Tag Archives: Manmaw

Nmawk mare kata Myen hpyendap hpe KIA bawm hte hkap gasat

Nmawk Mare kata hta dai hpawt manap hkying 11 daram e, Myen hpyen dap shamu shamawt hkawm ai hpe Wunpawng Mungdan Shanglawt Hpyendap KIA dung 15 ni bawm hte hkap gasat ai kaw nna Majan byin wa ai re.

Myen hpyen dap gap dat ai laknak kaba si, mung shawa dum n ta hta wa hkrat nna, n ta numgaw malawng mat ai hte Mung shawa langai, lagaw lahkawng maga hkala hkrum wa ai re lam chye lu ai.

Myen hpyen dap Hk-M-Y 437 dap na hpyen hpung ni hte Kyuhpyi bum maga de na yu wa ai Myen hpyen hpung ni hpe Nawng Pau lam num she hta bawm hte hkap gasat dat ai hta, Myen hpyen dap maga na si hkala ai lam nga ai majaw, mung shawa dum nta 2 hte Sengke gram seng langai hpe wan nat jahten kau ya ai lam matut chye lu ai.

Myen hpyen dap ni kaw na, n dai laman Lung Ja bum maga de laknak hpyen n gun bai jat shalun la na matu, lam de shim lam sa la ya na matu, Hk L Y 437 na ni hte Kyuhpyi bum na yu wa ai Myen hpyen hpung ni hpe hkap shing la dat ai re lam, shawng lam magam gun ni kaw na chye lu ai.

Dai zawn Myen hpyen dap ni nat kau ya ai n ta wan hkru ai majaw, dai kaw na mare ting wan hkru wa na hpe myit tsang ai majaw, mare salang wa kaw na wan sat dap de wan sat mawdaw shaga ai raitim, n tsa na matsun n lu ai nga nna, n sa sat ya ai re lam buga masha langai ya na zawn tsun dan ai re.

majan kata mung shawa hkala hkrum ai lam

“Mare salang wa gaw, Myen hpyen la ni nat kau da ya ai n ta kaw na mare ting wan hkru wa na masa nga ai majaw, wan sat dap de wan sat mawdaw shaga ai, ntsa na matsun n lu ai nga na n sa ai, mare masha ni hpe jawm shaga gahkyin na bai sat yang mung gadai n jaw sat lu na, nga nna Myen hpyen la ni sinat madi wa ai, dai hku hkru nga u ga nga tsun ai” nga mare masha langai KNG shiga dap hpe tsun dan wa ai re.

Dai zawn Myen hpyen dap ni hkap kapaw hkrum ai hpang mare ting laknak kaji kaba n sen ngoi hpang wa ai gaw dai na maga de du hkra re lam chye lu ai.

Nmawk mare kata de ya na zawn gap gasat hkat wa ai majaw, mung mare masha n kau Manmaw de hprawng yen ra taw ai re.

Dai zawn gap gasat hkat ai hta hpyen dap lahkawng maga sum machyi ai lam nga n nga hpe a tsawm n chye lu ai raitim, Myen hpyen dap ni hpe bawm hkap kapaw bun ai re majaw, Myen hpyen dap maga sum machyi si hkala ai lam nga na re lam, buga masha ni matut tsun dan wa ai re.

Nmawk ginra Lung Ja Bum mayan de Myen hpyen dap ni lai wa sai October 22 ya shani kaw na wa htim gap gasat hpang wa ai gaw, dai ni ten du hkra gap hkat dat, zim dat masa naw rai taw nga ai re.

Nmawk, Lung Ja Bum Lagaw na Yi Hkauna Hkan, Mam Nmai Dan La

Nmawk Giwang Lung Ja Bum lagaw na mare kahtawng ni hta Myen hpyen dap ni dap jung shara la taw ai hte, shani shagu ngu na laknak kaba ni gap shadam bun taw ai lam ni a majaw, Mung mare masha ni Hkau na mam shu dan la na matu shimlam nnga nna, yak hkak taw ai lam chye lu ai.

Lung Ja mare, Nawng Pau mare, Wa Wang mare hte Nmawk Hka Nan lawk ni hkan na, mare masha law malawng a hkau na gaw, Lung Ja Bum lagaw grup yin hkan rai nna, Myen hpyen dap ni kaw na laknak kaba ni hte jahkring hkring gap shadam bun ai majaw, kadai nlu dan ai sha, n kau mam ni krawp mat ma wa sai lam, Nmawk Hkanan lawk na mung mare masha langai KNG shiga dap de tsun dan ai re.

“Dai hkau na makau grup yin de sha myen hpyen dap ni shani shagu ngu na lak nak kaba gap bang taw ai, shaloi gaw mung shawa ni asak hte rang na gadai n gwi sa dan ai. Gumhpraw law law jaw na gun jang shaga na tim pyi gadai n gwi sa taw ai, dai zawn byin taw ai majaw, dai ning gaw mam lu dan n lu dan pyi n chye sai. Lama n lu dan yang gaw, du na shaning hta gaw gara hku lai di ra na re pyi n chye sai” nga tsun ai.

Lung Ja bum lagaw mayan hta hkau na Eka 800 ram nga ai lam matut chye lu ai.

Ya ten n kau lam kaba, mare hte ni ai shara hkan na mam ni hpe gaw lu dan la ai lam ni loi li nga taw sai rai tim, bum lagaw maga de na hkau na mam ni hpe tsep kawp rai n dan la lu shi ai lam matut chye lu ai.

Lai wa sai shaning ni hta mam dan manu lani mi  5,000 ram sha jaw ra ai rai tim, majan n hpan lam ni a majaw, ya ten dai ginra hta lani mi mam dan gun jang manu 8000 hte 10,000 mi lapran jaw ra tim dan na tsang ra taw ai chye lu ai.

Lai wa sai October 22 ya shani kaw na Myen hpyen dap gaw, Lung Ja bum hpe htim gasat hpang wa ai rai nna, dai ni ten du hkra laknak kaba ni jahkring hkring gap shadam bun ai lam ni nga taw ai lam chye lu ai.

Dai zawn laknak kaba gap shadam bun ai lam ni a majaw, mung mare masha ni asak si sum ai lam hte hkala n ba hkrum ai lam ni mung nga wa sai re.

Manmaw muklum kata shara 3 hta bawm kapaw nna hkala ai lam nga

Manmaw Muklum kata na pawng hpawm uphkang rung, dai ni August praw 10 ya jahpawt hkying 11 ram aten hta bawm sa kapaw hkrum nna, rung magam gun langai hkala hkrum wa ai lam chye lu ai.

Dai ten hta sha kapaw ai shara ni gaw, Manmaw pawng hpawm uphkawng rung shawng hta bawm 2, Inwa Bank Myen hpyen ni sin ai ကင်းတဲ hte Balik magam gun ni a n ta hta mung bawm ni kapaw wa ai lam chye lu ai.

Pawng hpawm Uphkang rung Sengke tawn ai shara makau kaw kapaw wa nna, rung magam gun wa hkala hkrum ai rai tim, tsang ra ai lam nnga ai  nga, ginra masha langai KNG shiga dap de tsun ai.

“Shi gaw Sengke Stand hta Sengke wa shang tawn ai ten hkrup chya kapaw wa ai, dai kaw hkala hkrum ai, hkala hkrum ai ngu hta bawm hkyep loi li wa hkra ai sha re, hpa n tsang ra ai.” nga ginra masha tsun dan ai re.

Dai hpawt hkying 11 ram aten dai zawn Manmaw muklum shara masum ram hta kalang ta bawm kapaw wa ai rai nna, madung gaw Myen hpyen dap hpe garum madi shadaw ya taw nga ai rung ni hpe sa kapaw ai re lam Urban Rebolutionary Force na lit nga ai ni kaw na chye lu ai.

Pawng hpawm rung hta gaw, Myen hpyen dap a madung ahkyak ai rung re majaw, hkam bawm lahkawng hte kapaw wa ai rai nna, Inwa bank hta gaw ta bawm langai hte kabai kapaw ai hpang, balik n ta yan hta gaw jahkrit ai hku na n sen bawm hte sha kapaw jahkrit ai re lam Manmaw Urban Revolutionary Force na lit nga ai ni matut tsun dan ai re.

Dai ni bawm kapaw ai hta mung shawa hkala hkra ai lam hpang n nga ai rai nna, Mung shawa ni kaw na rai tim dai zawn bawm kapaw ai hpe kalang ta pru nna hkan chyan yu ai lam n galaw na hte Myen hpyen la balik ni hte ni ni htep htep nga ai lam n galaw na matu matut tsun sadi jaw wa ai re.

COVID-19 machyi masha yan hte hkrum katut ai J.M. masha (9) hpe san san tawn

Mungkan kap bra ana zinli kaba, COVID-19 machyi masha lahkawng hte san san hkrum katut ai Jinghpaw Mungdaw masha yawng (9) hpe shinggan n pru na pat hkrum yu sin tawn ai lam, chye lu ai.

Machyi masha masat (245), la, asak (30) ning, hte hkrum katut ai Myitkyina, Shatapru na masha (8) hpe dum nta n pru na hkum pat tawn nna Machyi masha masat (249), asuya tsi sara num, askak (24) ning, hte hkrum katut ai marai (1) hpe gaw Myitkyina tsirung kaba san da ai shara (quarantine center) kaw tawn da ai re.

Ndai machyi masha lahkawng, Masat (245) hta June 9, hte Masat (249) hta June 11, ya ni hta ana jep shapraw lu ai rai nna shan gaw maigan n pru ga yu ai lam, mungdan asuya Hkamja hte Ginsup Hkringmang Dap ndau ai re.

Masat (245) gaw Sammung Dingda, Si Sai mare na rai nna ya ten Tawnggyi asuya tsirung langai kaw rawng nga ai re. Shi Myitkyina lahta Tayang Zup kaw amu galaw nga ai kaw nna dum nta n wa shi yang, May (19) hta Shatapru Mawng Tai Kah Workshop amu galaw masha (5) hte de makau Let Ya lusha seng na masha (3) hte hkrum katut wa sai lam, Jinghpaw Mungdaw asuya Covid-19 makawp ninghkap komiti na Ningtau Ningbaw U Tin Lai tsun ai re.

Bai, Masat (249) hte hkrum katut ai, asak 40, Manmaw asuya lahta tsang jawng na sara num, gaw Myitkyina Dakkasu jawng de laika jep na matu June praw 3 kaw nna du taw nga ai ten, shi hpe Myitkyina tsirung kaba COVID-19 masam maram dabang de June 11 ya shani sa ap tawn ai nga, dakkasu jawng-up Dr. Aung Win tsun ai re.

Mungdan ting madang, bat Mali Ya lani mi kaw sha, Coronavirus machyi masha n’nan marai 11 (Maigan na du wa ai, Bangladesh na 1, Gala na 10) jat wa ai majaw, ana byin ai masha yawng 260 du wa sai hte, shanhte hta bai mai tsai wa ai gaw 165 rai nna si ai gaw marai (6) nan nan re lam, asuya Hkamja hte Ginsup Hkringmang Dap a June 11, shana hkying 8, ndau hta tang madun ai.

Mungkan madang hta gaw, June 11 du hkra, COVID -19 ana kap bra shadang gaw lani mi marai 100,000 jan hte tsaw jat nga dingyang rai nhtawm lani mi si ai jahpan chyawm gaw 3,000 hte 6,000 lapran hte hkrat yawm wa ai hpe, Worldometers sawk sagawn jahpan hta mu lu ai.

U.S. gaw mungkan e ana kap ai hte si jahpan law dik rai nna ya ten machyi masha wan 2 jan hte si ai gaw sen mi jan sai re. Myen mung a htingbu Gala mungdan hta, ya ten masha sen masum hkawt kaw ana kap bra nga nna si ai gaw hkying matsat jan hte, mungdan e ana kap ai shadang nambat 4 tsaw dik de gumhtawn lung nga sai re.