Tag Archives: Kaleng

Shiga

Myen-KIA gasat gala lam, Jinghpaw Mungdaw de byin wa

Leave a comment

Bilateral gap hkat jahkring jahkrup nga dingyang ladaw, Myen hpyendap hte KIA gasat gala majan lam gaw Jinghpaw Mungdaw ga-ang hta June 29, bat Langai Ya shani, byin hpang wa sai.

Wunpawng Mungdan Shanglawt Hpyendap, KIA Dapba (8) npu Dapdung (5), Ga Hkyeng Bum ginra de Myen hpyen hpung lahkawng htu shadut shang wa ai majaw, La Mai Yang kaw aten minit 30 daram hkrum katut gap hkat lam byin wa sai nga, KIO shiga lawk tsun ai.

“Myen ni gaw dai kaw htu shadut shang wa ai majaw aten kadun gasat poi byin ai.  Laja lana gaw n re. Tinang KIA dap ni bawm 2 lang, 3 lang kapaw rai, gap mung loi gap rai nna yen kau da ai,” nga nna KIA hpyendu langai tsun ai.

KIO The Kachin Net June 29 shiga hta, “gasat gala byin ai gaw KIA Masat (5) Dap Dung ginra kata de htu shadut nga ai Hk.M.Y (389) hpyen hpung ni hpe hpyen garum sa wa ai Hk.L.Y (237) hpyen hpung hpe KIA hpyen hpung ni hkap shingla gasat ai majaw byin ai re” nga tang madun ai.

June 22 hta mung, Loije makau Myen-Miwa ga jarit lam langai kaw hkap sin ai KIO COVID-19 ana zinli jep chyam shagyit hpe Loije Myen hpyendap ni wa hpya jahten kau ai majaw, dai shani KIA Dung (1) hte ganoi gap hkat na zawn hpyen masa shaja hkat wa sai re.

Ndai shata praw kaw nna, Lahta Sammung KIA dap ni gaw Myen hpyen ni a hkan tam majan baw gasat hkrum hpang wa ai re. Myen Tat-ma (88) hte (99) pawng hpawm hpyen hpung ni hte KIA dap ni gaw, Muse ginwang Htan Hpa Bum kaw June 6-7 hte, Kutkai ginwang Kaleng ginra hta gaw June 16 kaw nna 21 ya du hkra, gasat gala majan ni byin wa sai re.

Mungdan kata COVID-19 ana zinli makawp ninghkap lamang galaw nga ten, tatmadaw gaw jahten sharun hpung ngu masat tawn ai, Rahkai AA hte byin nga ai majan hta lai, ngam ai rawt malan hpung ginra ma hkra kaw, May (10) kaw nna August (31) du hkra majan jahkring tawn ai lam, May (9) hta ndau dat sai rai nga ai.

Raitimung, tatmadaw gaw Lahta Sammung kaw ‘ginra jasan’ galaw ai shaloi KIA hte ‘hkrum katut gasat poi’ byin ai lam tsun ndau ai gaw n jaw ai hte, kaja wa gaw masing nga nga hte galaw ai ‘htu gasat majan’ she re nga nna, Laiza KIO Shiga Magam Dap lithkam, Du Kaba Nhpang Naw Bu, dinglun ai re.

Shiga

Lahta Sammung kaw Myen hte KIA gap hkat ai, mali ya du

Leave a comment

Myen asuya dap hte Wunpawng Mungdan Shanglawt Hpyendap, KIA, lapran lahta Sammung, Kutkai Ginwang, Kaleng ginra kata gasat gala lam byin nga ai gaw, June 19, bat Manga Ya, du hkra, nhtoi mali ya du sai.

Bat Manga Ya, shana maga hkying 5pm jan hta byin ai majan gaw loi laja nna aten minit 40 daram na ai hte, laknak kaba nsen ni hpe Kaleng mare kaw na pyi na lu ai nga, ginra masha ni tsun ai.

Gasat gala majan gaw KIA Dapnawng Dapdung (29) hte Myen hpyen hpung hkrum katut nna byin ai re.

“Gap hkat ai shara gaw Man Tung hte Nam Hu ni a hka la, hka baw kaw re, hpyendap kaw n re. Div. hte Dung (29) ni yen nga ai shara kaw gap hkat ai. Kaleng kaw na pyi laknak kaba nsen ni grai na ai,” KIA Dapba (4) hpyendu langai, Jinghpaw Shiga Dap, KNG, de tsun shana ai.

Kutkai a sinna maga deng 8 jan gang ai, KIA Dapba (4), Dingda Ginwang Ginjaw a Kaleng ginwang daw shara de Myen hpyen Tat-ma (88) hte (99) hpyen hpung ni shara jut masum na htu shadut wa ai majaw, KIA hte gasat gala lam ni gaw June 16 ya shana kaw nna byin wa ai re.

Ya ten Myen asuya dap hte bilateral gap hkat jahkring na jahkrup nga ten, Jinghpaw Mungdaw hte Lahta Sammung tinang KIA dap ni yawng madu hkum makawp maga hta lai nna asuya dap ni hpe sa htim gap gasat ai n galaw na matu matsun da ai re.

Ya mungkan COVID-19 ana zinli makawp ninghkap ladaw, Myen hpyendap gaw, jahten sharun hpung ngu masat ai, Rahkai AA hte byin ai majan hta lai, ngam ai rawt malan hpung ginra ma hkra kaw gasat poi jahkring ai lam hpe May (10) kaw nna August (31) du hkra galaw ai lam, ndau sai re.

Dai zawn tsun tim, Lahta Sammung nga KIA dap daju ni hpe shading nna htu shadut htim gasat ai lam ni galaw nga ai kaw, June 6-7 hta Muse ginwang kata KIA Dapba (6), Dung (9) a daju Htan Hpa Bum hpe gasat zing sai. Dai hpang, ya Kutkai, Kaleng kaw KIA dap ni hpe htu gasat nga ai re.

KIA maga tinang dap de Myen asuya dap ni, ni kahtep wa ai snr du wa jang she loili ninghkap gasat nna yen mat ai ladat galaw nga ai majaw KIA gaw ‘hpyen wa hpe atsawm n gasat ai ngu’ ginra masha ni ja ja tsun dinglung ai lam hkrum nga ai re.

Shiga

Na Hkyem KIA dap hpe Myen asuya dap wa zing, wan nat kau da

Leave a comment

June 18, bat Mali Ya jahpawt daw hkying hkum lahkawng daram gap hkat ai hpang, Myen asuya dap gaw Lahta Sammung KIA Dung (8) a Na Hkyem dap hpe wan nat jahten kau da nna bai wa mat ai lam, chye lu ai.

Ndai shara gaw, Kutkai a sinna-dingdung de Wunpawng Mungdan Shanglawt Hpyendap, KIA a Kaleng ginwang daw, Na Hkyem, Nam Hu lahta kawng kaw rai nna, aten hkying 6:30am kaw nna 8:30am du hkra gasat gala byin ai lam, KIA Dung (8) shiga lawk tsun ai re.

“Gap gasat hkat ai gaw Dung (8), Kung (1) ni hte gasat ai. Dai ni hte rau Div. ni nga ai re. Kung (1) ni na hpyendap hpe wan nat kau da ya nna bai wa mat ai,” nga nna KIA hpyendu langai tsun ai.

KIA Dapba (4), Dingda Ginwang ginjaw (Div.) du salang ni du nga ai, Kaleng ginwang daw kata Na Hkyem ginra de Myen hpyen hpung (Tat-ma 88 lawm ai) ni htu lung wa ai majaw June 16 ya shana hte June 17 ya jahpawt hta mung aten kadun hkrum katut gap hkat ai lam ni byin wa ai lam, lahta na mying n tsun mayu ai KIA hpyendu wa matut tsun ai.

COVID-19 mungkan kap bra ana zinli byin nga ai ladaw, May 10 kaw nna August 31 du hkra, jahten sharun hpung ngu masat ai, Rahkai AA hte byin ai majan hta lai, ngam ai nga shara yawng, mungdan ting madang majan jahkring tawn ai nga nna Tatmadaw Myen hpyendap ndau tawn ai re.

Raitimung, Lahta Sammung e Myen hpyendap gaw KIA dap daju ni hpe htu gasat ai lam ni galaw wa ai kaw, June praw 7 hta Muse ginwang kata KIA Dapba (6), Dung (9) a headquarter Htan Hpa Bum hpe gasat zing ai lam galaw wa sai. Dai hpang, matut manoi Kutkai ginwang kata na KIA Dapba (4), Dung (8) a Na Hkyem dap hpe gasat zing nna wan nat jahten kau da ai lam galaw ai rai nga ai.

Ya na zawn, Myen hpyendap gaw Lahta Sammung KIA dap ni langai hpang langai hpe htu gasat zing ai lam ni galaw nga tim, bilateral gap hkat jahkring na lam bawngban nga ten, asuya dap ni hpe sa htim gap ai lam n galaw na matu KIA dap ni hpe matsun da nga dingyang naw rai nga ai.

Shiga

Bat lahkawng laman 2-lang Myen hte KIA gasat gala byin

Leave a comment

Myen asuya dap hte Wunpawng Mungdan Shanglawt Hpung, KIA, lapran bat lahkawng laman lahkawng lang gasat gala ai lam gaw Lahta Sammung, Kutkai ginwang kata June 17, bat Masum Ya jahpawt daw byin wa sai re.

Kutkai a sinna-dingdung maga KIA Dapba (4) npu Dung (8) Kaleng ninghtawn rung daju ai Nawng Maw Bum de Myen hpyen hpung ni htu lung wa ai majaw akajawng gap hkat wa ai re nga, KIA Dapba (4) hpyendu langai ya na zawn tsun ai.

“Myen ni htu lung wa ai gaw masum mali ya daram rai sai, jut masum kaw na htu lung wa ai re. Tat-ma (88) hte kaga dap ni lawm ai hpyen hpung n-gun yawng 400 daram re” nga nna bat Masum Ya shana de tsun ai re.

KIA Dapba (4) ginwang salang ni Kaleng Ninghtawn Rung kaw du nga ten, htu lung wa ai Myen hpyen hpung hte ninghtawn rung shimlam la ya ai KIA Dapnawng (29) hte hkrum katut gasat poi byin ai re lam, lahta na KIA hpyendu wa tsun ai re.   

Lai wa sai bat mi jan Muse ginwang kata KIA Dapba (6) npu Dung (9) headquarter Htan Hpa Bum hpe June praw 6, 7 hta Myen hpyendap Tat-ma (88) hte (99) pawnghpawm hpyen hpung kaw nna sa htim gasat zing ai lam galaw lai wa sai re.

Mungkan COVID-19 ana zinli byin nga ai ladaw, jahten sharun hpung ngu masat ai Rahkai AA hte byin ai majan hta lai nna, ngam ai shara ma hkra mungdan ting madang May 10 kaw nna August 31 du hkra majan jahkring tawn ai lam, Myen hpyendap ndau da tim, Lahta Sammung e KIA hpe ‘ginra jasan jaseng masing gabaw’ hte htu gasat ai lam ni galaw nga ai re.