Lang Se Mare de Myen Hpyen nbungli bawm bai wa jahkrat bun wa ai lam, ginra masha ni kaw na chye lu ai.
Dai ni October 21 ya shani ka-ang hkying 12 chyen ten daram hta, Lang Se ginra de Myen Hpyen Jet Nbungli langai, Y12 Nbungli langai hte bawm bai wa jahkrat bun kau da ai lam ginra masha wa KNG de n dai zawn tsun dan ai re.
“Dai ni shani ka-ang ram hta Y12 Nbungli langai, Jet Nbungli langai bawm bai wa jahkrat bun kau da ma ai da. Gara shara kaw kaning rai wa jahkrat kau da ai gaw n chye ai, Shim lam a majaw n tsun dan ai rai sam ma ai, Masha si hkala lam mung gaw n chye shi ai,” nga tsun dan ai re.
Nbungli bawm wa jahkrat ai lam hte seng na gara shara kaw gade lang wa jahkrat kau da ai ngu hpe gaw, shim lam a majaw atsawm tup hkrak rai n chye lu shi ai re.
Ndai laman Jarit mayan hta Miwa Drone ni shana shagu pyen gayin nga ai majaw, Mung shawa n kau myit tsang taw ai lam, jarit mayan na mung shawa ni tsun ai re.
Jarit Mayan hta Miwa Drone kinyu yu nna, Myen Hpyen dap hpe shiga jaw nna, Myen Hpyen dap maga na nbungli bawm bai wa jahkrat bun ai masa re lam, ginra masha ni tsun nga ma ai re.
“Ndai laman gaw, Jarit shara shagu ngu na de Drone grai pyen ai, Miwa ni na Drone re nga tsun ai, anhte mung shawa ni gaw gadai na kaning re drone re n chye ai le, dai majaw anhte mung shawa ni gaw hkrit na hkrai nga ai,” nga Pang Wa ginra na mung shawa langai mung KNG de matut tsun dan wa ai re.
Lang Se ginra hpe Myen HPyen dap ni bai zing na matu shakut yu ai rai tim, masan sa awng dang ai lam n lu ai majaw, n dai laman shani shagu nbungli hte wa dip n gun jaw taw ai masa re lam hpyen masa yu maram ai ni tsun ai re.
Lai wa sai Shata hta mung Lang Se mare kaw Nbungli bawm wa jahkrat bun ai majaw, Mung Shawa Si hkala ai lam nga wa ai re.