Hopin Nan Yin mare na Mung Shawa dum n ta lahkawng hpe Myen Hpyen dap the Sam Hkyeng SNA dap ni pawng nna, wan nat jahten kau ya wa ai lam ginra masha ni tsun ai re.
November 23 ya shana hkying 7 Minute 45 aten daram hta, Nan Yin mare na gunrai hpan hkum dut ai seng lahkawng hpe, PDF ni hpe madi shadaw ai ni re ngu na, Seng kata na arai ni yawng shaw la mat nna, gat seng hpe wan nat jahten kau da ya ai lam dai ginra na mung Shawa langai KNG Shiga dap de n dai zawn tsun dan wa ai re.
“Nan Yin mare na gunrai hpan hkum dut ai seng lahkawng hpe, PDF ni hpe madi shadaw ai ni re ngu nna, Seng kata na arai ni yawng shaw la mat ai hpang, gat seng hpe wan nat jahten kau da ya ai,” nga tsun dan ai re.
Ya ten dai ginra ni hta, Sam HKyeng SNA the Myen hpyen dap ni pawng hpawm nna hpyen shamu shamawt ai lam galaw taw ai lam chye lu ai re.
Sam Hkyeng SNA dap maga na mung ladu lai hpyen nau rim lahkawn ai majaw, Wanleng lam mayan asak ram ai ramma ni gadai pyi n nga sai lam ginra masha wa matut tsun ai re.
Ya ten Wan leng lam mayan hta Myen Hpyen dap hte Sam Hkyeng ni pawng nna, lam kaba hkan ladu lai san jep ai lam ni galaw taw nga nna, Hpyen rim lahkawn ai lam ni mung laja lana galaw taw nga ai re.