Dai ni shani ka-ang hkying 12 aten daram hta Hpakant Malang Dung Mare de Myen Hpyen Dap nbungli bawm wa jahkrat bun ai nga, ginra masha ni tsun dan wa ai re.
Dai ni October 9 ya shani ka-ang hkying 11:57 aten kaw Malang dung mare kaw nbungli bawm lahkawng sa jahkrat bun kau da ai hpang, Hpakant Tatma kawng kaw na mung laknak kaba lahkawng lang gap bun wa ai nga, ginra masha langai KNG de n dai zawn tsun dan ai re.
“Dai ni shani ka-ang Hkying 12 ram kaw Malang Dung mare de nbungli bawm lahkawng lang wa jahkrat bun wa ai re. Nbungli bawm wa jahkrat ngut ai hte tatma kawng na laknak kaba gap ai lahkawng lang rai sai,” nga nbungli bawm wa jahkrat ngut ai hpang, ginra masha wa KNG de tsun dan wa ai rai nga ai.
Myen Hpyen dap ni gaw ya ten, Seng Tawng mare de htim gasat na matu hpyen man lahkawng hku na htu shadut nga ai majaw, Hpakant Seng Bum kaw n dai laman majan shani shagu byin taw ai rai nga ai.
Dai zawn majan byin taw nga ai ten, Myen Hpyen dap maga nbungli bawm wa jahkrat bun wa lam re nga, ginra masha ni tsun ai.
Ya majan byin nga ai shara gaw Nammahpyit waw ra hkran Ja Ra Yang mare rai n du shi yang na Seng Bum shara kaw gap gasat hkat taw ai lam chye lu ai.
Mani hpawt gaw, Myen Hpyen hpung ni Tatma kawng n pu na Ball Lung pa kaw masha mahkawng rai nna, Mawdaw the Nammahpyit maga lai sa wa ai lam chye lu ai.
Dai Myen Hpyen hpung ni Nammahpyit du ai hpang, Malang Dung maga de rap na matu hkyen shajin taw nga ai ten, KIA PDF dap maga lam lapran hkap gasat ai majaw, dai Myen hpyen hpung ni ya ten du hkra Malang Dung mare maga de rai n lu lai shi ai lam chye lu ai.