Manmaw Majan hta, lai wa sai Shata kaw KIA Pawng hpawm dap maga gan yen kau da ya ai, Manau wang makau grup yin na dap shara 3 hpe pawng hpawm dap maga dai hpawt bai gasat zing la lu wa ai nga shawng lam hpyen magam gun ni kaw na chye lu ai.
Dai hpawt gasat zing la lu ai dap shara gaw, Manmaw Deng 2 အရှေ့သာစည် hte Golf Pa lapran na Hk.M.Y (320) ni dap jung shara la nga ai, shara 3 hpe gasat zing la lu wa ai rai nga ai.
Dai shara ni gaw, Pawng hpawm dap maga dai ning shaning ningnan daw hta gasat zing da sai shara ni hpe, Myen hpyen dap maga Hpyen n-gun, laknak n-gun kaba hte bai htim gasat wa ai majaw, gan yen tawn kau da ai shara ni hpe dai hpawt bai gasat zing la ai lam rai nga ai.
Manmaw Majan hta KIA maga gan yen da ai shara n kau hpe bai gasat zing madu la lu wa ai lam the seng nna, Dukaba Nhpang Naw Bu KNG shiga de n dai zawn tsun dan wa ai re.
“Deng 2, Deng 3 ginra kaw ya the na mi majan byin ai, Hk.L.Y (47) maga de ma rai, ning Deng 2,3 maga de ma rai ထိတွေ့ရင်ဆိုင်တိုက်ပွဲ byin taw ai rai nga ai, anhte maga na ni mung Deng 2, Deng 3 kaw Shim lam la nga ai Myen ni hpe bai htim gap ai, dai hpawt gaw Deng 2, 3 hkan na shim lam la da ai dap shara n kau hpe lu la ai.” Nga tsun shateng wa ai re.
Manmaw Majan gaw, lai wa sai September Shata kaw na Manmaw Nmawk lam, Deng 2, Deng 3, Manau wang makau ni hta laja lana gap gasat hkat taw ai rai nga ai.
Lai wa sai September Shata kaw KIA pawng hpawm dap maga hpyen masa a majaw, gan thing nut yen kau da ai shara ni hpe dai hpawt bai gasat zing la lu wa ai re nga, shawng lam hpyen magam gun langai mung KNG hpe n dai zawn tsun dan wa ai re.
“Dai hpawt gaw Manau Wang makau grup yin na anhte yen kau da ai shara ni hpe bai lu la ai rai nga ai, Moi ya hkan gap hkat ai kaw Myen ni kashun la kau ai hpe ya gaw anhte bai sa htim gap la ai ga rai nga ai le.” Nga tsun ai.
Lai wa sai September 29 ya shani hta mung, Hk.L.Y 47 dap na shawng lam dap shara langai hpe gasat zing maden la lu wa ai hpang, Manmdaw Deng 2 de na ရွှေပြည်သာ KBC Nawku Jawng kawng dap shara ni hpe bai gasat zing la ngut ai hpang, dai hpawt gaw, manau wang grup yin na shara n kau bai lu la wa ai rai nga ai.
Manmaw muklum gaw, lamu ga dam ai sha n ga, Majan man mung law ai rai nga ai.
Lai wa sai August Shata praw kaw Myen hpyen Hka sang hpaw du ai hpang Myen hpyen dap ni KIA ni nga ai shara n kau de bai htim gasat wa ai majaw, KIA maga mung gasat zing da ai shara n kau hpe yen kau da ai rai nga ai.
Ya ten dai yen kau da ai shara ni hpe n ai laman bai gasat zing taw nga ai gaw, shani shagu majan laja taw ai lam chye lu ai.
Manmaw htim shagrawt majan hta Manmaw muklum kata na Myen hpyen dap shara law malawng hpe gasat zing la lu sai rai tim, Myen Hpyen dap daju Ts.K.Hk (21) the Hk.L.Y (47) dap hpe n lu gasat zing hkraw ai rai nga ai.
Ts.K.Hk (21) dap hpe KIA Pawng hpawm dap maga 3 lang htim gasat yu sai rai tim, Laknak n gun n bung ai majaw awng dang ai lam rai n lu la shi ai nga, shawng lam hpyen magam gun ni tsun ai re.