Danai Nam Gawn Maw kaw Min Zay Thant Pyithutsit ni Drone bawm wa jahkrat bun ai majaw, Back Hold Sara wa, dai shara hta nan si mat nna, laga hkawngma marai masum hkala sawng hkrum wa ai lam chye lu ai.
Lai wa sai January praw 7 ya shani hta Oi Law kaw du nga ai Min Zay Thant Pyithutsit hpung ni Nam Gawn Ja Maw kaw Ja htu ai Back Hold hpe bawm sa jahkrat bun ai majaw, mung shawa si hkala hkrum wa nna, Back Hold mung wan hkru hten mat ai lam Ja htu lauban langai KNG Shiga de n dai zawn tsun dan wa ai re.
“Payin Maw Nam Gawn Maw maga de Back Hold langai hpe Min Zay Thant Pyithutsit ni Drone Bawm sa jahkrat bun ai majaw, Back Hold Sara dai kaw nan si nna, hkawng ma 3 hkala ai, Back Hold mung wan hkru hten mat ai,” nga tsun dan ai re.
Nam Gawn maw gaw, Pat Maw hte yep re ai Ja the Pat n hprang pru ai ginra re lam matut chye lu ai.
Min Zay That Pyithutsit gaw, shi up nga ai Jahtu Zup ginra hta, Ja htu shara ma wa ai majaw, KIA uphkang nga ai Ja Maw Pat Maw ginra hpe hpyen n gun kaba the htim gasat taw nga ai mung rai nga ai.
Danai Lapu Hka, Ja Maw ginra ya ten kaning zawn rai byin taw nga ai kun? Laksan lamang hta matut na lu mat na re.