Waimaw Shwenyaungpin Mare kaw Dai na maga de hkying 4 aten daram hta Myen Hpyen Jet Nbungli bawm sa jahkrat bun ai majaw, Mare kata Mawdaw lam n tsa na gunrai htaw mawdaw kaba langai hte Mawdaw gram seng wan hkru hten hkrum wa ai nga, Mawdaw la langai KNG de n dai zawn tsun dan ai re.
“Nbungli Nsen na ai majaw, Gunrai htaw Mawdaw kaba ni hkring taw ai, Nbungli bawm sa jahkrat bun lai mat ai gaw, gunrai mawdaw kaba kaw nan wa ang ai majaw, gunrai htaw mawdaw kaba yawng hkru mat na, Mawdaw gram seng mung wan hkru hten ai,” nga tsun dan wa ai re.
Shwenyaungpin Mare Nbungli bawm wa jahkrat hkrum ai hta Masha si hkala ai lam nga ai rai tim, gade daram gara hku si hkala ai ngu hpe gaw, naw sagawn nga ding yang re.
Ndai laman Myen Hpyen dap the Wunpawng Mungdan Shanglawt Hpyendap KIA Pawng hpawm dap lapran shara law law hta majan byin taw nga nna, Myen Hpyen dap maga n bungli bawm hkrup mara hkan jahkrat bun ai lam ni galaw taw nga ai mung rai nga ai.
Dai hpawt manap hkying 8 aten daram hta mung, Hpakant de Jet Nbungli bawm wa jahkrat bun kau da ai hpang, Shani ka-ang kaw na Y-12 Nbungli hte Bawm 20 lang jan sa jahkrat bun kau da ai lam Hpakant ginra masha ni kaw na chye lu ai re.
Shwenyaungpin Myen Hpyen Dap Hk.M.Y (321) dap wang hpe KIA hte Pawng Hpawm Dap ni 2024 ning March Shata hta gasat zing madu kau lu wa ai mare rai nga ai re.
Shwenyaung Pin mare gaw, Mali hka nam Talawgyi hte Washawng Nangzawyang maga de lai ai lam numbraw shara mung re majaw, Hpyen masa hta ahkyak dik ai shara langai mung re lam chye lu ai.