October 21 ya shani Sadung Ginwang Ngwi Ngawn Ninghtawn, Laban Kahtawng mare, Mali Mungra Buga Hkalup Hpung a Nawku hpung mahta hpaji jawng Magam gun Sara lahkawng hpe Dapba (1) na ni hpyen rim lahkawn woi mat ai majaw, Buga hpung hpaji jawng hta yak hkak hkrum nga ai lam ginra masha ni tsun ai kaw na chye lu ai.
Dai Sara yan hpe Ugawn Jawng dat nga ai laman, dai mare kaw nan, KIA dapba (1) na ni sa woi mat ai nga, ginra masha hte ni nawn ai Salang langai KNG hpe n dai zawn tsun dan wa ai re.
“Buga hku nga yang, Waimaw Ginwang Mali Mungra Buga kaw na Nawku Hpung mahta hpaji jawng kaw, tsang masum jawng Sara galaw nga ai rai nga ai, October 21 ya shani rim woi lahkawn mat ai majaw, bai dat ya na matu Nawku hpung na Hpung Up hpung Salang ni sa tsun ai, sa tsun yang she Hpung Up ni hpe mung bye ai re ngu tsun jahkrit sharim na sha bai wa kau shangun dat ma ai,”nga KNG de tsun dan ai re.
Dai Sara yan gaw, bum ga kaw nawku hpung mahta hpaji jawng hta jawng Sara magam bungli hta ap nawng taw nga ai ten, KIA maga ya na zawn hpyen rim lahkawn la kau ya ai majaw, ma ni hpe hpaji sharin ya na jawng Sara n nga yak hkak taw nga ai lam ginra masha ni matut tsun ai re.
Dai jawng Sara yan hpe bai dat ya na matu, Nawku hpung magam gun ni a tsawm sa tsun jahta shaw ai rai tim, dai kaw na magam gun ni bai n htang ahkre kau dat ai lam ginra masha ni tsun ai.
Ndai masa lam hte seng na lit nga ai Dapba Dapdung ni de matut mahkai shakut yu ai rai tim, matut mahkai mayak a majaw n lu san shaga ai re.
Dai jawng Sara yan gaw, U gawn jawng dat ten laman rim woi la hkrum ai rai nna, ya jawng bai hpaw ten du tim dai Sara yan lahkawng n du wa ai majaw, Laika sharin jawng hta jawng Sara n nga yak hkak hkrum taw ai lam chye lu ai.
Ya ten Jawng hpaw laika sharin ladaw ten re majaw, Jawng Sara yan hpe lawan bai dat ya na matu buga ginra masha ni hpyi shawn nga ma ai re.