Myen Hpyen Dap galaw na Ralata poi daw 3 hpe 2026 ning January Shata hta sha ngut hkra galaw mat wa na lam nga ai hpe sagawn chye lu ai re.
Myen Hpyen Dap gaw, Masu Hkalem ai Ralata poi lamang langai hpe du wa na December Shata the January Shata kaw numdaw masum garan na galaw mat na matu hkyen da ai re.
Ralata poi numdaw langai hpe December 28 ya shani galaw na matu hkyen da ai hta, Ginwang 102 hta galaw na matu hkyen shajin da sai re.
Numdaw 2 ra lata poi hpe gaw January 11 ya shani Ginwang 100 hta galaw na matu hkyen shajin da ai lam n dau da ai re.
Numdaw 3 ra lata poi hpe mung, bat lahkawng din na galaw ai masa hpe maram yu yang, du wa na January 25 ya shani hta galaw mat wa na masa nga ai lam, Myen Mung shiga ni hta tsun da ai re.
Ndai Numdaw 3 ra lata poi hpe gaw, Ginwang 72 hta galaw mat na lam tsun da ai rai nna, dai ginwang ni gaw, Rawt Malan dap ni zing da ai ginra law malawng re lam sagawn chye lu ai.
Myen Hpyen dap galaw mat na hkyen da ai n htoi ni hpe maram yu yang bat lahkawng din na kalang galaw na hkyen ai masa mu lu ai lam, Mung masa yu maram ai Salang langai n dai zawn tsun maram da ai re.
“Gade mi Ninghkap ai nga tim, Myen HPyen dap gaw shi galaw ra ai lam ni hpe ding yang galaw mat wa na sha rai nga ai, Ya December 28 kaw galaw ngut ai hpang January 11 kaw bai galaw na nga hpe maram yu yang bat 2 din na bai galaw galaw re ga rai nga ai,” nga tsun maram tawn ai re.
Myen Hpyen dap woi galaw na Ralata poi gaw, gumshem lai ladat the daru magam zing da ai kaw na lawt lam tam ai, Masu Hkalem Ra lata poi re majaw, Mung Shawa ni n shang lawm na matu Rawt Malan Hpung maga na ni tsun shadut da ai re.