Mali Nmai Zup Madim masing hpe Myen hpyen dap maga, atit anang bai galaw na hkyen taw ai majaw, dai hpe ninghkap ai gadai gara wuhpung hpe rai tim, ja ja ahkyak la mat na lam, n dau laika shapraw wa ai re.
Myen Hpyen dap masing jahkrat da ai Mali Nmai Zup madim masing hpe sak se sak gan n nga ai majoi hkrup mara ninghkap ai ni gadai masha, wuhpung hpe rai tim, ja ja ahkyak la mat na lam, Myen hpyen Kongsi rung daju kaw na n dau wa ai re.
Ndai lam gaw, Myen Hpyen Ningtau Ningbaw Soe Win Myitkyina kaw Myitsu kanu kawa ni the wa hkrum jahta ngut ai hpang, tsaw dik, hpyen Comission rung kaw na n dau wa ai lam rai nga ai.
Myen Hpyen dap maga n dai zawn n dau wa ai lam gaw, lai wa sai 2010 ning ten na zawn, Mung shawa ni gadai n ninghkap hkra tau hkrau kaw na hkyen shajin ai masa re lam, dai hpe yu maram ai ni tsun tawn ai re.
Myen Hpyen dap maga na Mali Nmai Madim hpe galaw ai rai yang, Makau grup yin shingra tara hpe hkra jahten ai sha n ga, Myen mung a asak hka lam, Mali hka nu hpe dan di ai re majaw, n dai lam hpe mung shawa ni hku na gaw, hkap la na masa tsep kawp n nga ai nga, NUG asuya maga na mung tsun tawn ai re.
Myen Hpyen Ningtau Ningbaw Myitkyina du ai December 16 ya shani hta, Mali Nmai Zup Madim hpe galaw na Hkrang sumla ni yawng hkyen lajang ngut sai lam, Mung shawa hpe tsun dan wa ai nga dai zuphpawng kaw lawm ai Myitsu salang langai tsun ai re.
Mali Nmai Zup shara gaw, Sagaing Nnang Nawn lam hta ang ai shara re majaw, tsep kawp n galaw ging ai shara re lam, Hpaji munu ni tsun madi madun da ai majaw, prat ban hte ban mung shawa ni jawm ninghkap wa ai mung rai nga ai.
Ndai Mali Nmai Zup madim masing hpe hkrang shapraw galaw sa w alu na matu lai was ai August 27 ya shani hta Myen Mung Myihprap wan Ningtau hkringmang woi awn ai marai 13 lawm ai hpung ni hte SPIC Yunan International Power Investment Co.,Ltd ni lata gindun galaw sa mat na lam, tsun tawn ai re.
Ndai mali hka madim masing hpe 2002 ning gumshem Tan Shwe Asuya hte CPI Company ni myit hkrum Ta masat htu da ai rai nna, Mung Shawa yawng jawm ning hkap ai majaw, 2011 ning September Shata, Theing Seing Asuya lakhtak hta bai jahkring kau ya wa ai rai nga ai.
Thein Seing Asuya lakhtak ten jahkring kau ai Mali Hka Madim masing hpe, Gumshem Myen Hpyen Dap Min Aung Hlaing Daru magam zing kau nna, shi lakhtak ten hta bai galaw na matu hkyen lajang taw ai mung rai nga ai.