Myen Hpyen dap ni dai hpawt manap Balawng TNLA gasat zing da ai Nam Du mare kaw bawm bai wa jahkrat bun ai lam chye lu ai.
Dai hpawt manap hkying 7 aten Nam Du mare ပန်ဟိုက် lawk 2 Gat shingdu kaw Nbungli bawm wa jahkrat bun ai majaw, Mung Shawa si hkala ai lam n nga ai rai tim, Dum n ta 5 hten mat nna, Mawdaw langai mung hten mat ai lam ginra masha langai KNG de n dai zawn tsun dan wa ai re.
“Namdu Wansat rung shawng na n ta ni re ga rai nga ai, masha chyawm hpa n byin ai, ya hte kalang wa hkrat ai kaw na mi yawng yen mat sai, dai majaw masha gaw hpa n byin ai. Nta hkra hten ai kaw, tsep kawp n mai rawng mat hkra hten ai 3 lawm ai, Man Lung Mawdaw 2 mung hkra hten lawm mat ai,”nga tsun dan ai re.
Dai hpawt n bungli bawm bai wa jahkrat bun ai shara gaw, ya the lai was ai bat kaw wa jahkrat ai shara makau kaw sha re lam chye lu ai.
Ya hte October praw 2 ya jahpawt na nbungli bawm a majaw, Mung Shawa yawng hprawng yen ma ai majaw, dai hpawt gaw, Si hkala ai lam hpa n nga wa ai re lam chye lu ai.
Namdu mare hpe Balawng TNLA dap ni lai wa sai 2023 ning htim gasat zing la kau ai ten nbungli bawm jahkrat bun ai lam n nga wa yu ga ai rai tim, dai hpawt bai wa jahkrat bun ai the rai yang lahkawng lang rai sai lam chye lu ai.
Lai wa sai October praw 2 ya jahpawt wa jahkrat bun ai hta, Mung shawa kaji kaba yawng pawng marai 10 jan si hkala hkrum wa ai re.
October praw 1 ya jahpawt Myen Hpyen dap ni Kyauk Me muklum kaba hpe htim gasat zing madu kau ai hpang, Nam Du, Man Dung, Nam San mare ni de bawm wa jahkrat bun taw ai mung rai nga ai.
Myen Hpyen dap maga gaw, Balawng TNLA dap ni hpe, shan the gasat zing da ai ginra ni yawng kaw na bai yen ya na matu tsun hpyi shawn da ai rai nna, Nam Du, Man Dung, Nam San mare ni yawng hpe bai gasat zing na masa hte ya na zawn Nbungli bawm hkan jahkrat bun wa ai masa re nga, ginra masha ni tsun maram da ai re.