28, bat Langai Ya shani, asuya dap maga yawm dik 6 si nna hkala ai 5 lahta re nga, KIA ni tsun ai.

Bat Langai Ya shani, jahpawt maga hte shana maga gasat poi yawng 3 lang byin ai kaw, ndai laman KIA hte byin ai gasat gala lam ni hta, Myen hpyendap maga kaba dik si hkala hkrum ai lam rai nga ai. 

“N law htum 6 hte 7 daram si na masa nga ai. Hkala ai mung 5 hte 7 daram nga na re. Tinang maga hkra machyi ai lam n nga ai,” nga nna KIA Dapba (6) hpyendu langai Jinghpaw Shiga Dap KNG de tsun ai.

Myen hpyendap Dapnu (tat-ma) 88 hpyen hpung ni gaw, Mungbaw makau KIA D36 dap ni nga ai bum de htu gasat ai lam galaw nna bai yu wa ai shaloi lam kaw jau gawng ladat hte KIA ni hkap gasat ai re.

“Mai Hpang kaw nna pru wa ai ni Namtau makau Mahkaw Yang kaw hkap kapaw, dai kaw loi mi si hkala lawm ai rai, bai nna Man Nawng Yang kaw MHH Kung 4 (KIA Mungshawa Hpyen Hpung) hte bai gap hkat, dai kaw bawk mung kapaw, gap mung gap, dai kaw ma tsawm ra mi machyi ai da, rai nna shana daw de gaw nang Mungbaw kaw nna nang Namtau de Pale Hkyet de lung wa ai Hka Chyang Hkaraw ngu ai kaw kalang mi bai hkap gap ai, remote bawm ni adep bun ai kaw dai kaw tsawm ra mi bai hkra machyi mat ai da” nga nna majan ginra na salang langai tsun ai re.

Tatmadaw Myen hpyendap gaw hpyen man masum hte Howa Bum KIA D36 daju de htu lung wa ai majaw shani shagu ngu na gasat gala majan ni byin wa nna, dai ginra masha 60 jan gaw, Man Nawng Kawng mare nawku jawng hta September 24 kaw nna hprawng yen nga ai lam chye lu ai.  Shanhte hpe ra kadawn ai garum ntum jaw na shajin da tim, ya byin ngai gasat gala lam a majaw, bat Langai Ya shana du hkra, n lu sa shi ai nga nna, Mungbaw na shinggyim nauna garum ntum hpung langai tsun ai re.

Ya ten, COVID-19 kap bra ana zinli hpe makawp ninghkap nga ai ladaw, Myen hpyendap gaw September (30) du hkra, nhtoi bai jat majan jahkring da ai lam ndau da timung, Lahta Sammung e ‘ginra jasan’ majan masing galaw wa ai majaw, Dingdung Daw Daphpawm malawm KIA, Kokang MNDAA hte Rahkai AA ni hte gasat gala majan ni byin nga ai re.

KIO Je Yang Dabang hpyen yen salang langai, du gyit si

Jinghpaw-Miwa ga jarit, Wunpawng Mungdan Shanglawt Hpung, KIO uphkang ginra, Je Yang hpyen yen dabang na Slg. Hpaula Gam Awng, asak (50), gaw madu hkum sumri hte du gyit si ai lam galaw wa sai re.

Nam San, Hka La mare kaw nna Je Yang IDP camp Sut Mu Awng Lawk (9) kaw shanu nga ai, Slg. Hpaula Gam Awng snr Chit La gaw August praw 1, jahpawt manap daw, hkying 2 am jan ten, hkum n pyaw wa ai kaw nna dabang nta kaw sat si ai lam re nga, dabang shiga lawk hku chye lu ai.

Miwa ga jarit hte yep Je Yang dabang gaw Laiza a dingda maga nga ai hpyen yen dabang kaba langai re. Slg. Gam Awng gaw magam gun re lam n chye lu tim, KIO ginra hpyen yen dabang na kawa la ni yawng ngu na gaw MHH hpyenla re lam chye lu ai.

COVID-19 mungkan kap bra ana zinli makawp ninghkap nga ai ladaw, KIO uphkang ginra kata shata lahkawng laman sa wa si ai manghkang masum byin ai hta, masha yawng  si hkrum ai re.

July praw 2 hta, Nba Pa ginwang daw, Mai Bat Ninghtawn, Gai Daw mare hta mare uphkang rung chyare Slg. Yaku Langzing Tang Gun hte rau dinghku masha 5 hpe aten mi hta kahtam sat kau da ai lam byin ai re.

Bai, June 18, manap 4am jan ten hta gaw Laiza, Woi Chyai mare Lawk 2 hta, KIO Mungshawa Hpyen Hpung (MHH) magam gun, Marip Singnan Awng Tu, asak 28, gap si ai lam byin ai rai nga ai.

Laiza MHH hpyen ma langai, gap si

KIO mare daju Laiza kaw magam gun ai, Mungshawa Hpyen Hpung hpyen ma langai, sinat gap si ai lam, June 18, bat Mali Ya jahpawt byin wa sai.

MHH hkum dek masat B-59041 hpyen ma Marip Singnan Awng Tu, asak 28 ning gaw, Woi Chyai Lawk 2 kaw jahpawt hkying 4:30am ten, ‘tsa lu nang nna’ shi hkrai shi gap si ai re nga, seng ang ai ni tang madun ai hpe mu lu ai.

Raitim, baw kaw sinat pala gap hkra ai ningma hpe yu yang shi hkrai gap si masa n pru ai re.

“Ya yu yang shi hkrai gap si ai masa n re lu. Hpang hku na gap dat ai masa re lu,” nga nna shimlam a majaw mying n tsun mayu ai KIA magam gun langai, Jinghpaw Shiga Dap, KNG de tsun ai.

Ndai mabyin hte seng nna KIO hte, shi hte hkridun ai shiga dap ni hta mabyin shiga tang madun ai lam n nga shi ai re.

2011 ning Shanglawt Majan kalang bai byin wa na mahka, Wunpawng Mungdan Shanglawt Hpung, KIO Uphkang Dap npu MHH hpe madung shanglawt hpyenla dingsa ni hte mungshawa ni shanglawm hpaw ninghtan ai re.  MHH dap ni gaw lamu ga ginra masa dang ai majaw Myen hpyen wa hpe ‘KIA a hkap hkan ladat’ hte shingdaw ai majan hta grai mying dan dawng lai wa masai re.

Myen ni sa wang gap ai kaw KIA tsi sara hte hpyenma, asak ap nawng

Jinghpaw mungdaw ga-ang KIA Dapdung (5) Hkawng Mye ginra, tinang Awng Jat post hpe, ndai bat pru de, Myen asuya dap ni sa wang gap ai kaw tsi sara langai hte hpyenma langai, asak ap nawng mat wa sai lam, KIA shiga lawk tsun shateng ai.

Bat Langai Ya, Oct. 14, jahpawt daw dai ginra de wuhpung lahkawng dap lapran ‘hkrum katut’ gap hkat ai lam ni byin wa ai hpang, ya na zawn marai masum gan du nga ai Awng Jat post sa wang gap hkrum ai re nga, san sagawn chye lu ai.

Ya asak ap nawng mat wa sai magam gun yan gaw, Awng Jat post kaw hkum n pyaw ai lat du langai hpe yu lajang na nga nga ten, shana de hkying 5pm daram ten Myen hpyen hpung ni maja sa wang gap ai kaw hkrat sum mat ai raitim machyi ai lat du wa chyawm gaw asak lawt mat ai lam, KIA shiga lawk tsun ai.

Dai shani jahpawt daw, Hkawng Mye ginra Ku-Ing-Su post maga asuya dap Dapnu (Tat-ma) 101 hte Lagaw Dap (Hk.L.Y) Masat (141), pawng hpawm dap hte KIA Dung (5), Mungshawa Hpyen Hpung (MHH) lapran aten kadun ‘ang katut’ gap hkat ai lam byin ai re.

Ndai post gaw, Jinghpaw mungdaw ga-ang Mungnyang (Mohnyin) ginwang, Nawnglut (Indawgyi) a dingda maga Wunpawng Mungdan Shanglawt Hpyendap, KIA Dapba (8) npu Dapdung (5) ginra re.

Jinghpaw mung hte Sam mung hta 2018 December 21 kaw nna tatamadaw Myen hpyendap a dinghkrai majan jahkring tawn ai hpe lang hte lang ladaw bai jat ai gaw, lai wa sai September 21 hta htum mat sai re.

Jinghpaw mungdaw kata majan hkring mat ai shata (9) jan na ai hpang, ya kalang bai Myen hpyendap hte KIA lapran gasat gala majan ni bai byin wa ai lam rai nga ai.