Lahta Sammung Namdu mare hta, bat mi laman n bungli bawm 3 lang wa jahkrat bun ai majaw, ginra masha law malawng, shim lum ai shara de htawt sit hprawng yen taw sai lam, ginra masha ni kaw na chye lu ai.
October 7 ya jahpawt hkying 6 aten daram hta, Namdu mare lawk (8) na Hpungkyi Jawng dum nta kaba langai hpe bawm wa jahkrat bun ai majaw, masha si hkala ai lam n nga tim, Jawng n ta yawng hten ayai mat ai lam chye lu ai.
Namdu mare kaw n bungli bawm a majaw, Mung shawa law malawng Lashio de hprawng yen taw ai masa lam the seng nna, ginra masha langai KNG shiga de n dai zawn tsun dan ai re.
“Namdu Mung mare masha ni gaw, yawng ngu na hprawng yen ai hku rai sai, Namdu mare gaw katsi katsang she rai mat sai, anhte Jinghpaw ni gaw Nawku Hpung kaw na woi awn ai hte Lashio de hprawng yen law ai, laga hpu nau ni gaw Yin Wa Sun ni de hprawng yen ma ai”nga tsun dan ai re.
Myen Hpyen dap maga, Namdu mare hpe October praw 2 ya jahpawt shawng ning nan lang n bungli bawm jahkrat bun ai majaw, Ma kaji amyu shayi hte hpawn marai 4 asak si hkrum wa nna, marai 7 hkala hkrum wa ai re.
Dai hpang October praw 6 ya hte praw 7 ya jahpawt ni hta mung bai wa jahkrat bun wa ai rai nga ai.
Namdu mare kaw ya na zawn n bungli the bawm 3 lang wa jahkrat bun ai hpang, Namdu mare Gat, Hpaji Jawng ni hpe yawng pat kau sai majaw, Mare ting yawng zim rai mat sai lam ginra masha langai wa mung n dai zawn matut tsun dan wa ai re.
Ya ten Namdu mare masha law malawng gaw, Lashia mare de hprawng yen nga ai zawn, Nawng Leng maga de mung hprawng yen taw nna, n kau tinang Yi Sun ni de hprawng yen ai ni mung nga ai lam chye lu ai.
Myen Hpyen dap maga gaw, Namdu mare hpe Nbungli bawm jahkrat ai hpang, lagaw dap hku na bai htim gasat wa na masa nga ai lam the seng na ginra masha langai wa mung ndai zawn tsun maram tawn ai re.
“TNLA dap ni maga gap hkat n jahkring dingsa, lamu ga n htingnut ya ding sa gaw, Myen ni gasat na sha rai nga ai, ya yang gaw Namdu Mandung, Mogok, Ti Paw ni hpe n yen ya ding sa gaw n lu yang lu hka gasat na rai nga ma ai, ndai Ralata poi rai n du shi ai laman lawan lu hkra nga na shakut taw ai masa re ngu na ma gaw lu maram ai law,” nga tsun ai re.
Lai wa sai August Shata hpang jahtum bat kaw Myen Hpyen dap the Balawng TNLA dap ni Miwa mung kaw hkrum jahta bawngban wa ai hta, Nam Du, Man Dung, Mogok, Ti Paw ginra ni yawng hpe bai yen ya na matu, Myen Hpyen dap maga tsun hpyi shawn wa ai hpe chye lu ai re.
Dai zawn hkrum jahta bawng ban ai hpe Balawng TNLA dap maga n hkap la ai majaw, Majan matut gap gasat hkat wa nna, Nawng Cho hpe tat sum kau ai hpang, October praw 1 ya shani gaw, Kyauk Me muklum hpe bai tat sum wa ai mung rai nga ai.
Ya Kyauk Me muklum hpe tat sum kau ai hpang Myen hpyen dap maga ngam ai ginra ni hpe bai naw htim gasat na matu nbungli hte bawm hkan jahkrat bun taw ai masa re lam mu lu nga ai re.
Dai majaw, December ra lata poi rai n du shi yang, Nam Du, Man Dung, Mogok, Thi Paw ni hpe bai htim gasat zing wa na masa nga ai lam, hpyen masa yu maram ai ni tsun maram da ai re.
Namdu Mandung ginra hpe Balawng TNLA dap maga, 1027 majan masing ten laman, 2023 ning December Shata kaw htim gasat zing madu kau ai rai nga ai.