Langse Mare De Nbungli Bawm Bai Wa Jahkrat

Mung Shawa 1 Si 3 Hkala

Majan byin ai lam n nga tim Langse mare de Myen Hpyen Nbungli bawm bai wa jahkrat bun ai majaw, Mung shawa langai si nna, marai 3 hkala hkrum wa ai lam, ginra masha ni kaw na chye lu ai.

October 10 ya shana maga hkying 3 aten daram hta, Lang Se mare kaw Y12 nbungli hte Bawm 6 lang wa jahkrat bun kau da ai majaw, Mung shawa 1 si nna, marai 3 hkala hkrum ai lam dai ginra na Mung shawa langai KNG shiga de tsun dan ai re.

“Ndai laman gaw hpa majan byin ai mung n nga ai, Y12 Nbungli hpan shani shagu wa pyen gayin taw nga nna, dai ni gaw Bawm 6 lang jahkrat bun kau da ai. Si ai gaw asak 40 ning re ai, Slg Maran Zau La ngu ai wa rai nna, hkala hkrum ai marai masum gaw, asak 46 ning re ai, Slg Maw Maw, asak (28) ning re ai Htoi Li Nan Awng, asak 33 ning re ai Slg Dau Zan ni re,” nga tsun dan wa ai

Ya Si hkrum ai ni gaw, laga ginra de na Lang Se mare de Ja gumhpraw wa tam na du nga ai ni hkrai re lam matut chye lu ai.

Lang Se Ginra hpe bai gasat la na matu Myen Hpyen Dap hte Pyithutsit dap ni Hkawng Lan Phu maga hku na htim gasat sa wa ai hpe KIA KPF pawng hpawm dap na Lahesin post dap shara kaw na hkap shingla gasat ai majaw, Myen ni dai kaw na n lu lai ai dai ni ten du hkra rai nga ai re.

KIA KPF dap ni n dai laman Hkawng Lan Phu maga de na ahkyak ai dap shara langai hpe bai wa gasat zing la kau ya ai majaw, ya na zawn, nbungli the bawm hkan jahkrat bun wa ai mai byin ai nga, ginra amyu shayi langai mung matut tsun dan wa ai re.

Ya ten, Lang Se ginra de Hpyen masa shaja hkat nga ding yang rai nna, Myen hpyen dap ni dai ginra hpe bai gasat zing la lu na matu, Pyithutsit hpyen n gun law law jai lang nna, Hkawng Lan Phu hte Waimaw ginra lahkawng maga hku na hkyen shajin taw nga ai re.

Exit mobile version