Category Archives: Asuya

Asuya, Shiga

Hkringmang Daju hte Rapdaw Ningbaw magam lit hpe Party garan shatsam na matu tang shawn

Leave a comment

Mungdaw Hkringmang Daju hte Rapdaw Ningbaw magam lit ni hpe party garan shatsam na matu NLD hte ra lata poi dang ai amyusha bawsang party na dat kasa ni a January praw 1 (dai ni) hkrum zup ai hta bawngban ai hpe chye lu ai.

1947 ning Pang Lung ga sadi hpe mahta ai Federal mung masa byin lu hkra Asuya uphkang dap (Executive) hte Upadi ka lajang rapdaw (Legislature) magam lit hpe nbung ai party hpe garan shatsam na matu tang shawn ai lam KSPP party ningbaw Dr. Manam Tu Ja tsun ai re.

“Federal hta upadi ka ai rapdaw, uphkang magam dap hte tara jeyang ai dap nga nna nga ai. Madung gaw upadi ka ai hte uphkang ai ahkang aya gaw ta tut hta grai ahkyak ai. Ndai lahkawng hpe shada rap ra hkra gawn jep na ahkyak ai. Hkringmang Daju hte Rapdaw Ningbaw lit hpe party garan na matu ningmu tang shawn da sai re” nga nna tsun ai.

Myitkyina, Amyusha Democracy Ginjaw Party NLD Rung e January praw 1 ya shani hkrum zup hpawng hpe NLD maga marai 3 committe rai nga ai Dr. Aung Moe Nyo, Nan Khin Htwe Myint hte Slg. Nhtung Hka Naw Sam ni woi awn ai rai nna, mungdaw hkringmang daju Dr. Hkyet Awng hte Rapdaw Ningbaw yan mung shang lawm ai re.

Lai wa sai 5 ning tup hta Jinghpaw mungdaw hte kaga mungdaw ginra law law e, rapdaw ningbaw hte ningtau ningbaw lit yawng hpe NLD hkrai lit la galaw nga ai re.

Jinghpaw mungdaw e ra lata poi dang ai amyusha party na dat kasa marai 10 nga ai raitim, dai ni na hkrumzup hpawng hta KSPP na marai 3, Du lay party na marai 2, NDP(K) na marai 1 hte sha shang lawn ai re.

NLD maga amyusha baw sang party ni hte hkrumzup na matu tsun da ai raitim, ndai kalang hkrumzup ai gaw Party to Party nre ai sha, ra lata poi dang ai dat kasa ni hkrai san san hkrum zup ai lam sha re hpe chye lu ai.

KSPP pawng hpawm party hku nna mung ndai hkrum zup ai lam gaw party a gawng malai nre sha, dat kasa ni a ningmu sha re nga nna tsun ai re.

Asuya, Shiga

Hpakan lam gram galaw na matu mungdaw asuya hta ahkang n-nga

Leave a comment

Hpakan lam hpe gram na matu Mungdaw asuya hta ahkaw ahkang nlu ai nga nna, mungdaw hkringmang daju Dr. Hkyet Awng tsun ai re.

‘Mu Gawng- Hpakan lam gaw mi shawng e mungdaw asuya hparan lu ai jahpan hta lawm ai. Raitim ya hpang de munghpawm asuya kaw nna hparan kau ai majaw, ya du hkra Hpakan lam galaw na matu hpang hkrat taw nga ai” nga nna July 17 ya shani mungdaw asuya a 4 ning hpring shiga dap salang hpawng hta hkringman daju Dr. Hkyet Awng tsun ai re.

Hpakan lam gaw Mu Gawng kaw nna deng (59) galu ai rai nna, lanam ta rai yang, lam nmaw hka lim ai majaw lai wa lai sa yak hkak ai lam nga ai re.

Ginra masha ni hku nna mung hpakan lam hpe gram ya na matu lai wa sai 2017 kaw nna mungdan gumsan magam hpang de laika bang hpyi shawn sai raitim, masa lam wa yu maram ai hta lai nna dai ni du hkra hpa lak lai a lam nnga ai nga nna Hpakan Amyusha Zinlum Hpung, amu madu Dashi Naw Lawn tsun ai re.

Lung Seng kaw nna shang gumhpraw law malawng lu ai Myen mung hta, kaja lung seng htu shaw sha hkrum ai Hpakan ginra gaw hkamja lam, hpaji lam, buga mare rawt jat lam hte kaga hkum sumhpa hta hpang hkat nga ai re.

Asuya, Shiga

Lam Galaw Mawdaw nat jahten ai ni hpe rim tawn da

Leave a comment

Myitkyina Dap Kawng lam gram galaw nga ai Power Five Star Company a mawdaw hpe nat kau ya ai masha marai 6 hta na marai 4 hpe rim da lu sai lam July 23 ya shani Mungdaw Asuya Pyada dap kawn ndau ai re.

Mawdaw nat ai majaw rim da hkrum ai ni(Sumla-Mungdaw asuya pyada dap)

Dai marai 4 gaw Power Five Star company a magam gun ni rai nna, ya ngam ai marai 2 hpe mung naw sagawn taw na ai lam Myitkyina ginwang pyada dap kaw nna chye lu ai.

Myitkyina Sumpra Bum lam, Dap kawng lawk lam kaba gram taw nga ai Power Five Star Company a lam galaw mawdaw hte hka htaw mawdaw hpe June praw 4 ya jahpawt nat jahten hkrum ai hpang, ndai amu tawt lai ai masha ni hpe dingyang sagawn taw ai rai nga ai.

Mawdaw nat ai majaw rim da hkrum ai ni(Sumla-Mungdaw asuya pyada dap)
Asuya, Shiga

Mali hka bai rawt tung wa, lamu ga nem ai lawk nkau hpe sadi jaw da

Leave a comment

Mali hka gaw July 21, Dai na de hkying 6 daram hta Myitkyina mare hta masat 978 Centimeter du sai rai nna, hkying hkum mi hta (+5) shadang hte ding yang hka kaba rawt taw nga ai lam chye lu ai.

Myitkyina mare hta gaw masat 1000 Centimeter du yang, lawk nkau hta hka shang wa mai majaw yawng ni sa di na matu mungdaw asuya lamu marang dap kaw nna ndau da ai re.

Myitkyina mare a hkrit tsang hpa masat shadang gaw 1200 re lam chye lu ai.

Mali hka masat 1000 CM du yang, Myitkyina mare kaba kata na Lekone sinna lawk, Rambo hte Chyet Paung Chan lawk ni hta hka shang ai lam dingyang byin nga ai re.

Asuya, Shiga

Coronavirus hpe anti-flu hte AIDS tsi hpan 2 hte tsi shamai ai lam, Thai tsidu ni tsun

Leave a comment

Coronavirus ana kanu hte Thai mungdan e machyi hkrum nga ai Miwa amyusha langai hpe Anti-flu (mak hkalawng tsi) hte AIDS tsi hpan 2 hpe gayau nna tsi tsi ai hpang, ana hkyem sa wa ai lam Thai tsi du ni February praw 2 ya shani tsun ai re.

Asak 71 ning asak kung Miwa hpawmi langai hpe hkying hkum 48 laman hkyem sa hkra tsi shamai ya lu sai lam Bangkok Rajvithi tsi rung na tsidu lahkawng tsun da ai hpe Thai Bangkok Post Shiga Laika hta mu lu ai re.

Miwa mung hta mung machyi ai kaw nna mai tsai wa sai marai (328) hpe tsi rung shayu dat sai lam Miwa Xinhua shiga hta tang madun tawn ai re.

2019 na Miwa mung Wuhan mare kaw nna kap bra wa ai ndai ana hpe 2019 Novel Coronavirus ngu mying jaw da ai re.

Mungkan Hkamja Dap WHO gaw ndai ana hpe sadi maja ra ai madang rai sai lam ndau da ai hpe mu lu ai.

Dai ni du hkra Coronavirus ana kap bra ai mungdan 20, kap bra masha 14000 jan hte masha si jahpan 200 jan sai lam chye lu ai.

 

Asuya, Shiga

hkum gahtet ai Miwa mungmasha marai 3 hpe mungdan kata n shang shangun

Leave a comment

Coronavirus ana kanu nbyin hkra jep ai hta Kambaiti ga jarit de shang wa ai Miwa amyusha marai 3 gaw hkum gahtet ai 38 degree C hta jan ai majaw Myen mung kata de shang na ahkang n jaw ai nga nna dai ginra hta du nga ai Waimaw ginwang na asuya tsi du langai tsun da ai re.

Myen-miwa ga jarit kambaiti e ana jep ai lamang hpe mungdaw hkamja dap gaw mani kaw nna galaw hpang nga sai rai nna, Miwa hkran na Myen mung masha marai 300 jan mungdan nhtang wa yang jep lu na matu mung hkyen nga ai lam tsi du Dr. Thein Myo shi a facebook hta ka da ai re.

Bai nna Thermal scanner nlu shi ai majaw, Nay Pyi Taw kaw nna htet da ai lam matut ka da ai re.

Bai nna ga jarit Loije gate hte mungdaw kata nbungli daru ni hta mung jep nga ai lam Jinghpaw mungdaw hkamja dap kaw nna ndau da ai re.

Miwa mung Hubei mungdaw Wuhan mare kaba kaw nna kap bra hpang wa ai, coronavirus gaw ya yang mungkan madang marai 4000 jan kap nga sai rai nna, marai 100 jan si sai lam Miwa mung shiga ni hta mu lu ai re.

 

Asuya, Shiga

Danai Ja maw, Pat maw e nhprang htu na lam Myen hpyendap dap awn daju hpe hpyi shawn da

Leave a comment

Myen hpyendap zing da ai Hugawng Pa Ja maw, Pat maw ginra ni hta tara shang nhprang htu sha lu hkra ahkang jaw na matu Myen Hpyendap Dap Awn Daju Dukaba Min Aung Hlaing Hpang de Danai Amyothar Rapdaw dat kasa Slg. Lin Lin Oo laika tang da ai lam chye lu ai.

Ja hte Pat nhprang pru ai Nambyu ginra hkan e shawngde Wunpawng Mungdan Shanglawt Hpyendap KIA Dap ba 2 npu dung 14 uphkang ginra rai nna, 2018 e Myen hpyendap ni wa gasat zing kau ai re.

Hpyendap zing kau ai dai ginra ni hta mung shawa ni hpe nhprang htu sha na matu asuya hku nna masing galaw hpang wa ai raitim, hpyendap ahkang njaw ai majaw rapdaw dat kasa Slg. Lin Lin Oo hku nna January 20 ya shani laika bang ai re.

Mungshawa ni hpyi shawn ai majaw Danai Ja maw pat maw ginra lamu ga eka 6918.95 hta sut nhprang htu sha lu hkra mungdaw sut nhprang hkringmang dap kaw nna lajang ngut sai raitim, tatut lamu ga de sa yu shadawn ai lamang hta dai ginra dap jung da ai hpyendap nhkraw ai hpe chye lu ai.

Asuya dap hte Wunpawng Mungdan shanglawt hpyendap KIA lapran mungdaw sinna hkran Hugawng pa Ja hte Pat pru ai shara ai 2017 ningdaw kalang, 2018 e byin ngut ai hpang, dai ginra hpe Myen hpyendap ni zing kau ai re.