Manmaw Majan, December 25 ya jahpawt kaw na laja lana bai htim gasat taw nga sai lam shawng lam hpyen magam gun ni tsun ai kaw na chye lu ai.
Mani hpawt Christmas shani hta nan, Manmaw Myen Hpyen dap shara 4,5 ram hpe kalang dat shang htim gasat ai lam galaw wa ai majaw, Majan laja lana bai byin taw sai lam, shawng lam hpyen magam gun langai KNG de n dai zawn tsun dan wa ai re.
“Mani Hpawt Christmas shani hta nan anhte KIA hte laga Pawng hpawm dap ni hpyen n gun kaba dat na bai nut jaw taw sai, Hk.L.Y (47) hte စနခ (641) shara ni de gaw, ram ram masan sa ai, laga deng 3, deng 4, Manmaw Dakkasu jawng wang ni de mung nut taw nga ai,” nga tsun dan ai re.
Manmaw hpe n gun kaba the bai htim gasat wa ai the rau, Myitkyina Myen Hpyen nbungli pa hpe mung, laknak kaba sa gap bun wa ai lam chye lu ai.
Myitkyina Nbungli pa hpe laknak kaba sa gap bun ai hta helicopter langai the Jet nbungli langai hkra hten ai lam, Online n tsa tsun garu ai rai tim, KNG maga a tsawm tup hkrak n lu sagawn ai re.
Myitkyina Nbungli Pa gap hkrum ai majaw, Myen Hpyen dap maga na mung, KIA Ginjaw ginra Laiza muklum de Sihkam Drone 3 sa jahkrat bun wa ai lam chye lu ai.
Myen HPyen dap shapyen dap ai Drone 3 hta na langai gaw, Miwa hkran maga wa hkrat ang nna, langai gaw, Woi Chyai Sarawun n ta wa hkrat ang ai lam chye lu ai.
Myen Hpyen Drone a majaw, masha Si hkala ai lam ni gaw hpa n nga ai re hpe sagawn chye lu ai re.
Laiza de shani ka-ang hkying 12 chyen ram hta Drone jahkrat bun ngut ai hpang, Shana maga de hkying 4 daram hta KIA Dung 11 ginra de Nbungli hte bai sa gap bun wa ai lam chye lu ai re.