Myen Hpyen dap daru magam ngang kang na matu KIA the PDF dap ni hpe gasat shamyit mat wa na lam, Wara Zup Pyithutsit Ningbaw Min Zay Thant wa tsun mat ai re.
October praw 1 ya shani Wara Zup ninghtawn San Pya mare kaw galaw ai, masat yan 8 ningpawt ninghpang, hpyen wunkat hte Masat yan 2 amyu shayi hpyen ningpawt ninghpang jawng yu hpawng lamang hta tsun mat wa ai rai nga ai.
“ Anhte gaw ndai Mungdan na Masha ni rai ga ai the maren, Mungdan hpe makawp maga na lit anhte lu saga ai the maren, Mungdan hpe makawp maga na matu Myen Hpyen dap hte lata gindun nna, Mungdan hpe jahten sharun taw nga ai, KIA PDF jahten sharun hpung ni hpe gasat shamyit mat wa na re,” nga nna, Wunkat yu hpawng lamang kaw n gun jaw tsun ai ten tsun shalawm mat wa ai re.
Wara Zup Pyithutsit hpung hta, masat yan 8 du hkra Hpyen wunkat jaw da ngut sai majaw, hpyen n gun hkying mi daram du was ai rai nna, dai hta, asak ram ai ramma Num La law law lawm ai hpe mu mada lu ai nga, Jahtu Zup ginra masha langai mung KNG de n dai zawn tsun dan wa ai re.
“Ndai kalang Hpyen wunkat yu lamang hta mung, marai 100 jan ram re ngu maram lu ai, Sanpya Pyithutsit wang hta sha galaw mat wa ai, Ramma Kaji ji sha law ni grai lawm ai,” nga tsun dan ai re.
Wara Zup Pyithutsit hpung ni gaw, Jahtu Zup Mare numshang San Pya mare kaw dap jung shara jahkrat da ai rai nna, Jahtu Zup, San Pya, Awng Ra, Bankok, Wara Zup dai mare makau grup yin hkan na Ja Maw ginra ni hpe up madu da na nga taw ai re.
Wara Zup Pyithutsit Min Zay Thant hpung ni gaw, Myen HPyen dap daru magam zing kau ai hpang, Hugawng Lido lam kaba mayan hta, n gun grau grau kaba jat wa nna, KIO Sinna ginwang ginjaw n pu na dap dung dap shara ni hpe jahking hkring htim gasat ai lam galaw taw ai wuhpung mung rai nga ai.
Dai majaw, Jahtu Zup mare makau na Kai Taw, Chaung Sung, Kanoi Thu, Wa Hka mare makau hkan na KIA dap shara ni hpe jahkring hkring htim gasat ai lam galaw taw ai mung rai nga ai.