Nawnglut Ginwang Namawn, Mai Nawng mare ni hkan Sam Hkyeng Mung Shawa ni wa nga mai tim, Jinghpaw amyu ni gaw ya ten du hkra mare de n mai wa nga ai majaw, Dum n ta kata na arung arai ni yawng hpe Sam Hkyeng ni garan la taw nga ai lam, ginra amyu shayi langai KNG Shiga dap de tsun dan wa ai re.
Lai wa sai April Shata kaw Mainawng mare hpe Myen Hpyen dap the SNA Pyithutsit ni htim gasat shang wa ai majaw, ginra masha yawng hprawng yen mat ai rai nga ai.
Sam Hkyeng SNA Pyithutsit ni htim gasat shang wa ai ten, Jinghpaw n ta yawng hpe pat zing kau ya ma nna, ya ten, Jinghpaw n ta yawng hpe Tsi hkyeng shakap da ya nna, arung arai ni lagu shaw la taw nga ai lam the seng nna, n dai zawn tsun dan wa ai re.
“Anhte Na Mawn, Mai Nawng Mare ni hkan laga Sam Amyu ni yawng mai wa nga sai, rai tim anhte Jinghpaw ni gaw tsep kawp n mai wa ai. Ya n dai laman SNA hte Pyithutsit ni Nawku Jawng, Jinghpaw Nta hkan na arai ni hkan lagu shaw nna, jawm garan la taw nga ma ai da. Nawku jawng kata na Piano jak rai ni hpa mung n nga sai,” nga na tsun dan wa ai re.
Mai Nawng hte Na Mawn mare ni hta Sam Hkyeng amyu ni yawng tinang mare kaw wa nga taw sai rai tim, Jinghpaw ni gaw dai ni du hkra mare dum n ta de n lu wa na, yak hkak taw nga ai re.
Ya ten, Mare kata Sam Hkyeng Pyithutsit ni mung shawa dum n ta hkan na arung arai ni yawng hkan htaw la taw ai nga na mung matut tsun dan wa ai re.
Nawnglut Ginra na mung shawa hkying mi jan gaw ya ten Nam maling kata de hprawng yen nna, garum ningtum hpa mung n lu yak hkak taw nga ai re.