Hpakant Mawsiza Hpungkyi jawng kaw dap jung da ai Myen Hpyen dap hpe, KIA PDF dap ni Shok Taik Done lahkawng lang sa gap bun wa ai nga, ginra masha ni kaw na chye lu ai.
Mana Hkying 7 chyen daram hta Myen Hpyen La marai 100 jan rawng ai Mawsiza Hpungkyi Jawng hpe KIA maga laknak kaba sa gap bun wa ai lam shawng lam hpyen magam gun the ni nawn ai Salang langai KNG de n dai zawn tsun dan wa ai re.
“Mana gaw Mawsiza Hpungkyi Jawng kaw rawng taw ai Myen ni hpe 107 the sa shakrip jaw dat ma ai, dai hpang Myen ni mung makau grupyin de ja ji bai dumbre bun wa ma ai,” nga tsun dan ai re.
Myen Hpyen rim lahkawn woi la da hkrum ai hpyen la marai lahkawng mung, KIA PDF dap ni hpang de laknak jahkrat shang wa ai lam nga ai hpe matut chye lu ai.
Dai Hpyen la lahkawng gaw lai wa sai Shata 7 ram hta Myen hpyen dap rim lahkawn woi la hkrum ai Hpyen la yan rai nna, Hk.M.Y 385 dap na hpyen la yan re hpe chye lu ai.
Dai Hpyen la yan hta Sinat lau lahkawng hte Hpyen hkinghku hkum hte shang wa ai majaw, PDF dap maga na mung marai langai hpe gumhpraw sen 30 hpra hkap shagrau jaw nna, ya ten shim lum ai shara hta tawn da ai nga, PDF the ni nawn ai ni tsun ai re.
Hpakant ginra ya ten, Myen Hpyen dap ni Seng Tawng maga de htu na matu hpyen shamu shamawt taw ai majaw, Hpyen masa shaja hkat taw ai masa mung rai nga ai.
Hpakant ginra hta ya na zawn hpyen masa matut shaja hkat taw nga ai majaw, lai was ai Shata 7 ram kaw na hprawng yen ai Sharaw Hka, Woi Hpraw, Mana, Mawmaw Layang, တောင်ပြို ဗလခ Mawwan kaji, Mawwan kaba, Sutngai Yang, Sutbum mare hkan na HPyen yen mung shawa ni ya ten, garum ningtum ra ahkyak taw nga ai re.
Majan gap gasat hkat wa ai majaw, tinang hkum lawt daw hprawng yen pru wa ai Mung mare masha ni gaw, Hpyen yen ladaw Shata 7 hkawt du wa tim gadai gara wuhpung na garum ningtum ni n lu ai majaw, ya ten lam shagu hta yak hkak taw ai lam tsun ai re.
Dai ginra hkan na HPyen yen mung shawa ni gaw, Myitkyina de hprawng ai ni nga ai zawn, Hpakant ginra makau grup yin hkan sha hprawng ai ni mung lawm ai lam chye lu ai.
Hpakant ginra kata sha yen ai Hpyen yen mung shawa ni hpe ya ten du hkra gadai gara wuhpung mung n sa garum ai majaw, Yak hkak taw nga ai re.