Balawng TNLA Dap ni gasat Zing Uphkang taw nga ai Kutkai Mare kaba hte, Pyihtaungsu Lam kaba n tsa na TNLA Dap Shara law malawng hpe Kokang MNDAA Dap ni gasat zing kau ma sai lam, dai ginra na mung Shawa ni tsun ai re.
Dai ginra hpe Kokang dap maga March 14 ya jahpawt jau kaw na Drone Laknak kaba ni hte gap gasat ai n htoi lahkawng ya laman hta gasat zing madu kau ma lu ai rai nga ai.
“Ndai kalang na Majan gaw lahkawng maga na Mung Shawa hpe grai makawp maga ai ngu mu ai, TNLA ni mung Mogok hpyen yen ni hpe shim ai shara de woi yen mat wa ai, Kutkai pa ting na mung shawa ni jamjau hkra n galaw ai, Kokang maga na ni mung, mung shawa hpe myit shalawm ya ai law ai, Majan zim ai hte mung shawa ni pru wa ai rai tim, hpa n galaw ai, jep joi ai lam ni hpa n galaw ai, hkala hkrum ai balik zawn re laga asuya magam gun ni hpe nga tim, tsi rung de htaw sa ya ai, hkrit na zawn re si taw ai mang ni hpe mung kalang ta mawdaw hte hta lahkawn kau ma ya ai,” nga Kutkai ginra na amyu shayi langai tsun dan wa ai re.
Jinghku Rawt Malan Hpung ni a 1027 Majan Masing
Kokang MNDAA hte Balawng TNLA dap ni gaw, Jinghku rawt malan hpung ngu nna, shaning 10 ning jan rau jawm hpawng de nna, Myen Hpyen dap hpe jawm gasat shamyit na matu myit hkrum gasadi jawm la nna, 1027 majan masing hpe 2023 ning October 27 ya jahpawt kaw na jawm htim gasat hpang wa ai hta, Lahta Sam Mung ginra law malawng hpe jawm gasat zing madu la lu wa ma ai re.
Lahta Sammung ginra law malawng sha n ga, Dingdung Sammung Myen Hpyen dap daju Sinpraw Dingdung Myen Hpyen dap daju (အရှေ့မြောက်တိုင်းစစ်ဌာနချူပ်) Lashio muklum kaba hpe du hkra htim gasat zing madu kau lu wa ai rai nga ai.
Lashio hpe Kokang htim gasat zing madu kau wa lu ai hpang, Miwa Asuya Dip n gun jaw ai masa a majaw, Kokang hte Myen Hpyen dap gap hkat jahkring myit hkrum ta masat htu kau wa ai re.
Kokang ni Myen hpyen dap hte gap hkat jahkring kau ngut ai hpang, Balawng TNLA hpe mung Hpyen n gun kaba hku dip n gun jaw wa ai sha n ga, Miwa maga de na mung dip n gun jaw ai lam ni galaw wa ai majaw, UWSA Wa kaw na mari la taw ai laknak machyu pala ni yawng dawm hkrum mat ai hpang, Balawng TNLA the Myen Hpyen dap ni mung gap hkat jahkring ta masat htu kau ra ai lam mung rai nga ai.
Kutkai hpe Balawng TNLA dap ni htim gasat wa ai lam
Kokang MNDAA dap ni Sammung Dingdung jahtum Sakhkung hka Hpawng Seng Munggu kaw na, htim gasat yu wa ai gaw, Sinli Pa hpe htim gasat zing madu wa na hkyen ai hte rau, Balawng TNLA dap ni mung Kutkai Pa hpe 2024 December hpang jahtum bat kaw na htim gasat hpang wa ai re.
Dai zawn Kokang ni Sinli Pa hpe 2024 January 16 ya shani htim gasat zing madu kau lu wa ai hte Balawng TNLA dap ni mung Kutkai Pa hpe Shaning ningnan daw hta gasat zing madu la lu wa ai rai nga ai.
Dai ten na masa lam hpe ginra masha langai tsun dan ai gaw, “ Kutkai hpe gaw mi nnan kaw na mung kashun hkat ai masa re ngu mu ai, hpa majaw nga yang Kokang ni Sinli hpe gasat zing wa sai da nga hte rau, Balawng ni Kutkai Pa hpe sa htim gasat sai gaw, Kokang ni Kutkai Pa hpe zing la kau na tsang ai majaw, Balawng ni lu ra ai ngu hku na shawng sa htim gasat wa ai ga rai nga ai,” nga tsun ai re.
Kutkai Pa hpe gaw, 1027 Majan masing ten kaw na nan, Kokang hte Balawng ni jawm gashun ai ginra langai re lam yu maram lu ai nga, matut tsun ai re.
Kutkai hpe Balawng TNLA ni zing kau ngut ai hpang, Kutkai hpe Up Madu da ai Tabau Hkun Myat a masha majing Kutkai Pyithutsit Slg Jian Tsan (ကျင်စန်း) gaw TNLA maga de shara langai jaw na matu tsun hpyi shawn wa ai, dai hpe Balawng TNLA maga tsep kawp n hkap la ai majaw, kalang ta Kokang maga de tsap mat wa nna, Kokang maga na mung shi hpe shara jaw let uphkang da shangun ai lam the seng na ginra masha langai n dai zawn tsun da ai re.
“Balawng ni Kutkai hpe zing kau ngut ai hpang, Kutkai kaw hpaida wang, KTV ni hpaw let gumhpraw tam nga ai Tabau Hkun Myat a masha majing Kutkai Pyithutsit na Slg Jian Tsan (ကျင်စန်း) gaw TNLA maga de shara jaw na matu tsun hpyi shawn ai, dai hpe Balawng TNLA maga tsep kawp n hkap la ai majaw, kalang ta Kokang maga de shang mat ai, Kokang maga na mung shi hpe shara jaw, Dukaba reng jaw na Kutkai kaw shara bai la shangun wa ai rai nga ai,” nga tsun ai re.
Kutkai pa na, mung shawa Nampan Sun wang kata Slg Jian Tsan (ကျင်စန်း) woi awn ai Pyithutsit hpung ni Hpaida wang kaba hpaw da ai shaning shata kaba na sai hpe, Balawng TNLA maga na lit nga ai ni lang hte lang sa hkum pat ai rai tim n lu hkum pat wa ai hpe chye lu ai. Slg Jian Tsan (ကျင်စန်း) ngu ai wa gaw, ga shaga pyaw ai zawn, gumhpraw nyep na galaw lu ai wa re majaw, dai ginra na TNLA Uphkang Salang ni yawng hpe gumhpraw the n-gup pat kau ya wa lu ai masa re nga tsun da ai re.
Kokang Dap maga de na Balik dap, Uphkang rung ni hpaw nna sa nga ai gaw manghkang n nga ai rai tim, ya na zawn Hpaida wang KTV seng hkan na lu ai ja gumhpraw ni hte dai ginra na TNLA Uphkang Salang ni hpe gumhpraw hte pat da ya ai majaw, TNLA Uphkang Salang ni hku na hpa tsun na n gun n nga mat ai lam ni a majaw mung ya na zawn byin wa ai masa re nga ginra masha ni tsun da ai re.
Dai zawn Kutkai Pa hta Mi moi na nga ai Slg Jian Tsan (ကျင်စန်း) woi awn ai Hpyen hpung ni gaw, Kutkai ginra hta hpaw da ai Kyahpyen Dabang hpe Miwa na sa shang rim kau ya ai majaw, Balawng TNLA ni shiga jaw ai majaw re nga ai kaw na, shada n hkrum n ra byin hkat wa ai lam re nga, Kutkai ginra masha ni tsun ai re.
Dai hpang kaw na Slg Jian Tsan (ကျင်စန်း) woi awn ai hpyen hpung ni Kutkai pa kaw Balawng TNLA ni hpe lam amyu myu hku jahte tam wa ai kaw, Balawng TNLA maga na n dang hkam sharang wa ai majaw, KIA hpe galaw ai ladat hte dai kaw nga ai shanhte rung ni yawng na dawng hkawn ni shayu kau ya, Masha hpe gaw, Myo shinggan de sa htaw kau ya re kaw na shada manghkang lam ni grau kaba wa ai rai nga ai.
Dai zawn Shada Manghkang lam ni grai kaba wa ai majaw, TNLA maga dingdung jinghku rawt malan hpung rai nga ai FPNCC hpang de laika hte hpyi shawn ai rai tim, lak lai ai lam n nga ai majaw, Miwa mung Yunnan asuya hpang de du hkra hpyi shawn wa ai rai nga ai.
Kokang MNDAA Dap ni Kutkai Pa hpe htim gasat hpang wa ai lam
Kutkai pa kaw dai zawn Jinghku rawt malan hpung shada n pri nem ai mang hkang lam ni byin ai kaw na, Kokang dap maga Kutkai de shang ai gunrai lam ni yawng pat kau ya ai hpang, March 14 ya jahpawt kaw na Kutkai hpe htim gasat hpang wa ai re.
Kutkai hpe htim gasat ai nhtoi 2 ya laman hta Kutkai hpe Kokang ni bai htim gasat zing madu kau lu wa ai rai nga ai.
Kutkai Pa hte rau Pyihtaungsu lam kaba mayan na TNLA dap shara yawng hpe gasat zing kau sai lam ginra masha ni kaw na chye lu ai re.
Dap shara zing kau lu ai sha n ga, Deng 105 Hpaga gunrai ginlen dabang zawn re hkan na Balawng TNLA Dawng hkawn ni yawng hpe mung Kokang ni jahkrat shayu kau ya sai lam chye lu ai re.
Ya na zawn Jinghku Rawt Malan Hpung Shada gap hkat wa hkra shingdu kaw na chyinglau ya taw ai gaw, Myen Hpyen dap ni Pyithutsit ngam Slg Jian Tsan (ကျင်စန်း) hpe n-gun jaw shagrau sharawt ya ai majaw re nga, Mung masa yu maram ai ni tsun madi madun da ai re.
Miwa datkasa Salang တိန့်ရွှီကျွင်း Naypyidaw du ai shani jang nan Kokang ni Balawng hpe htim gasat wa ai rai nga ai.
Kokang hte Balawng gaw Mung masa pandung grai tsaw ai wuhpung lahkawng re majaw, Shada jahkrup bawngban hkat n lu mat ai majaw, ya na zawn byin wa ai lam re nga, TNLA Ninggawn Amu madu kaba Dukaba Ta Bung Kyaw Ayeyarwaddy Shiga dap Interview de n dai zawn tsun da ai re.
“Anhte Jinghku Rawt malan hpung shada lahkawng maga gaw, Mung masa Pandung grai tsaw mat ai, mung masa pandung grai tsaw ai shada rai mat jang she dai hpe jahkrup bawngban la lu na matu yak mat ai, n dai hku laknak hte hparan ai lam gaw, manghkang lam hpe kaja lu hparan ai lam gaw n rai nga ai, man hkrum a tsawm jahta na bawngban ra ai hpe, ya na zawn Kokang maga na dai zawn htim gasat wa na ngu ai kachyi mung n shadu da ai”
Kokang gaw Balawng TNLA hpe Muse Lashio Pyihtaungsu lam kaba n tsa kaw n nga mat hkra htim gasat taw nga ai rai nna, ya matu nna mung Nam Hkam de bai matut htim gasat wa na masa nga ai lam ginra masha ni tsun nga ma ai re.
Kokang maga na gaw Maga mi de TNLA the laja lana gap gasat hkat taw ai ten, Myen Hpyen dap the Lashio Two Elephent Hotel kaw hkrum jahta nga ai lam Shwe Phee Myay shiga lawk hta tsun da ai re.