Hpakant Malang Dung Mare de sa wa ai Myen Hpyen Hpung ni hpe Mawsiza lam mazup kaw bawm hkap kapaw wa ai majaw, Myen Hpyen dap maga si hkala ai lam nga wa ai lam ginra masha ni kaw na chye lu ai.
November 10 ya jahpawt hkying 9 aten daram hta, Malang Dung maga de hpyen garum sa wa ai Mawdaw hpe Rawt malan hpung maga na bawm hkap kapaw ai majaw, dai shara kaw nan Myen Hpyen dap si hkala lam nga wa ai nga ginra masha langai KNG de n dai zawn tsun dan ai re.
“ Dai hpawt manap Hpyen masa shaja hkat taw nga ai Malang Dung mare de hpyen garum sa wa ai Myen Hpyen mawdaw hpe anhte maga ni na Mawsiza lam numbraw kaw bawm hkap adem jaw dat ai kaw tsawm ra nyam mat sam ai, makau grup yin dum n ta hkan grai san jep hkawm wa ma ai,” nga tsun dan wa ai re.
Lai wa sai Shata hta, Malang Dung mare de htu tawn ai Myen Hpyen n kau hpe bai shaw la kau nna, n dai laman kalang bai hpyen n gun jat bang taw ai masa re lam chye lu ai.
Hpakant ginra hta ya ten, Myen hpyen dap ni hpyen man masum the Seng Tawng ginra de shang wa na masa nga taw nna, Lawng Hkang, Mawsiza mare ni hta hpyen shamu shamawt taw ai nga, Hpakant ginra masha langai KNG shiga de tsun dan wa ai re.
Myen Hpyen dap ni n dai laman hta Malang Dung mare de bai rap wa na masa a majaw, ginra masha ni myit tsang taw nga ai re.
Lai wa sai Shata hta Seng Tawng mare de htim gasat na matu Myen Hpyen hpung ni Malang Dung maga hku htu shadut yu ai rai tim, Sum machyi law ai majaw, bai htingnut mat ai rai nga ai.
Hpakant Yuma Everwin Myaw Chan kaw rawng nga ai Myen Hpyen hpung ni hpe KIA maga Drone the bawm sa jahkrat bun ai hpang, Hpakant Tatma kawng na laknak kaba bai gap shadam bun wa ai masa re lam ginra masha ni tsun maram da ai re.
Yuma ma mare kaw rawng nga ai Myen Hpyen hpung ni gaw, Seng Tawng Lucky Men Hotel gasat poi majan ten kaw na hprawng htingnut yen mat ai Myen Hpyen hpung ni re lam sagawn chye lu ai.