Danai Lapu hka ja maw hpe, laknak lang rawt malan hpung lahkawng maga pat da ai kaw na, bai hpaw ya na n jaw n teng ai shiga a majaw, arung arai wa shaw la na Maw ginra na, mung shawa ni Mai Hkun mare kaw, wa sumpum, Chyat hkrum taw ai nga, Maw ginra na mung shawa ni tsun ai re.
December 13 ya shani kaw na Min Zay Thant Pyithutsit ni Lapu hka ja maw de htim gasat shang wa ai majaw, maw ginra na mung shawa yawng, arung arai ni kabai kau da na hprawng yen ma ai rai nga ai.
Dai zawn hprawng yen ma ai kaw na, ya n dai laman sinat mahku n sen ni loi bai zim taw ai majaw, ginra masha nkau arung arai wa zing la lu na matu lam hpaw ya na hpe hpyi shawn taw nga ai mung rai nga ai.
Mung Shawa ni dai zawn hpyi shawn wa ai hpang, dai ni December praw 5 ya shani arung arai wa shaw na matu lani mi lahkawng ya lam hpaw ya sai nga, n jaw n ten ai shiga ni shapraw dat ai majaw, mung shawa ni Mai Hkun mare kaw wa jam jau hkrum taw ai lam the seng na Maw ginra masha langai n dai zawn tsun dan wa ai re.
“ Maw na pru wa ai mung shawa ni gaw, rai yawng kabai kau da na hkum kaman hprawng pru wa ai re majaw, rai shaw la na matu Danai kaw wa la jawng taw ai rai nga ai, dai she maw lam hpaw sai nga, n jaw n teng ai Shiga shapraw dat, lung wa yu yang gaw, Mai Hkun kaw na n lai shangun mat na, Mai Hkun Mare kaw wa sum Pum jawng ai ga rai nga ai,” nga tsun ai re.
Min Zay Thant woi awn ai Wara Zup Pyithutsit hpung ni gaw, Pat maw the Lapu hka ja maw ginra na KIA dap shara lahkawng hpe htim gasat zing da lu sai nga na, Telegram n tsa tsun n dau da ai re.
Min Zay Thant gasat zing madu da lu ai dap shara ni gaw, Noi Je Bum mayan na Hka Lawng Kawng hte, Woi Law မောင်တံဂိတ် shara ni hpe zing madu wa lu ai mung rai nga ai.
Dai ginra na mung shawa yawng gaw, laknak lang wuhpung lahkawng maga gap hkat shazim nna, Mung shawa ni hpe arung arai wa zing na ahkang jaw ya na hpe myit mada hpyi shawn taw nga ai re.