Putao Ginwang Hpung Ngai Yang Hpyen yen Mung Shawa ni, ginsum galup Muga Hpri Tsut n lu na yak hkak hkrum taw nga ai lam chye lu ai.
Hpung Ngai Yang Hpyen yen mung shawa ni gaw, Nam de hprawng yen taw ai 2 ning jan du wa ai rai tim, gadai gara wuhpung kaw na garum ningtum mung n lu ai majaw, yak hkak taw nga ai lam hpyen yen mung shawa ni tsun ai re.
“ Putao lam kaw Myen ni Plasatic Muga, Hpri Tsut ni tsep kawp n shalai ai da. Anhte hpyen yen ni galup na Shangu, tinggaw mung n lu Palastic Muga mung n lu, Ya n lu galai da yang, lanam ta bai shang jang gaw, jam jau sai,” nga tsun ai re.
Ya ten Myen HPyen dap gaw, Putao lam mayan hta, Muga Hpri tsut ni hpe tsep kawp n htaw shalai shangun ai majaw, n ta ginsum galup na yak hkak taw ai mung rai nga ai.
Myen Hpyen dap maga na ya ten, Putao lam mayan hta ladu lai san jep ai lam galaw ai majaw, Hpyen yen mung shawa ni a matu lang rung lang rai ni shalai la na matu yak hkak taw nga ai re.
Nam na Shangu Tinggaw tam galup na matu mung, Putao maga de Myen Hpyen Gate hpe lai ra ai majaw n mai wa tam htat ai masa rai taw ai lam chye lu ai re.
Ndai laman Myen Hpyen dap ni Putao ginra hta Ralata poi lu galaw na matu, Hpyen masa shamu shamawt ai lam ni galaw nga ai hpe chye lu ai re.