Balawng TNLA Rawt malan masat n htoi lamang hpe Mani December 11 ya shani Man Dung mare hta Hpyen hprim madun poi lamang ni hte wu wu di di galaw wa ai lam chye lu ai.
Balawng TNLA Rawt malan masat n htoi hpe January 12 ya shani masat ai majaw, dai ni 63 ning hpring TNLA Rawt malan n htoi mung rai nga ai.
Balawng TNLA Rawt malan n htoi hpe hpyen hprim hte hkrak Myo n tsa kaw Mung Shawa the rau wu wu di di rai na galaw wa ai gaw, ndai shawng ningnan lang rai nga ai.
Balawng amyu sha rawt malan hpung PNF ngu ai mying hte 1963 ning January 12 ya shani hpaw shabawn dat ai rai nga ai.
1976 ning hta gaw, PNF kaw na PSLO,PSLA ngu ai mying bai galaw shamying nna rawt malan wa ai rai nga ai.
Dai hpang, 1991 ning April Shata hta PSLO/PSLA gaw, Myen Hpyen dap (နဝတ) အစိုးရ hte gap hkat jahkring laknak jahkrat kau ai hpang, 2005 ning hta Pyithutsit mying galai nna, Myen hpyen dap n pu de du mat ai rai nga ai.
PSLO/PSLA laknak jahkrat kau ai hpang, Balawng ginra ni hta Kani Hkai shapraw ai shadang grau law jat wa nna, asak aprat ram ai ramma ni yawng Kani Nang hpam hta hkrat sum ma ai re.
Dai majaw, PSLF TNLA ngu ai mying hte 2009 ning October Shata hta Karen Mung Thai Jarit de nga ai Balawng Ramma ni bai hpaw shabawn dat ai rai nga ai.
2021 Ning Gumshem Myen HPyen dap daru magam zing kau ai hpang, Dingdung daw rawt malan pawng hpawm dap မြောက်ပိုင်းမဟာမိတ်ညီနောင် hpe hpaw shabawnn dat ai nnan daw ten, KIA shang lawm ai rai tim, Hpang daw KIA gaw dai dap hpawm kaw na pru mat ai re.
Dai hpang, TNLA,MNDAA, AA Jinghku rawt malan hpung 3 myit hkrum nna, 1027 majan masing hpe hpaw let Myen hpyen dap hpe htim shagrawt wa ai rai nga ai.
1027 Majan masing ten laman Sammung dingdung daw na Muklum law law hpe TNLA gasat zing padang dip la lu wa ai rai nga ai.
Dai hpang Miwa Asuya lapran salang tai ya nna, gasat zing da lu sai, Mokok the Mungmyit Mare kaba ni hpe Myen Hpyen dap hpe bai jaw kau nna, gap hkat jahkring wa ai rai nga ai.
Dai zawn Myen hpyen dap hte gap hkat jahkring kau ai hpang, Myo mare kaba n tsa kaw rawt malan poi lamang kaba hpe wu wu di di rai galaw wa lu ai, n dai shawng ningnan lang rai nga ai.