Min Zay Thant Pyithutsit Hpyen hpung ni gaw, Danai Lapu Hka ja Maw na Mung Shawa arung arai hpe Kani ya ni hpe jai lang nna, hkan lagu htaw gahkyin la taw nga ai lam maw ginra masha ni tsun ai re.
Kani ya ni hpe lani mi sen mi jaw na ngu shaga let jak rai ni hkan lagu htaw la taw nga ai lam, Maw Lauban langai KNG de n dai zawn tsun dan wa ai re.
“Ndai laman sha dap sin da shangun ai nye hkawngma hpe mung shaga ai da, lani mi sen mi jaw na ngu na, hpa galaw ra na rai ngu yang, rai hpai sha re ngu nga, Sinat hpai ai ni gaw shawng de shara la ya nna, hpang de mawdaw kaba kaw Kani Ya ni hpe rai hpai bang shangun ai le,” nga tsun dan ai re.
Dai zawn hkan lagu htaw la ai jak rai ni hpe Mai Hkun mare kaw wa htaw jahkrat na, manu hkyam sa ai hku na bai dut garan jaw taw ai lam chye lu ai.
Min Zay Thant Pyithutsit woi awn ai hpyen hpung ni hta, Zahkung Ting Ying Pyithutsit, Sam Hkyeng Pyithutsit hpyen hpung ni shang lawm nna, KIA Dung 14 ginra na Ja Maw Pat Maw ni yawng hpe gasat zing na matu lai wa sai December 13 ya shani kaw na Pat maw ginra de nbungli hte bawm sharu bun na htim gasat shang wa ai rai nga ai.
Min Zay Thant Pyithutsit hpung ni ya na zawn htim gasat shang wa ai majaw, dai ginra nga ai mung shawa yawng lu ai arung arai yawng kabai kau da na, hprawng bra ayai mat ai rai nga ai.
Maw ginra yawng bya ayai mat ai majaw, Danai kaw Hkai Sun galaw ai mung shawa ni sum taw ai lam matut chye lu ai.
Danai Lapu Hka na pru wa ai Mung Shawa ni gaw, ya ten Danai muklum kaw, yak hkak jam jau rai wa nga taw let, tinang arung arai ni hpe shaw la lu na hpe myit mada let la taw ai nga, n tsa na Salang wa n dai zawn matut tsun dan wa ai re.