Manmaw Htim shagrawt majan hpe December 25 ya shani kaw na n gun kaba the numdaw kalang bai htim gasat taw nga ai gaw, dai ni ten du hkra majan laja lana matut gap gasat hkat taw nga ai re.
Manmaw Hk.L.Y (47) dap hpe htim shagrawt taw nga ai hta, shara law malawng hpe gasat maden kau lu ai rai tim, asan rai na rai n lu shakre shi ai lam shawng lam hpyen magam gun ni tsun ai re.
“Manmaw gaw nut tik tik rai nga ai, Myen Hpyen dap maga, Nbungli Drone nau lang ai majaw anhte maga na a tsawm rai n lu jasan shi ai masa rai taw ai, Myen ni gaw, mahkrai kapaw di na hprawng ai daram gaw rai sai,” nga tsun dan wa ai re.
Hk.L.Y (47) dap na Myen hpyen n kau Dececember 25 ya shani htim gasat ai hta, hkra machyi law ai majaw, Kung Mahat mare makau na Jari Hka mahkrai hpe kapaw jahten kau da nna, hprawng yen ai lam ni mung nga wa ai hpe chye lu ai.
December 25 ya jahpawt kaw na bai htim gasat ai shara ni gaw ခလရ (၄၇) ၊ စနခ (၆၄၁) ဗန်းမော် Dakkasu jawng wang ၊ စကခ (၂၁) the အမတ (၃၆၆) dap shara ni hpe htim gasat wa ai re lam chye lu ai.
Dai shara ni hpe htim gasat ai hta ခလရ (၄၇) the စစ်နယ်မြေခွဲ စနခ (၆၄၁) dap shara ni hta masan sa awng dang ai lam ni lu la wa ai nga shawng lam hpyen magam gun ni tsun ai re.
Manmaw hpe padang dip shangut shakre la lu na matu, Wunpawng Mungdan Shanglawt Hpyendap KIA the Pawng hpawm dap maga a tsam htum shakut shaja taw nga ai majaw, mung shawa yawng mung myit dum akyu hpyi nga ya na matu shawng lam hpyen magam gun ni hpyi lajin da ai re.