Category Archives: Majan Shiga

Majan Shiga, Shiga

KIA Dung 9 hpe Myen hpyendap htim gasat ai nhtoi bat mi du sai

Leave a comment

Wunpawng Mungdan Shanglawt Hpyendap KIA Dap Ba 6, Dung 9 hpe Myen hpyendap ni nbungli hte hpawn n gun kaba htim gasat taw ai gaw nhtoi bat mi du sai re.

Mungmyit Sinli, Kuthkai Sinpraw Dingdung maga, NaHpai mare makau, KIA Dap Dung 9 Kawng Sak Bum hpe February 14 ya kaw nna, Myenhpyendap maga Jet nbungli hte numdaw 4 lang wa gap bun nna, lak nak kaba mung n hkring n sa gap bun taw ai lam chye lu ai.

“dai ni mung, nbungli langai lung wa nna, numdaw 2 wa gap sharu bun kau da na, bai yu mat wa ai. Namhpakka kaw na gaw lak nak kaba hkrai gap shapraw, dai ni tup mung gap tik tik, mani tup mung gap tik tik re ka rai nga ai.” nga nna majan hte ni gahtep ai Namhpakka ginra masha langai KNG hpe tsun ai re.

February 13 ya shani kaw nna, Myen hpyendap maga mawdaw 10 jan hte, hpyen n gun 300 hpe hpyen man 3 hku htim taw ai re.

N dai majan hta, Myen hpyendap maga hka la hkrat sum ai law ai majaw, Namhpakka Hk.L.Y 123 dap hte deng 105 ginra kaw nna, shani shana n hkring n sa lak nak kaba gap bun taw nna, nbungli hte mung, 2 ya tup wa gasat taw ai rai nga ai.

Dai zawn n gun kaba hte htim gasat taw ai majaw, KIA maga mung hka  la si sum ai lam nga ai hpe shiga na lu ai raitim, kata lam tup hkrak gaw n chye lu shi ai re.

Myen hpyen dap dai zawn, lagaw dap, nbung lam, lak nak kaba ni hte htim gasat taw ai majaw, ni htep ai mare masha ni mung myit tsang nga ai lam, Mungsan mare masha langai n dai zawn matut tsun ai.

“Mare masha ni gaw tsawm ra mi tsang taw ai ka rai nga ai. Myen hpyendap hku na gaw aja awa htim ai ka rai nga ai. sanat kaba mung the gap ya, nbungli the mung aging wa gap, shanhte maga tsawmra kyin ai ka gaw rai malu nga. Shanhte maga mung tsawm ra mi machyi mat na, ya yang gaw, mani shawng shani kaw na, mani du hkra gap ai naw ngam taw ai ni hpe mung, wang tawn da ai da, wora ni n lu pru jang she, sanat kaba mung the gap, nbungli the mung wa gap re ka rai nga ai.”

Myen hpyendap laknak kaba gap bun ai majaw, Namhpakka mare na, ginra mung shawa langai mung lak nak si hkra nna hkala machyi ai lam nga ai hpe chye lu ai re.

Myen hpyendap gaw, Dung 9 ginra hpe atik anang bai htim gasat wa ai lam gaw Dap Ba 6 hpe htim mayu ai masa byin taw ai lam, KIA shawng lam shi jaw ni tsun ai re.

Kuthkai mare hte ni dik, KIA Dung 9 ni gaw, Myen hpyendap a hpyen shamu shamawt ai lam hpe jahkring hkring dingbai dingna jaw ai majaw, Dung 9 hpe shatsai mayu ai htim gasat majan byin mai ai lam ginra masha ni tsun maram ding lik nga ma ai re.

Ndai ginra hta sha, lai wa sai 2022 ning September shata hta mung, Myen hpyendap gaw, lagaw dap, laknak kaba ni hte hpawn, nbungli hku laja lana htim gasat wa sai re.

Majan Shiga, Shiga

KIA Dap ba 9 npu dap dung 6, 26, 44 shara ni hta Myen hpyendap hpe kalang ta htim gasat

Leave a comment

Nawng Lut, Kamaing ginra hkan na Myen hpyendap shara 4 hpe Wunpawng Mungdan Shanglawt Hpyendap KIA Dap Ba 9 ni dai hpawt maga kalang ta sa htim gasat ai lam chye lu ai.

Nawng Lut Ginwang, Sezin mare makau Shwe Twi ngu ai Myen hpyen dap shara, Namlik Hka makau na SNA dap, Kamaing Myen hpyen Byuha kawng, Nam Sheng Myen hpyen dap ni hpe Wunpawng Mungdan Shanglawt Hpyen dap KIA Dapba 9  ni sa him gasat ai re lam chye lu ai.

January 26 ya jahpawt jau hkying 4 chyen daram aten, Seng Zin mare makau Myen hpyen dap hte Samhkyeng SNA dap ni pawng hpawm na nga ai Shwe Twi dap hte, Namlik Hka makau na SNA dap ni hpe KIA Dung 26 dap ni sa htim gap gasat zing kau lu ai lam shawng lam hpyen shi sawk ni kaw na chye lu ai.

Dai shara sa htim gap gasat ai hta, sinat laknak machyu pala alaw alam zing la lu ai rai nna, lahkawng maga kade daram sum machyi ai ngu hpe gaw tup hkrak n chye lu ai re.

Matut nna, Kamaing Myen hpyen byuha kawng hpe KIA Dapba 9 n pu Dung 44 ni laknak kaba ni hte sa htim gap ai hpang, lahkawng maga gasat gala byin wa ai lam chye lu ai.

Dai hpawt manap jau hkying 4 ram aten sa htim gap gasat wa ai rai nna, lahkawng maga sum machyi lam nga n nga re hpe gaw a tsawm tup hkrak n chye lu ai.

Kamaing Myen hpyen byuha dap a dap lakung langai rai nga ai, Nam Sheng mare kyuhpyi bum hta dap jung taw nga ai Myen hpyen dap ni hpe mung dai hpawt manap hkying 6 ram ten KIA Dung 44 hte PDF pawng hpawm dap ni sa htim gap gasat wa ai lam nga ai re hpe ginra masha ni kaw na chye lu ai.

Dai Nam Sheng Myen hpyen dap hpe sa htim gap gasat wa ai rai yang, mare yawng nat jahten kau ya na lam, Myen hpyen dap gaw mare salang hte nawku hpung ningbaw ni hpe tsun shadut da ai mabyin nga ai majaw, ya ten ginra mung mare masha ni myit tsang taw nga ai  chye lu ai.

Hpakant lam shara shagu hta majan byin wa ai majaw, dai hpawt manap jau Myitkyina Hpyen n bungli pa hta n bungli shamu shamawt wa ai lam ni nga wa ai re hpe Myitkyina Maw Hpawng ginra masha ni tsun dan ai re.

Wunpawng Mungdan Shanglawt Hpyen Dap KIA Dap ba 9 n pu hta, Dap Dung 6, 26, 44, ni lawm ai rai nna, dai dap dung ni yawng kalang dat majan hpaw wa ai lam mung rai nga ai.

Majan Shiga, Shiga

Myen hpyendap ni Mungshawa nga ai mare de laknak kaba gap bang

Leave a comment

Mungmyit Sinli Ga, Muse lahta Mungbaw, Wing Seng mare hta Myen hpyen dap ni n dai laman shana shagu laknak kaba gap shadam bun ai majaw, ginra masha ni hkrit tsang taw ai lam chye lu ai.

November 21 ya shana, Wing Seng Sama kawng kaw na gap dat ai laknak kaba si gaw Hka Nan lawk na maran n ta wa hkrak hkra ai majaw, dum nta masha ni hkala hkrum wa ai lam chye lu ai.

“Myen hpyen dap ni n dai lahkawng masum ya shana shagu laknak kaba gap shadam ma ai, Ying La Bum kaw na mung, Sama bum kaw na mung gap shadam dat dat rai ma ai, mana gap dat ai laknak kaba si langai Hkanan lawk na Maran n ta wa hkrat ai, n ta mung hten nna, Maran ding gai mung hkala hkrum ai, dai zawn laknak kaba hkrai gap shadam bun na anhte mung shawa ni hkrit na pyi n lu yup ai” nga tsun dan ai re.

Dai ginra hta Myen hpyen dap ni shamu shamawt ai lam grai wa n nga ai raitim, bum kaw na laknak kaba gap bun bun re lam ni ding yang byin taw ai lam chye lu ai.

Ya ten dai ginra hta, Myen hpyen dap hte KIA, MNDAA dap ni lapran hpyen masa yu maram hkat taw ai rai nna, lai wa sai bat hta mung, Mungbaw Mai Hpang Mare hta majan byin wa sai re.

Majan Shiga, Shiga

Hpungkyi Jawng kaw Makoi Rawng Nga ai Myen Hpyen Dap ni, Laknak kaba hte gasat hkrum

Leave a comment

Hpakan Gwi Hka mare makau na Sap Pya Chaung mare a Hpungkyi jawng hta Myen hpyen dap ni wa du shara jahkrat nga ai ten, Wunpawng Mungdan Shanglawt Hpyen Dap KIA ni, November 17 ya jahpawt 7 chyen daram aten hta laknak kaba 2 lang gap bun nna, Myen hpyen dap maga si hkala hkrum wa ai lam chye lu ai. Continue reading Hpungkyi Jawng kaw Makoi Rawng Nga ai Myen Hpyen Dap ni, Laknak kaba hte gasat hkrum →

Majan Shiga, Shiga

Seng Tawng Myen hpyen Dap Gasat Hkrum nna Hkala ai lam nga

Leave a comment

Hpakan Seng Tawng lahta tsang jawng makau hta dap jung nga ai Myen hpyen dap ni hpe Mung Shawa Makawp Maga Dap PDF ni kaw na 79 mm laknak si lahkawng hte sa gap bun ai hta Myen hpyen dap maga de na marai 5 ram hkala hkrum ai lam chye lu ai.

November praw 7 ya shana maga hkying 4 ram aten Hpakant PDF ni sa gap bun ai rai nna, dai hta wa du taw ai Myen hpyen hpung ni marai 5 ram hkala hkrum wa ai re lam, Hpakant ginra masha ni KNG shiga dap de tsun ai.

“Mana maga hkying 5 ram hta sa gap bun kau da ma ai, n sen tsawm ra ja ai, si ai lam nga n nga hpe a chyawm a tsawm tup hkrak n chye lu ai, mana gaw marai 5 si ai zawn zawn nga nna, si gaw n si sam ai, tsi tsi taw ai nga ma ai.” nga tsun dan wa ai.

Dai sa gap hkrum ai Myen hpyen dap kawng hta Myen hpyen n gun 100 jan ram nga nna, gap hkrum ai hpang, dai hpyen dap kawng kawn sinat kaji hte 50 lang jan gap shadam bun wa ai lam chye lu ai.

Lai wa sai November praw 4 ya shana mung, Hpakant Ngapyaw Taw lawk na Myanmar Tsipwa Ye Bank makau hta mung bawm kapaw wa ai rai nna, Balik marai 3 hkala hkrum ai lam nga wa sai re.

Hpakant muklum kata n dai laman Myen hpyen dap a shara ni jahkring hkring gasat hkrum ai lam ni nga taw ai lam sagawn chye lu ai.

Majan Shiga, Shiga

Tingkawk hte Nam hpyek lapran Myen Hpyen Hpung ni gasat hkrum

Leave a comment

Daihpawt manap Dainai kaw na Jahtu Zup maga de yu wa ai Myen hpyen hpung ni hpe Wunpawng Mungdan Shanglawt Hpyen dap KIA dung 43 ni lam lapran hta hkap gasat dat ai lam chye lu ai.

Danai kaw nna Jahtu Zup maga de dai hpawt manap hkying 6 ram aten lai yu wa ai Myen hpyen hpung n gun 20 hpe KIA kaw nna, Nam Hpyek hte Ting Kawk mare lapran hkap shing la gasat dat ai hpang aten gadun gap gasat hkat wa ai re lam chye lu ai.

Dai zawn hkap shingla gasat dat ai hta Myen hpyen dap maga si hkala hkrum ai lam nga ai rai tim, mabyin masa hpe hkrak n chye lu shi ai.

Dai Myen hpyen hpung ni gaw, Nambyu Nam Hkam mare ni de shamu shamawt hkawm nna, Jahtu zup dap de bai n htang yu wa ai lam hta hkap gasat hkrum ai re lam ginra masha ni tsun ai.

Ya ten Myen hpyen dap ni kaw Hugawng Danai Lido lam kaba maga de hpyen n gun laknak arung arai ni ding yang jat bang taw nga ai lam, mu ai ginra masha ni tsun dan ai.

Ya ten hta Jinghpaw mungdaw shara shagu ni hta Myen hpyen dap the KIA dap lapran hpyen masa shaja hkat taw ai masa rai nna, galoi mung sadi maja let nga na lam KIA ginjaw kaw na Mung mare masha ni hpe tsun sadi jaw da ai re.

Majan Shiga, Shiga

Lung Ja Bum lagaw hta laknak kaba hte gap gasat hkat

Leave a comment

N’Mawk Lung Ja Bum de dai hpawt manap kaw nna, Myen hpyen dap hte KIA dap lapran laknak kaba ni hte gap gasat majan bai byin taw ai lam chye lu ai.

Dai hpawt manap hkying 10 ram kaw nna Lung Ja Bum n pu Tsing Du kawng hta shara la nga ai Myen hpyen dap Dapnu 88, Hk M Y 437 dap ni hpe Wunpawng Mungdan Shanglawt Hpyen dap KIA Dung 15 ni kaw nna laknak kaba hpan hkum hte sa htim gap gasat taw ai re lam, shawng lam hpyen shi sawk ni KNG shiga dap hpe tsun dan ai re.

“Ya gaw anhte maga de na dai Lung Ja Bum n pu Tsing Du Kawng hta du nga ai Myen hpyen dap ni hpe laknak kaba hpan hkum hte sa gap bun taw nga ai, ya ten gaw lahkawng maga laknak kaba ni naw gap bun hkat taw ai, lagaw lam dap hte htim gasat ai lam gaw rai n nga shi ai” nga tsun dan ai re.

Dai zawn lahkawng maga majan laja lana gap gasat taw ai lam ni a majaw, dai ginra na mung mare masha ni Mam dan na matu dut dang taw nga ai re.

Mangai mam myin taw nga ai ten, Hka Nan, Lung Ja, Wa Wang mare na mung mare masha ni gaw, mam dan shu la na lam hta yak hkak taw nga ai lam hpe mung mare masha langai KNG shiga dap hpe ya na zawn matut tsun dan wa ai re.

“Hka Nan, Lung Ja, Wa Wang dai mare mayan na mung mare masha ni a hkau na ni de laknak kaba jahkring hkring hkrat ai, n kau hkau na shing nawm hkan wa hkrat ai ni nga ai, dai zawn hkau na pa ni de laknak kaba jahkring hkring wa hkrat ai majaw, asak hte galai na gadai n gwi sa dan ai, dai hpawt manap mung shawa n kau mam sa dan taw ai, laknak kaba ni grai bai ngoi wa ai majaw, yawng bai hprawng n htang ma ai.” nga tsun dan ai re.

Ya ten Myen hpyen dap gaw dai ginra de hpyen n gun kaba hte ding yang htu shadut taw ai rai nna, nbungli, laknak kaba ni hte gap bun taw ai re.

Dai zawn majan kaba laja lana byin wa ai majaw, dai ginra na mung mare masha ni Nmawk mare kaba hte Manmaw mare kaba ni hta sa du hprawng shing byi taw nga ai rai nna, dai hpyen yen ni a matu malu masha garum ningtum lam ni mung ra ahkyak taw nga ai lam chye lu ai.

Majan Shiga, Shiga

KIA Dung 9 hpe Myen hpyen dap ni laknak n gun hte gasat taw

Leave a comment

Mungmyit Sinli Kut Hkai Ginwang, Wupawng Mungdan Shanglawt Hpyendap  KIA Dap Dung (9), Kawng Sak Bum hta majan laja lana byin taw ai hta, dai ni shani ka ang hkying 12 aten ram kaw na dai na maga de du Myen hpyen dap gaw n gun hte gasat taw nga ai lam chye lu ai.

Myen hpyen Helicopter n bung li lahkawng hte 3 lang da bat, wa htim gap gasat taw ai lam, myi chyaw mu ginra masha langai tsun ai gaw, “Dai hpawt manap jau kaw na, Kawng Sak Bum mayan hta gap gasat hkat taw ai, dai ni shani ka ang ram kaw na gaw Ji Grawng Nbungli 2 hte mung wa htim gap gasat ai sha n ga Nam Hpak Ka Myen hpyen dap kaw na lak nak kaba ni hte mung ding yang gap sharu bun ya taw ai” nga KNG shiga dap de matut tsun dan ai re.

Ndai zawn gasat taw ai gaw, Myen hpyen dap Dapnu (77 ) ni rai nna, mani kaw na Namhpak Ka hte Kut Hkai lapran mayan hta Hpyen n gun 400 ram hte htu shadut shamu shamawt hkawm taw ai re lam chye lu ai.

September praw 6 ya shani hta mung Kut Hkai mare shang, Asia World Gate makau hta myen hpyen dap hte KIA Dung 9 lapran majan byin wa sai rai nna, Myen hpyen dap maga na laknak kaba si gap shadam bun ai majaw, Maw Hate mare na, mung shawa marai 4 hkala hkrum wa sai hta Ma langai hkala sawng ai lam chye lu ai.

Ya ten KIA Dung 9 ginra hpe Myen hpyen dap ni kaw na laja lana htim gasat zing la na hkyen taw ai re majaw, Laknak kaba hte nbungli ni hte gap sharu bun taw ai re lam, shawng lam hpyen shi sawk ni mu mada nga ai.

Kawng Sak Bum gaw, Nam Hpakga Muse lam kaba lapran Hu Mung mare a sinpraw maga na bum re lam chye lu ai.

Majan Shiga, Shiga

Mare Masha ni Hpyi Shawn ai zawn, Jahtu Zup Ginra de Majan Zim na, Nmai Byin  

Leave a comment

Danai Lido lam kaba n tsa, Jahtu Zup Pyi Thu Tsit dap hte Wunpawng Mungdan Shanglawt Hpyen Dap KIA hpe lai wa sai August 27 ya shani, Jahtu Zup, Awng Ra, San Pya mare kahtawng 3 na mung shawa n kau, mare makau grup yin hta majan n shabyin ya na lam hpyi shawn was ai raitim, lahkawng maga gasat wa na mahtai sha jaw wa sai lam chye lu ai.

KIA Dap Ba 2 hte Danai Myen hpyen dap D K Ts de sa nna, sa hpyi nyem ai hpang, dai zawn bai n htang shana wa ai nga, sa du jahkrum ai salang langai KNG shiga dap de tsun dan wa ai.

“Madung hku na dai ginra ni hta majan n shabyin ya na hte lahkawng maga sim sim sa sa hte nga na matu sa bawng jahkrum ai re. rai tim KIA maga de na gaw Pyi Thu Tsit dap ni hpe jasan nan jasan ra na re nga nna, Myen hpyen dap mag ana mung KIA htim gasat wa yang gaw gasat ra na re nga nna htang dat ma ai” nga tsun dan ai re.

Dai zawn lahkawng maga na tsun dat ai shiga a majaw Jahtu Zup ginra hta majan n hpang laja lana gap gast hkat wa mai ai ngu maram let, Jahtu Zup, San Pya, Awng RA mare na mung shawa nkau, shim lum ai mare ni de hprawng yen taw nga sai lam matut chye lu ai.

Majan galoi laja wa na nchye ai raitim, mani September praw 2 ya shani gaw, Myen hpyen n bungli langai KIA Dung 14 ginra de pyen gayin mat wa sai lam chye lu ai. Bai nna, Myen hpyen dap hpyen n gun 200 ram mung ndai bat laman Lawa mare kaw na, nam lam hku Nawng Mi, Wara Zup maga de lai lung wa sai lam Dumbang ginra masha ni tsun ai.

Dai Myen hpyen hpung ni gaw, n dai shata laman Monyin maga de na lai lung wa ai Myen hpyen dap Dapnu 88 ni rai nna, Jahtu Zup Pyi Thu Tsit dap de hpyen n gun garum lung wa ai hpyen hpung ni re lam chye lu ai.

Dai rai nna, majan byin wa na hpe myit tsang ai majaw, shani shagu ngu na htawt sit hprawng pru taw nga ai rai nna, n ta sin ai marai 1, 2 sha nga sai lam Sanpya mare masha kawn chye lu ai.

Jahtu Zup ginra hta lai wa sai June shata ram kaw na hpyen masa shaja hkat taw ai rai nna, August 11 ya jahpawt hta San Pya Pyi Thu Tsit dap hpe KIA dap maga na sa htim gap gasat ai lam ni byin wa sai.

Majan Shiga, Shiga

Sezin Mare de,  Myen hpyen dap ni nbungli hte bawm wa htim gap gasat lawm

Leave a comment

Nawnglut Ginwang Sezin mare de, Myen hpyen dap ni Jet Fighter nbung li hte dai ni August 9 ya shani, lahkawng lang da bat sa gap bun taw ai majaw, grup yin nga mung shawa ni dumbru dumbra hprawng yen taw nga sai lam ginra masha ni tsun wa ai.

Sezin Myen hpyen balik dap hpe Wunpawng Mungdan Shanglawt Hpyendap KIA hte Mung Shawa Makawp Maga Dap PDF ni sa htim gap gasat nga ai ten, n bungli du wa nna, mare makau grup yin hkan bawm bawm sa jahkrat kau da ai zawn, shana maga mung kalang sa gap bun mat wa ai lam ginra masha langai KNG shiga dap de ya na zawn tsun dan ai .

“Dai ni shani ka ang Balik dap makau grup yin de sinat kaji kaba ngoi hpang wa ai, dai hpang n bungli lahkawng pyen du wa nna, mare ka kata makau grup yin ni hta n bungli bawm 10 lang jan gap jahkrat kau da na bai n htang mat ai, dai na maga hkying 3 ram hta kalang bai sa gayin gap mat wa ai, mung shawa ni hta si hkala ai mung nga na re, ya a tsawm tup hkrak n chye tsun shi ai, dumbri dumbra she naw hprawng ayai jawng taw ai,” nga ai.

Dai zawn n bungli hte sa htim gap gasat ai hta mare kata mung shawa ni si hkala ai lam nga ai rai tim, dai ginra hta Phone matut mahkai n lu ai majaw, a tsawm tup hkrak n chye lu shi ai re.

Mani August praw 8 ya shani, Sam Hkyeng hpyen dap SNA hte Myen hpyen dap hpe sa htim gap gasat hpya kau ya ai hta yawm htum marai 20 ram si hkrum ai majaw, ya na zawn nbung li hte bai wa gap bun wa ai lam rai nga ai.

Lai wa sai July shata kaw na Sezin ginra hta Myen hpyen dap hte Sam Hkyeng dap SNA ni pawng hpawm nna, KIA hte PDF hte majan gap gasat wa ai gaw, dai ni ten du hkra rai nga ai re.

Sam Hkyeng SNA dap ni kaw na Myen hpyen dap hte pawng hpawm ai lam n nga ai nga, Sam Hkyeng Shiga dap ( The Voice of Shanni ) kaw galoi mung tsun ningdang taw nga ai raitim, n dai kalang na majan hta sakse hte hkrak Myen hpyen dap maga de pawng hpawm gasat taw ai mu lu ai lam chye lu ai.