Putao muklum kata na Apawng Seng (အပေါင်ဆိုင်) langai Damya mya hkrum ai majaw, Gumhpraw Sen 400 jan lawm mat ai nga, ginra masha ni kaw na chye lu ai.
Putao Lung Tsawt lawk na SK အပေါင်ဆိုင် hta November 9 ya shana hkying 8 aten daram kaw damya mya hkrum ai hta Sen 400 jan lawm mat ai lam ginra masha langai KNG shiga de tsun dan wa ai re.
“Dai Apawng Seng gaw lam kana makau kaw sha re, masha grai naw kamawng taw ai ten sa mya mat ai, Sengke 3 the ramma la kasha marai 6 sa wa na sa kashun mya mat ai re,” nga tsun dan wa ai re.
Dai အပေါင်ဆိုင် gaw, Putao the Nbungli Pa lapran Mawdaw lam kaba makau kaw hpaw da ai seng rai nna, makau grup yin ni hta mung dum n ta gat seng ni grai law ai lapran damya sa shang mya mat wa ai re lam chye lu ai.
Damya sa mya ai hta, ramma marai 6 rai nna, langai hpe mung n lu rim kau dat ai lam chye lu ai.
အပေါင်ဆိုင် madu gaw, damya sa mya hkrum ai ten, marawn dat ai majaw, dai seng madu hpe htwi bye kau da ai lam mung nga ai hpe matut chye lu ai re.
Putao ginra hta Myen Hpyen dap Daru magam rai n zing shi ai ten, Lagu lagut, damya mya ai lam n nga ai daram rai tim, Ya Myen Hpyen dap daru magam zing kau ai hpang, lagu lagut damya mya ai lam. Kani nang hpam dut mari ai lam ni grau law wa ai lam mung tsun da ai re.