Kutkai Mare kaba hta byin nga ai, Kokang hte Balawng Manghkang lam the seng nna, dingdung Pawng hpawm dap FPNCC de TNLA maga shawk shawn da ai lam chye lu ai.
Lai wa sai bat hta Kokang dap ni Kutkai mare kata CCTV sa shakap ai hpe Balawng TNLA ni shan hte a ahkang n lu ai shakap ai nga nna, shada manghkang byin wa ai hpang, Kokang maga na lit nga ai Salang ni hpe Balawng ni rim zing kau ya wa ai re lam hte seng na Mung masa la langai KNG Shiga de n dai zawn tsun wa ai re.
“Ya gaw Shada n lu hparan na FPNCC hpe hparan ya na matu, Balawng maga na Laika bang hpyi shawn da ai, FPNCC mung gade hkum lu galaw u ga le, shan the nan mung kaja hkap la lu na i, ngu gaw ga san rai nga ai,” nga tsun dan wa ai re.
Dai zawn dai ginra na lit nga ai Kokang salang ni hpe rim zing kau ai hpang, Kutkai Pa kaw hpaw tawn ai Kokang rung ni yawng hpe Balawng ni dawng hkawn hkan shayu kau ya nna, Masha hpe gaw mawdaw hte mare shinggan de htaw sa kau ai lam byin wa ai mung rai nga ai.
Ya na zawn, Jinghku rawt malan hpung shada lahkawng kata byin nga ai masa lam the seng nna, Dap hpawm hpung rai nga ai FPNCC de Kokang dap maga shawk shawn da ai rai tim, FPNCC maga na dai ni ten du hkra ahkyak la hparan ya ai lam n nga ai shi ai re.
FPNCC hta gaw, UWSA Wa Ningbaw lit la da ai pawng hpawm wuhpung langai mung rai nga ai.