Mogaung Wan leng lam n tsa na mare langai rai nga ai, Nan Hkwi Mare na Myen Hpyen dap Hk.M.Y (521) dap hpe KIA KPDF dap ni pawng hpawm nna sa htim gap gasat wa ai lam nga ai hpe ginra masha ni kaw na chye lu ai.
Nan Hkwi Hk.M.Y (521) dap gaw, Pin Baw the Hopin mare lapran Wan leng lam makau dap jung da ai Myen Hpyen dap dung langai mung rai nga ai.
Dai dap shara hpe KIA KPDF pawng hpawm dap ni mana hkying 8 aten daram hta sa gap gasat wa ai lam, ginra masha langai KNG Shiga de n dai zawn tsun dan wa ai re.
“Mana Hkying 8 ram hta anhte maga na ni, Drone bawm the shawng sa gap bun ma ai, dai hpang laknak kaba bai gap, ngut ai hpang gaw, sinat kaji ni bai ngoi pru rai hkying hkum chyen mi ram ngoi ai,” nga ginra masha langai tsun dan ai re.
Nan Hkwi Myen HPyen dap kata laknak kaba hkrat ai nsen na ai hpang, sinat kaji n sen ni ding yang ngoi wa ai lam ginra masha ni tsun ai kaw na chye lu ai.
Laknak kaba ngoi ai hpang, sinat kaji hkying hkum mi ram lahkawng maga gap gasat hkat wa nna, Hopin Myen HPyen dap kaw na mung laknak kaba ni gap garum wa ai lam nga ai hpe chye lu ai re.
KIA KPDF dap maga na laknak kaba sa gap bun ai hpang, Myen hpyen dap ni sinat kaji ni hte bai gap shadam bun wa ai masa sha re lam ginra masha ni matut tsun maram ai re.
Nan Hkwi Myen HPyen dap hpe sa gap gasat ai lam hte seng na, kata lam majan masa lam hte sum machyi hkra hkala ai lam ni hpe gaw a tsawm tup hkrak rai n chye lu shi ai re.
Ndai laman Mogaung Hopin lapran hta Sam Hkyeng SNA dap ni kaw na hpyen shamu shamawt ai lam ding yang galaw nga nna, Hpyen rim lahkawn ai lam ni mung ding yang galaw nga ai lam, ginra masha ni tsun ai re.