Katha muklum kata, Mung Shawa ni tawn kau da ai dum n ta hkan, lagut ni hkrup mara arung arai lagu la taw nga ai lam, ginra masha ni tsun ai re.
December 28 ya shani kaw na PDF pawng hpawm dap ni Katha hpe htim gasat wa ai hpang kaw na, dai ni ten du hkra lahkawng maga hpyen masa matut shaja hkat nga ding yang re lam chye lu ai.
Majan byin wa ai ten, Kani ya ni gaw, muklum kata na n pru ai sha mung shawa arung arai lagu shaw na matu gara de mung n yen ai dai kaw sha rawng nga nna, lagu sha taw ai lam, Katha ginra masha langai KNG de n dai zawn tsun dan wa ai re.
“Majan byin wa na, Sinat gade ngoi tim Kani Ya ni n hprawng ai gaw, Myo kata kaw rawng taw nga nna, Masha yawng hprawng yen ma sai nga jang, dai hpe ahkaw ahkang la nna, hkan lagu Myen ni mung hpa n galaw ai ga rai nga ai” nga tsun ai re.
Lagut Kani ya ni gaw masha wuhpawng nawng nawng hkan lagu la hkawm taw nga ai rai nna, lagu na n ta hpe lahpaw the shawng gap nna, masha rawng ai n sen n na ai hpang, wuhpung nawng shang na ra ai arung arai ni hpe lagu shaw ai nga, rawt malan magam gun langai n dai zawn tsun ai re.
“Lagut ni mung အဆင့် မြင့်မြင့် sha re, masha nga n nga lahpaw hte shawng gap yu nna, masha n sen n na ai hpang she shang lagu ai,” nga matut tsun dan wa ai re.
Katha ginra Myen Hpyen dap daju Hk.M.Y (309) hpe PDF pawng hpawm dap ni wang da ai masa rai tim, Myen Hpyen dap maga shana shagu Nbungli Drone bawm jahkrat bun ai majaw, n kau shara na loi li bai yen kau ya ai lam ni nga ai hpe sagawn chye lu ai.
Ya ten Katha muklum hta gaw, kau chyen mi Myen Hpyen dap nga nna, Kau chyen mi hta gaw PDF dap shara la nna, Hpyen masa shaja hkat taw ai lam chye lu ai.
Myen Hpyen dap ra lata poi galaw wa ai hpang, Sagaing lahta daw ginra ni hta majan sawng wa taw nga ai mung rai nga ai.