Hpakant Mashi Kahtawng Buga Hkalup Hpung ni a, Sengchyai Kyuhpyi Bum mayan de dai ni mung laja lana matut gap gasat hkat taw nga ai lam, Ginra masha ni tsun shana wa ai re.
Mani kaw na Myen Hpyen dap maga na, laknak kaba laja lana bai gap sharu bun wa ai gaw, Hpakant Lawk (4) na Mung Shawa dum n’ta langai kaw wa hkrat ang ai majaw, Asak kaba sai Dinggai langai hte Kashu hkra hkala wa ai hpang, Gadwi ngu na wa tsirung du ai hpang si mat ai lam ginra masha langai KNG shiga de n dai zawn tsun dan wa ai re.
“Dai ni mung laja lana bai ngoi nga sai, Kaji Kaba grai ngoi taw nga ai, Mani kaw na rai sai, Mani gaw Hpakant Lawk (4) kaw Laknak kaba wa hkrat ai majaw, Dinggai langai hte Kashu Hkala hkrum ai, Dinggai wa gaw tsirung du ai hpang jahkring rai jang si sai nga na ai, anhte Mashi Kahtawng ni na matu akyu grai hpyi garum ya marit,” nga tsun dan wa ai re.
Myen Hpyen Laknak kaba a majaw, hkala hkrum ai Dinggai wa gaw, hkala sawng ai majaw, Tsirung du ai hpang si mat ai rai nna, Kashu ngu na wa gaw ya ten du hkra Hpakant tsi rung kaw tsi tsi hkam la taw ai lam chye lu ai.
Hpakant Mashi Kahtawng Kyuhpyi Bum maga de lagaw lam hku htu shadut ai hta, Zahkung wa na Pyithutsit, Sam Hkyeng Pyithutsit, Warazup Pyithutsit ni hkrai law malawng re lam, shawng lam hpyen magam gun hte ni nawn ai ni tsun ai re.
Mani kaw na Myen Hpyen dap ni n’gun kaba hte lagaw lam hku na htu lung wa ai hpe KIA PDF dap maga M Bush hkap shingla gasat ai hta, Myen Hpyen maga sum machyi law wa ai nga matut tsun dan ai re.
Myen Hpyen dap gaw, Sengtawng Gwihka Mare ni hpe bai gasat zing la lu na matu lai wa sai Shata kaw na Mashi Kahtawng Kyuhpyi Bum hpe htim gasat taw nga ai mung rai nga ai.
Mashi Kahtawng Kyuhpyi Bum hpe htim gasat nga yang, Jawngma ni San Poi ten ni wa ai majaw, Jawngma Kanu Kawa na Jawng dat ten du hkra gan shazim na matu hpyi shawn da ai majaw, bat lahkawng daram gan zim ai rai tim, Mani kaw na gaw laja lana bai gap gasat hkat taw sai lam chye lu ai re.