Mungmyit Kudawng ginra, Mungmyit Muklum kaba kaw na,Balawng TNLA Dap ni hting nut yen mat wa ai rai tim Mungmyit Ginra hpe NUG npu PDF hte Jawngma dap ABSDF ni pawng hpawm nna matut makawp maga sa wa na lam, PDF dap maga tsun da ai re.
Mungmyit Ginra hpe ABSDF PDF dap ni matut makawp maga sa wa na lam hte seng nna, KIA maga hku na gaw, lamu ga ginra matut ai re majaw, tinang ginra de tawt lai wa ai rai yang gaw, ninghkap mat wa na re lam, Dukaba Naw Bu KNG de ndai zawn tsun ai re.
“Mungmyit Mare kaba gaw, anhte KIA Dung 34 ginra re majaw gaw anhte nga ai de lai shang wa yang gaw, ninghkap shingla gasat ra na sha rai nga ai, မိုးမိတ်မြို့ hpe laga PDF ni matut makawp maga sa wa na lam hpe anhte KIA maga hku na gaw, dingbai dingna jebat shang lawm na lam ni n nga ai,” nga na tsun wa ai re.
Mungmyit ginra gaw, KIA Dung 34 ginra re ai sha n ga, Jinghpaw Mung the matut ai shara re majaw, KIA a matu Hpyen masa lam hta ahkyak dik htum ai mare kaba langai mung rai nga ai.
Balawng TNLA hte Myen Hpyen dap ni gap hkat jahkring Myithkrum lam la wa ai hpang, Mungmyit Ginra kaw na TNLA dap ni yen ya ra na lam hpe myit hkrum da ai mung rai nga ai.
Balawng TNLA dap ni Mogok hte Mungmyit Mare ni kaw na ndai November 25 ya shani hpang jahtum yen ya ra na lam sagawn chye lu ai re.
TNLA dap ni yen mat wa ai rai tim, dai ginra ni yawng hpe PDF dap maga matut makawp maga sa mat na lam PDF dap maga n dau da ai re.
Ya ten, Mungmyit ginra hta gaw, ABSDF PDF dap ni shang shara la nna, hpyen shamu shamawt lam ni nga taw ai lam, ginra masha ni tsun ai re.
Mungmyit mare kaba gaw, Jinghpaw Mung Sagaing jarit shara re majaw gaw, KIA a matu Hpyen masa lam hta ahkyak ai mare kaba langai mung rai nga ai.