Waimaw Lamyang lam maga de Myen ni laknak kaba Minute 10 ram wa gap bun dat ai hpang, KIA maga na mung bai gap gasat dat ai majaw, Myen ni bai htingnut yen mat ai lam, ginra masha ni kaw na chye lu ai.
November 24 ya jahpawt jau hkying 7 aten daram hta Myen ni lai lung wa nna, KIA ni nga ai shara de laknak kaba jahkring mi wa gap bun kau da na, bai n htang yu mat ai lam shawng lam hpyen magam gun hte ni nawn ai Salang langai KNG shiga de n dai zawn tsun dan wa ai re.
“Dai hpawt daw jahkring mi Myen ni Minute 10 ram sinat kaji kaba wa gap bun yu, wa shala gap gasat yu rai taw ai sha re, grai wa laja lana gap hkat ai lam gaw n re, tim anhte maga na ni mung, kaji kachyaw bai shapyen bun ai ga rai nga ai, anhte maga na ni shapyen bun ai majaw, Wuyan mare makau kaw wa hkrat ai,” nga tsun dan wa ai re.
Laknak kaba si a majaw, Wuyan mare na mung Shawa dum n ta langai kaw wa hkra nna, langu sun kaw bungli galaw nga ai Miwa la langai mung hkala hkrum ai lam matut chye lu ai re.
Wuyan mare grup yin yawng hta, mung shawa gadai n nga na matu tsun sadi jaw da ai shara rai nna, ya dai hkan nga ai ni gaw, Myen Hpyen dap maga tsap na nga ai ni re lam ginra masha ni tsun ai re.
Lai wa sai November 19 ya shani hta mung Shwe Nyau Pin mare Mung shawa dum n ta langai kaw Myen hpyen Drone bawm wa hkrat ai majaw, n ta langai na sha, Kawa gaw dai shara hta nan si mat nna, Kanu ngu na wa gaw lahkra lagaw daw mat nna, Kasha wa mung lagaw lahkawng maga hkra hkala mat ai nga, shawng lam hpyen magam gun hte ni nawn ai ni tsun dan wa ai re.
Ndai laman Myen Hpyen dap ni Jam Ga mare de hpyen shamu shamawt ai lam ni bai galaw wa taw nga ai lam, ginra masha hte ni nawn ai ni tsun ai re.