Muse hte Nam Hkam mare lapran, Nawng Seng Mare makau kaw, Sam SSPP dap ni shagyit jahkrat nna, gumhpraw ladu lai hta sha taw nga ai majaw, hkrun lam hkawm mung shawa ni hta yak hkak hkrum taw nga ai lam, ginra masha ni tsun shana wa ai re.
SSPP dap maga, Muse the Nam Hkam lapran kaw Shagyit jahkrat ai n htoi bat lahkawng daram dang sha naw rai nna, hkrun lam hkawm mung masha langai kaw na, lap 5000 hkap hta la ai sha n ga, Mawdaw langai kaw na Mun 5 hkap hta ai nga, Mawdaw la langai KNG de ndai zawn tsun dan wa ai re.
“Sam n dai ni Shagyit hpaw ai gade n na shi ai, gumhpraw grai hta sha ai, Hkrunlam hkawm mung shawa langai kaw 5000 hkap hta ai, Muse kaw na pru wa yang gaw n ra ai, Namhkam na Muse de shang wa yang jaw ra ai, Lai shagu jaw ra yang gaw Mung shawa ni yak ai le,” nga tsun ai re.
SSPP dap ni gaw, lai wa sai ten, Ting Lung mare kaw dap jung ai rai tim, n dai laman hta gaw, Muse hte Namhkam Mare lapran na Nawng Seng mare makau kaw, Gate kaba jahkrat na nga taw sai lam matut tsun dan ai re.
Ya ten dai shagyit hta SSPP Sam rawt malan hpung maga na Mawdaw kaji kaba, gunrai hta hkan nna, shan hte kam hpyi ai daram hkap hpyi ai ladat hte hta taw ai lam ndai zawn matut tsun dan wa ai re.
“Nkau gunrai htaw mawdaw kaba ni hpe gaw, Sen 5 mung hta ma ai, gunrai law yang law ai hku, Sen 3, Sen 2, Mawdaw kaji ni hpe gaw Mun 5, hkrun lam hkawm masha hkrai htaw da yang gaw, hkrun lam hkawm masha langai kaw na hkying 5, dai hku rai na hkap hta taw nga ma ai, ngut na gaw laga ဘီးခွန် law, hpa law nga na, laning mi kalang jaw ra bang ra ai ni mung hta ai,” nga na tsun dan ai re.
Dai zawn gumhpraw hkap hta ai majaw, Mung mare masha maga na Voucher bai hpyi yang, n lu ai ngu tsun let, hpa maisau laika pa mung n ka ya ai sha, majoi hkrup mara hta sha taw ai lam chye lu ai.
Ndai lam the seng nna, SSPP na lit nga ai ni hpe san yu na matu shakut yu ai rai tim, matut mahkai mayak lam a majaw, a tsawm san shateng lu ai lam n nga ai re.