Waimaw Lamyang mare makau kaw dap jung shara jahkrat da ai Myen Hpyen dap hte Min Zay Thant Pyithutsit ni pawng nga taw ai dap shara lahkawng hpe KIA Pawng hpawm dap maga dai hpawt bai gasat maden jat la lu ai nga, shawng lam hpyen magam gun hte ni nawn ai ni tsun ai re.
Wamaw Lamyang mare hpe Myen hpyen dap maga lai wa sai bat langai ya shani hta, nbungli laknak kaba hte ladu lai gap sharu bun ai majaw, Lamyang mare makau na dap shara n kau hpe pawng hpawm dap ni loi li gan hting nut kau da ya lai wa ai re.
Pawng hpawm dap maga hpyen masa hta hkan na gan yen kau da ai shara ni hpe dai ni bai gasat zing la lu wa ai re nga shawng lam hpyen magam gun the ni nawn ai salang langai ndai zawn tsun ai re.
“Myen ni n dai laman Waimaw Lamyang de agying bai gasat taw nga ma ai, ya hte langai ya shani gaw nbungli Myitkyina Waimaw hkan na laknak kaba gap bun ai majaw, baw pyi n lu dap ai majaw, loi mi gan thing nut mat ai nga ai, dai gan thing nut yen da ya ai ni hpe dai hpawt bai gasat la ai ga rai nga ai, dai hpawt gasat zing la ai gaw, Min Zay Thant Pyithutsit hte Myen ni jawm nga taw ai shara lahkawng re,” nga tsun dan ai.
Waimaw Lamyang mare Majan man de Myen Hpyen dap maga nbungli bawm the laknak kaba laja lana gap sharu bun nga nna, lagaw lam hku na mung htim gasat taw nga ai majaw, majan dai ni du hkra laja lana matut byin nga ai lam chye lu ai.
Myen Hpyen dap ni Waimaw Kanpaiti lam kaba hpe gasat up madu la lu na matu n dai laman Pyithutsit hpyen n gun law law jai lang nna, KIA ni zing da ai Wuyan, Lamyang, Washawng lam maga de htim gasat taw nga ai re.
Dai ginra htim gasat ai lam hta, Myen Hpyen hpyen dap hte Wara Zup Pyithutsit, Sam Hkyeng Pyithutsit, Zahkung Ting Ying Pyithutsit, Lisu Pyithutsit, BGF hpyen la ni hpe jai lang nna, htim gasat taw nga ai re.
Dai Pyithutsit hpyen la ni hpe, shawng de htim gwi na matu, Yama tsi hkyep ni hpe jaw sha nna, htim gasat shangun taw nga ai nga, Pyithutsit the ni nawn ai ni kaw na chye lu ai re.
Myen HPyen dap maga na gaw, n dai December Shata ra lata poi rai n du shi yang, Waimaw, Chihpwi, Pang Wa ginra na shan hte tat sum kau da ai shara ni hpe bai lu gasat zing hkra, hpyen n gun kaba the shakut taw nga ai lam, hpyen masa yu maram ai ni tsun tawn ai re.