Myihprap wan ra gadawn ai masa lam a majaw, Mali Nmai Zup kaw Myihprap hka wan jak hpe bai galaw na matu masam maram taw ai nga, Myen hpyen Ningtau ningbaw Soe Win Myitkyina kaw mung shawa hte hkrum ai ten tsun wa ai lam chye lu ai.
Mali Nmai Hka Madim masing hpe galaw na matu Myen Hpyen dap ningbaw Min Aung Hlaing hku na Miwa hpe bai tsun hpyi shawn wa ai lam mung rai nga ai.
Dai mali nmai zup mali hka madim kaw na Myihprap wan 5600 Miga Wat kaba ai Wan n gun shapraw na matu hkyen shajin da ai lam, Myen Hpyen ningtau ningbaw Soe Win tsun mat ai rai nga ai.
“Ndai kalang Myen Hpyen Ningbaw Soe Win Myitkyina Putao ginra ni de sa du ai, sa zinlum ai ga rai nga ai, Ra lata poi galaw na lam the Myihprap wan hka madim masing lam the seng na tsun mat ai, gadai n ninghkap na matu re ngu mu mada ai law,” nga dai hkrum zup hpawng kaw sa lawm ai Myitkyina na Salang langai KNG de tsun ai re.
Ndai Mali Nmai Zup madim masing hpe Ya na ningtau Dap Awn Daju Soe Win wa Jinghpaw Mung Taimu galaw taw nga ai ten, hpang wa ai masing rai tim, dai ten na mung masa ginchyum chyat ai lam a majaw, gan jahkring kau ai hpe ya n dai ten bai hpang na matu tsun wa ai lam rai nga ai.
Mali Nmai Zup Myihprap wan madim masing kaw na Myihprap wan n gun 6000 Miga Wat shapraw na myit hkrum da ai rai tim, Mung Shawa yawng jawm ninghkap wa ai majaw, 2011 ning Theing Seing asuya lakhtak hta jahkring kau ya ai rai nga ai.